រាជធានីភ្នំពេញ ៖ នៅព្រឹកថ្ងៃអាទិត្យ ទី១៥ ខែមករា ខានស្អែកនេះ ប្រដាល់អន្តរជាតិពេលព្រឹករបស់ស្ថានីយទូរទស្សន៍អាស៊ីអាគ្នេយ៍ នឹងបើករេញឱ្យកីឡាករជើងខ្លាំង២រូប គឺ ម៉ន វិរៈ និងមាស ច័ន្ទមាន ឡើងប៉ះថៃព្រមគ្នា ដើម្បី
រាជធានីភ្នំពេញ ៖ នៅព្រឹកថ្ងៃអាទិត្យ ទី១៥ ខែមករា ខានស្អែកនេះ ប្រដាល់អន្តរជាតិពេលព្រឹករបស់ស្ថានីយទូរទស្សន៍អាស៊ីអាគ្នេយ៍ នឹងបើករេញឱ្យកីឡាករជើងខ្លាំង២រូប គឺ ម៉ន វិរៈ និងមាស ច័ន្ទមាន ឡើងប៉ះថៃព្រមគ្នា ដើម្បីសាកវិជ្ជាគុនជូនទស្សនិកជនបានទស្សនានាថ្ងៃសម្រាកចុងសប្ដាហ៍ ។ អ្វីដែលគេកត់សម្គាល់គឺថា ការប្រកួតមួយនេះហាក់ទាក់ទាញអារម្មណ៍ទស្សនិកជនឱ្យចង់តាមដានយ៉ាងខ្លាំង ដោយសារតែកីឡាករកម្ពុជាទាំងពីរ ទើបទទួលឡើងរេញក្រោយរយាលមួយរយៈធ្វើឱ្យអ្នកគាំទ្រចង់ដឹងពីការវិវត្តសមត្ថភាពរបស់ពួកគេថា តើទៅមុខ ឬថយក្រោយ ។
ការប្រកួតដែលនឹងធ្វើឡើងចាប់ពីម៉ោង៨ព្រឹកក្រោមការរៀបចំរបស់ស្ថានីយទូរទស្សន៍អាស៊ីអាគ្នេយ៍នេះ ត្រូវគេឃើញថា នៅតែមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ បើទោះជាកម្មវិធីប្រកួតអាចនឹងចំពេលពលរដ្ឋមួយចំនួនចេញដើរកម្សាន្តសម្រាប់ថ្ងៃអាទិត្យ ឬអ្នកខ្លះចង់សម្រាកនៅផ្ទះមិនចេញដើរក្ដី ។ អ្នករៀបចំកម្មវិធីបានអះអាងថា អ្នកទស្សនានឹងមានចំនួនច្រើនដោយសារតែអ្នកដើរលេងនាថ្ងៃសៅរ៍ និងថ្ងៃអាទិត្យ មានចំនួនមិនច្រើន បើធៀបនឹងអ្នកតាមដានប្រដាល់ ។
កីឡាករកម្ពុជា២រូប គឺ ម៉ន វិរៈ និង មាស ច័ន្ទមាន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅព្រឹកថ្ងៃអាទិត្យខានស្អែក ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយ ជាពិសេសកីឡាករកម្ពុជាទាំងពីរសុទ្ធតែបានត្រៀមខ្លួនមុនពេលប៉ះគ្នា ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់ទៀតផង ។
លោក ញាណ សុធី អ្នករៀបចំកម្មវិធីប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ ម៉ន វិរៈ មកពីក្លិបការិយាល័យទី៥ កងទ័ពជើងគោក ដែលយូរៗទទួលឡើងសង្វៀនម្ដង ឱ្យឡើងប៉ះប្រកួតជាមួយកីឡាកថៃឈ្មោះ ឈួក ភីឈិត ក្នុងនាមជាគូបើកឆាកអន្តរជាតិសម្រាប់ប្រដាល់អន្តរជាតិនៅព្រឹកថ្ងៃអាទិត្យខានស្អែកនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង ។ លោកថា កីឡាករ ម៉ន វិរៈ អាចចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបលោកយល់ថា វត្តមានរបស់កីឡាកររូបនេះ អាចនឹងធ្វើឱ្យព្រឹត្តការណ៍ប្រដាល់ព្រឹកស្អែកទទួលការចាប់អារម្មណ៍ ។
លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញនាពេលកន្លងមក ទើបលោកយល់ថា ជំនួបរបស់ ម៉ន វិរៈ ជាមួយកីឡាករថៃក៏នឹងមិនធម្មតាសម្រាប់ការប្រកួតទាំងមូល ។ លោកថា កីឡាករកម្ពុជារូបនេះ មានការឈានឡើងសមត្ថភាព ហើយបើទោះជាការប្រកួតប៉ុន្មានលើកចុងក្រោយមានការប្រែប្រួល ក៏នៅតែខ្លាំងផងដែរ ។ លោកនិយាយថា ម៉ន វិរៈ ដ្បិតថា មិនមែនជាម្ចាស់ជើងឯក ប៉ុន្តែការប្រកួតកន្លងមករបស់គេមានការទទួលស្គាល់ផងដែរ ទើបលោកសម្រេចចិត្តដាក់ឱ្យប្រកួតជាមួយកីឡាករ ឈួក ភីឈិត ដែលជាជើងខ្លាំងម្នាក់ ។ កីឡាករថៃធ្លាប់ប្រកួត៦៨លើក ឈ្នះ៦១លើក និងចាញ់៧លើក ប៉ុន្តែលោកថា សមត្ថភាពរបស់កីឡាកររូបនេះមិនអាចមើលស្រាលបានឡើយ ។ ដោយឡែកកីឡាករកម្ពុជាលោកថា ធ្លាប់ប្រកួត១៣៩លើក ឈ្នះ១២២លើក ចាញ់១៦លើក និងស្មើ១លើក។
សម្រាប់កីឡាករ មាស ច័ន្ទមាន ដែលជាម្ចាស់ខ្សែក្រវាត់មកពីក្លិបក្រសួងការពារជាតិ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីប្រទេសថៃដូចគ្នាឈ្មោះ ឌេន ភីឈិត នៅក្នុងព្រឹត្តិការណ៍ប្រដាល់អន្តរជាតិនោះដែរ ។ លោកថា ការប្រកួតរបស់គូនេះនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែល មាស ច័ន្ទមាន ដ្បិតថា ល្បីឈ្មោះតែការប្រកួតពេលខ្លះក៏ល្អ ហើយពេលខ្លះក៏ធ្លាក់ដៃដែលធ្វើឱ្យអ្នកគាំទ្រពិបាកស្ទង់សម្រាប់សមត្ថភាពចុងក្រោយរបស់គេ ។ កីឡាករថៃធ្លាប់ប្រកួត៧៨លើក ឈ្នះ៦៥លើក ចាញ់១២លើក និងស្មើ១លើក រីឯកីឡាករកម្ពុជា ធ្លាប់ប្រកួត១១៧លើក ឈ្នះ៨៩លើក ចាញ់២៥លើក និងស្មើ៣លើក នៅលើសង្វៀន។
ដោយឡែកនៅលើសង្វៀនទូរទស្សន៍ប៉ុស្ដិ៍លេខ៥ ជ្រោយចង្វាឯណោះវិញ ក៏មានការប្រកួតដ៏សំខាន់ចាញ់ធ្លាក់ៗផងដែរ នៅក្នុងព្រឹត្តិការណ៍ TV5 Knock Out Series ក្នុងវគ្គ១៦នាក់យក៨នាក់សប្ដាហ៍ទី១ នៅថ្ងៃសៅរ៍ស្អែកនេះចាប់ពីម៉ោង៥ល្ងាចតទៅ ៕
ចែករំលែកព័តមាននេះ