រាជធានីភ្នំពេញ៖ អគ្គនាយកដ្ឋានពន្ធដារក្នុងរយៈពេល១២ខែ ឆ្នាំ២០១៦ ប្រមូលចំណូលពន្ធអាករគ្រប់ប្រភេទបាន ៥.៩៨៨.៧០៥,២៥លានរៀល (ប្រមាណ១.៤៩៧,១៨លានដុល្លារ) ស្មើនឹង១០៥,៣២% បង់ចូលថវិកាជាតិ ។
នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ នៅក្នុងកិច្ចប្រជុំបូកសរុបលទ្ធផលគ្រប់គ្រងប្រមូលចំណូលប្រចាំខែធ្នូ និងប្រចាំឆ្នាំ២០១៦ របស់អគ្គនាយកដ្ឋានពន្ធដារ ក្រោមអធិបតីភាពលោកទេសដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ព្រមទាំងវត្តមានចូលរួមពីលោក ជូ វិជិត្ត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ។
សេចក្តីប្រកាសព័ត៌មានបានឲ្យដឹងទៀតថា សម្រាប់ខែធ្នូ ឆ្នាំ២០១៦ អគ្គនាយកដ្ឋានពន្ធដារប្រមូលពន្ធអាករគ្រប់ប្រភេទបានចំនួន៣៥០.២១៧,៧៩លានរៀល(ប្រមាណជា៨៧,៥៥លានដុល្លារ)។
ដោយឡែក ក្នុងរយៈពេល១២ខែ ឆ្នាំ២០១៦ ចំណូលពន្ធអាករគ្រប់ប្រភេទ ដែលអគ្គនាយកដ្ឋានពន្ធដារប្រមូលបានមានចំនួន៥.៩៨៨.៧០៥,២៥លានរៀល (ប្រមាណ
១.៤៩៧,១៨លានដុល្លារ) ស្មើនឹង១០៥,៣២% នៃផែនការ ក្នុងនោះថវិកាថ្នាក់ជាតិប្រមូលបានចំនួន ៥.២៤០.២០៨,៤៤លានរៀល (ប្រមាណជា១.៣១០,០៥លានដុល្លារ) ថវិការដ្ឋបាលថ្នាក់ក្រោមជាតិបានចំនួន៧៤៨.៤៩៦,៨១លានរៀល (ប្រមាណជា១៨៧,១២លានដុល្លារ) ។
ប្រសិនបើប្រៀបធៀបនឹងការអនុវត្តឆ្នាំ២០១៥ ឃើញថា ការអនុវត្តប្រមូលចំណូលពន្ធអាករគ្រប់ប្រភេទសម្រាប់ឆ្នាំ២០១៦ កើនឡើងចំនួន៧៧៨.៤៨៣,១៩លានរៀល (ប្រមាណជា១៩៤,៦២លានដុល្លារ) ឬស្មើនឹងអត្រាកំណើន១៤,៩៤% ។ បើប្រៀបធៀបនឹងផែនការឆ្នាំ២០១៥ ឃើញថា ការអនុវត្តប្រមូលពន្ធឆ្នាំ២០១៦ កើនឡើង៣៣២,៣០ លានដុល្លារអាមេរិក ឬស្មើនឹងអត្រាកំណើន ២៨,៥% ។
ក្នុងឆ្នាំ២០១៦ អគ្គនាយកដ្ឋានពន្ធដារសង្កេតឃើញថា មានការកើនឡើងផងដែរ នូវចំណូលពន្ធអាករតាមប្រភេទពន្ធ និងសកម្មភាពអាជីវកម្មសំខាន់ៗមួយចំនួនដូចជាពន្ធ
លើប្រាក់ចំណេញកើនឡើង១៨,៤% ពន្ធលើប្រាក់បៀវត្សរ៍កើនឡើង២០% អាករលើតម្លៃបន្ថែមកើនឡើង១៥,២% និងអាករពិសេសកើនឡើង២៣,៤%។ ចំណែកឯចំណូលពន្ធអាករតាមសកម្មភាពអាជីវកម្ម ក៏មានការកើនឡើងស្ទើរគ្រប់ប្រភេទអាជីវកម្មដែរ ។
នៅក្នុងកិច្ចប្រជុំនេះដែរ លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំគ្រប់អង្គភាពក្រោមឱវាទអគ្គនាយកដ្ឋានពន្ធដារ ដែលបាននិងកំពុងចូលរួមយ៉ាងសកម្មក្នុងការខិតខំប្រឹងប្រែងប្រមូលចំណូល រហូតទទួលបានលទ្ធផលយ៉ាងល្អប្រសើរ ។ នេះគឺជាជោគជ័យរួមរបស់អគ្គនាយកដ្ឋានពន្ធដារ ព្រោះថា ប្រសិនបើមិនមានការចូលរួមពីគ្រប់អង្គភាពពាក់ព័ន្ធ លទ្ធផលប្រមូលចំណូលពន្ធនេះ នឹងមិនអាចសម្រេចទៅប្រកបដោយលទ្ធផលត្រចះត្រចង់បែបនេះបានឡើយ ។
ទន្ទឹមនឹងនេះ លោកទេសរដ្ឋមន្ត្រី ក៏បានផ្តល់ការណែនាំបន្ថែមដល់គ្រប់អង្គភាព ឲ្យបន្តខិតខំពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់ តែម៉ឺងម៉ាត់ផ្អែកលើទិដ្ឋភាពច្បាប់ ក្នុងការឆ្លើយតបទៅកាន់អ្នកជាប់ពន្ធ ធ្វើយ៉ាងណាឲ្យអ្នកជាប់ពន្ធសប្បាយចិត្ត មិនសម្តែងការរអ៊ូរទាំ និងផ្តល់កិច្ចសហការល្អក្នុងការបង់ពន្ធជូនរដ្ឋ ៕
ចែករំលែកព័តមាននេះ