សាលាឧទ្ធរណ៍ដោះលែងលោក ឌិន ពុទ្ធី នៅក្រៅឃុំ
រាជធានីភ្នំពេញ ៖ បន្ទាប់ពីសវនាការអសាធារណៈកំបាំងមុខជនជាប់ចោទ និងជនរងគ្រោះ ចៅក្រមសភាស៊ើបសួរសាលាឧទ្ធរណ៍ នៅព្រឹកថ្ងៃទី១៣ ខែមករា
រាជធានីភ្នំពេញ ៖ បន្ទាប់ពីសវនាការអសាធារណៈកំបាំងមុខជនជាប់ចោទ និងជនរងគ្រោះ ចៅក្រមសភាស៊ើបសួរសាលាឧទ្ធរណ៍ នៅព្រឹកថ្ងៃទី១៣ ខែមករា បានសម្រេចឲ្យលោក ឌិន ពុទ្ធី ប្រធានសមាគមសេដ្ឋកិច្ចក្រៅប្រព័ន្ធប្រចាំនៅក្រុងប៉ោយប៉ែត នៅក្រៅឃុំជាបណ្តោះអាសន្ន តែស្ថិតក្រោមការត្រួតពិនិត្យរបស់តុលាការ ។
លោក ឌិន ពុទ្ធី ត្រូវបានចោទប្រកាន់ពីបទហិង្សាដោយចេតនាលើករណីបើករថយន្ដបុកលោក ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បណ្ដាលឱ្យដួលសន្លប់ តែមជ្ឈដ្ឋាននានាមិនគាំទ្រការចោទប្រកាន់នោះទេ និងបានចោទវិញថា នាយនគរបាលរូបនេះធ្វើពុតជាដួលមុខរថយន្ដ និងមានឃ្លីបវីដេអូបង្ហាញជាក់ស្ដែងផង ។
ក្រុមចៅក្រមជំនុំជម្រះសភាស៊ើបសួរសាលាឧទ្ធរណ៍ក្នុងសវនាការនេះ ដឹកនាំដោយលោក ងួន រតនា ជាប្រធានក្រុមប្រឹក្សាជំនុំជម្រះ លោក យូ ប៊ុនណា លោក អិន វ៉ានវិបុល ជាសមាជិក និងលោក ហ៊ាន រិទ្ធ ជាតំណាងមហាអយ្យការ ។
លោក គឹម សុជាតិ មេធាវីការពារក្តីរបស់លោក ឌិន ពុទ្ធី ថ្លែងថា ពេលនេះលោកចៅក្រមសភាស៊ើសួរសាលាឧទ្ធរណ៍ សម្រេចដោះលែងកូនក្តីរបស់លោកគឺលោក ឌិន ពុទ្ធី ឱ្យនៅក្រៅឃុំហើយ តែដាក់ឲ្យនៅក្រោមការត្រួតពិនិត្យរបស់តុលាការ ដោយមិនឲ្យលោក ឌិន ពុទ្ធីផ្លាស់ប្តូរអាសយដ្ឋាន ត្រូវឆ្លើយតបរាល់ដីកាកោះហៅរបស់តុលាការ និងបង្ហាញខ្លួន និងធ្វើតាមការសាកសួរ ។
លោកមេធាវីបានលើកឡើងថា តាមការសម្រេចនេះសភាស៊ើបសួរនៃសាលាឧទ្ធរណ៍ បានបញ្ជាឲ្យដោះលែងជាបន្ទាន់នៅពេលមានដីកាពីតុលាការ ។ ក្នុងពេលសវនាការនេះ មេធាវីបានសំអាងលើការសម្រេចរបស់ចៅក្រមស៊ើបសួរសាលាដំបូងខេត្ត និងសាក្សីបានចូលបំភ្លឺអស់ហើយ ។ ក្នុងនោះមេធាវីបានលើកពីសេរីភាពរបស់ជនជាប់ចោទ និងតាមដើមបណ្ដឹងបានឆ្លើយមិនមានប៉ះពាល់អ្វីធ្ងន់ធ្ងរនោះទេ និងមិនបានទាមទារសំណងទេ ។
លោកមេធាវីបានលើកឡើងថា ការដោះលែងឱ្យនៅក្រៅឃុំនេះ លោកបានលើកឡើងពីស្ថានភាពជីវភាពរបស់គ្រួសារជនរងគ្រោះនិងមានកូននៅក្នុងបន្ទុកជាដើម ។ យើងបានលើកឡើងពីមតិរបស់មជ្ឈដ្ឋានទូទៅថា រឿងនេះមិនគួរតុលាការឃុំខ្លួនទេ ។
