ខេត្តសៀមរាប ៖ ប្រទេសកម្ពុជាទទួលបានសិទិ្ធរៀបចំធ្វើជាម្ចាស់ផ្ទះប្រកួតកីឡាវ៉ូវីណាម ជ្រើសរើសជើងឯកអាស៊ីអាគ្នេយ៍ប្រចាំឆ្នាំ២០១៧ នៅលើទឹកដីនៃខេត្តសៀមរាប ដែលការប្រកួតនេះមានរយៈពេល២ថ្ងៃចាប់ពីថ្ងៃទី១៣ដល់១៤ មករា ។
លោកឧកញ៉ារ័ត្ន សុខន អនុប្រធានសហព័ន្ធកីឡាវ៉ូវីណាមពិភពលោក ប្រធានសហព័ន្ធកីឡាវ៉ូវីណាមអាស៊ីអាគ្នេយ៍ និងជាប្រធានសហព័ន្ធកីឡាវ៉ូវីណាមកម្ពុជាបានឱ្យដឹងថា សម្រាប់ការប្រកួតលើកនេះ មានបណ្ដាប្រទេសជាសមាជិកចូលរួមចំនួន៧ ក្នុងនោះមានកម្ពុជាជាម្ចាស់ផ្ទះ ថៃ វៀតណាម ឡាវ ឥណ្ឌូណេស៊ី មីយ៉ាន់ម៉ា និងហ្វ៊ីលីពីន ។ ប៉ុន្តែបើតាមការឱ្យដឹងពីមន្ត្រីរៀបចំការប្រកួតថា ហ្វ៊ីលីពីនប្រហែលជាត្រូវអាក់ខានវិញ ដោយសារតែប្រទេសរបស់គេជួបបញ្ហាខ្យល់ព្យុះ ។ ទោះបីយ៉ាងណា លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាថា ប្រទេសហ្វ៊ីលីពីនបានបញ្ជូនតំណាងរបស់គេមកចូលរួមក្នុងឋានៈជាអ្នកសង្កេតការណ៍ ។
នៅក្នុងពិធីបើកការប្រកួតកាលពីព្រឹកថ្ងៃទី១៣ ខែមករា កន្លងមកនេះ យោងតាមរបាយការណ៍ឱ្យដឹងថា ប្រទេសទាំង៧ដូចរៀបរាប់ខាងលើបានបញ្ជូនប្រតិភូកីឡារបស់ខ្លួនមកចូលរួមប្រកួតសរុបទាំងអស់១៣០នាក់ ក្នុងនោះប្រតិភូកីឡាកម្ពុជាមានចំនួន២៣នាក់ ។ ចំណែកវិញ្ញាសាដែលដាក់ឱ្យប្រកួតមានចំនួន២៦ ក្នុងនោះវិញ្ញាសាប្រយុទ្ធមាន៩ ក្រៅពីនោះជាវិញ្ញាសាសម្ដែងទាំងអស់។
លោកឧកញ៉ា រ័ត្ន សុខន ធ្លាប់មានប្រសាសន៍រួចមកហើយថា បានជាលោករៀបចំធ្វើព្រឹត្តិការណ៍នេះនៅខេត្តសៀមរាប ដោយសារតែលោកចង់ទាក់ទាញភ្ញៀវទេសចរឱ្យមកលេងនៅប្រទេសយើងឱ្យបានច្រើន ។ មួយវិញទៀត ខេត្តសៀមរាបជាតំបន់ទេសចរណ៍សម្បូរទៅដោយប្រាង្គប្រាសាទបុរាណល្បីៗដែលជាស្នាដៃដូនតាខ្មែរបន្សល់ទុកឱ្យ ។
លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ធ្លាប់មានប្រសាសន៍ថា កីឡាផ្សាភ្ជាប់ទៅនឹងវិស័យទេសចរណ៍ ។ ជារៀងរាល់ឆ្នាំក្រសួងទេសចរណ៍ និងគណៈកម្មាធិ
ការជាតិអូឡាំពិកកម្ពុជា តែងតែរៀបចំឱ្យមានព្រឹត្តិការណ៍ប្រកួតកីឡានៅតាមតំបន់ទេសចរណ៍ ដែលមានសក្ដានុពលនានា ដើម្បីទាក់ទាញភ្ញៀវទេសចរជាតិ និងអន្តរជាតិឱ្យគេបានស្គាល់ និងមកលេងកម្សាន្ដតាមតំបន់ទេសចរណ៍ទាំងនោះកាន់តែច្រើន ៕
ចែករំលែកព័តមាននេះ