គួរបញ្ជាក់ថា លោកអភិបាលខេត្តបន្ទាយមានជ័យ ធ្លាប់បានលើកឡើងក្នុងអង្គប្រជុំនៅសាលាខេត្តថា លោកស័ក្តិ៤ ឈាន ពិសិដ្ឋ ដែលចោទប្រកាន់លោក ឌិន ពុទ្ធី បើករថយន្តបុកបង្ករបួស គ្រោងផ្លាស់ចេញពីច្រកទ្វារប៉ោយប៉ែត ដើម្បីបន្ថយភាពតានតឹងជុំវិញរឿងរ៉ាវដ៏រសើបនេះ ដើម្បីឱ្យពលរដ្ឋស្ងប់អារម្មណ៍ ។ លោកអភិបាលខេត្ត បានលើកឡើងបែបនេះ ក្នុងកិច្ចប្រជុំគណៈបញ្ជាការឯកភាពខេត្ដ កាលពីរសៀលថ្ងៃទី៩ ខែមករា នៅសាលប្រជុំសាលាខេត្តបន្ទាយមានជ័យ ។
គេបានដឹងថា ក្នុងកិច្ចប្រជុំនេះលោក សួន បវរ អភិបាលខេត្ត និងជាប្រធានគណៈបញ្ជាការឯកភាពខេត្តបន្ទាយមានជ័យ បានលើកឡើងថា កាលពីថ្ងៃទី២២ ខែធ្នូ ឆ្នាំ២០១៦ នៅច្រកទ្វារអន្តរជាតិប៉ោយប៉ែត មានករណីលោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគបាលអន្ដោប្រវេសន៍ប្រចាំច្រកទ្វារអន្តរជាតិប៉ោយប៉ែត បានចោទប្រកាន់លោក ឌិន ពុទ្ធី ប្រធានសមាគមសេដ្ឋកិច្ចក្រៅប្រព័ន្ធ បើករថយន្តបុកបណ្តាលឱ្យរបួសភ្លៅស្តាំ និងដួលសន្លប់ ។
អាជ្ញាធរបានលើកឡើងថា ជនរងគ្រោះដែលជាមន្ត្រីនគរបាល ត្រូវបានបញ្ជូនទៅមន្ទីរពេទ្យនៅប្រទេសថៃ ។ ភ្លាមៗនោះដែរ នគរបាលអន្តោប្រវេសន៍បានឃាត់ខ្លួនលោក ឌិន ពុទ្ធី ប្រគល់ឲ្យទៅនគរបាលខេត្តបញ្ជូនទៅសាលាដំបូង ។ លោក ឌិន ពុទ្ធី ត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស ហើយត្រូវបានឃុំខ្លួនបណ្ដោះអាសន្នក្នុងពន្ធនាគារ ។ នៅថ្ងៃទី២៩ ខែធ្នូ ឆ្នាំ២០១៦ សាច់ញាតិនិងប្រជាពលរដ្ឋបាននាំគ្នាតវ៉ានៅច្រកទ្វារអន្តរជាតិប៉ោយប៉ែត ដែលប៉ះពាល់ដល់សណ្តាប់ធ្នាប់និងសន្តិសុខនៅច្រកទ្វារអន្តរជាតិប៉ោយប៉ែត ។
លោកអភិបាលខេត្ត សួន បវរ បានលើកឡើងថា ដើម្បីឱ្យមានភាពស្ងប់ស្ងាត់ ថ្នាក់ដឹកនាំបានឱ្យលោកស័ក្តិ៤ ឈាន ពិសិដ្ឋ ដែលកំពុងស្ថិតនៅប្រទេសថៃ ត្រូវមកធ្វើការដោះស្រាយ និងសម្របសម្រួលជាមួយលោក ឌិន ពុទ្ធីដើម្បីបញ្ចប់រឿង ។ ជាមួយនេះ ដើម្បីឱ្យប្រជាពលរដ្ឋស្ងប់អារម្មណ៍ គឺលោកស័ក្តិ៤ ឈាន ពិសិដ្ឋ អនុប្រធានប៉ុស្តិ៍នគរបាលអន្ដោប្រវេសន៍ច្រកទ្វារអន្តរជាតិប៉ោយប៉ែត អាចមានការផ្លាស់ប្តូរចេញទៅធ្វើការនៅកន្លែងផ្សេង ។
សូមបញ្ជាក់ថា ជុំវិញរឿងរ៉ាវរថយន្តបុកប៉ូលិសនេះបានធ្វើឱ្យមានការចាប់អារម្មណ៍ជាខ្លាំងនៅចុងឆ្នាំ២០១៦ ៕
ចែករំលែកព័តមាននេះ