អាជីវកម្មយកថ្មភ្នំឈើកាច់ សង្ស័យអនាធិបតេយ្យ
ខេត្តព្រៃវែង ៖ បច្ចុប្បន្ននេះ គេសង្កេតឃើញក្រុមឈ្មួញកំពុងសម្រុកធ្វើសកម្មភាពកាយយកថ្មភ្នំនៅលើភ្នំឈើកាច់ និងដឹកជញ្ជូនចេញតាមរថយន្តធំៗរាប់រយឡានក្នុង១ថ្ងៃៗ …
ខេត្តព្រៃវែង ៖ បច្ចុប្បន្ននេះ គេសង្កេតឃើញក្រុមឈ្មួញកំពុងសម្រុកធ្វើសកម្មភាពកាយយកថ្មភ្នំនៅលើភ្នំឈើកាច់ និងដឹកជញ្ជូនចេញតាមរថយន្តធំៗរាប់រយឡានក្នុង១ថ្ងៃៗ ខ្លះមានច្បាប់ ខ្លះក៏អត់ច្បាប់ ប៉ុន្តែពួកគេនៅតែអាចធ្វើសកម្មភាពបានជារៀងរាល់ថ្ងៃ ខណៈដែលមន្ត្រីជំនាញបានត្រឹមតែប្រាប់អ្នកកាសែតថា ចាំចុះទៅមើល ប៉ុន្តែជាក់ស្តែងគឺស្ងាត់ឈឹង មិនឃើញចុះទៅមើលសោះ ច្រើនថ្ងៃហើយ មិនដឹងហេតុអ្វី0x017d7
ប្រភពពីអ្នកស្រុកដែលរកស៊ីវាយថ្មភ្នំនៅលើភ្នំឈើកាច់បានប្រាប់ឲ្យដឹងថា នៅលើភ្នំនោះមានក្រុមហ៊ុនចំនួន៤ ដែលទទួលបានអាជ្ញាប័ណ្ណធ្វើអាជីវកម្មយកថ្មភ្នំពីក្រសួង គឺក្រុមហ៊ុន លឹម ហុង, ក្រុមហ៊ុន ផុន ផលិត, ក្រុមហ៊ុនឡេង ហួ និង ក្រុមហ៊ុន ឡុង ណាំ ហើយក្រៅពីនេះនៅមានក្រុមហ៊ុនមួយចំនួនទៀត ដែលកំពុងធ្វើអាជីវកម្មយកខ្សាច់ភ្នំនៅតាមជើងភ្នំឈើកាច់ដែរ ។ ភាគច្រើនសកម្មភាពរបស់ក្រុមហ៊ុនទាំងនោះ គឺធ្វើមិនចំគោលដៅដែលបានកំណត់នៅក្នុងអាជ្ញាបណ្ណ័នោះទេ គឺគេដើរជីកយកគ្រប់កន្លែង ដោយប្រើរូបភាពទិញយកដីពីប្រជាពលរដ្ឋនៅជុំវិញជើងភ្នំនោះ ទាំងដែលសកម្មភាពបែបនេះគឺខុសច្បាប់ទាំងស្រុង ប៉ុន្តែគេមិនដែលឃើញខាងមន្ទីររ៉ែ និងថាមពលខេត្តព្រៃវែង មានវិធានការហាមឃាត់ ឬផាកពិន័យនោះទេ ។
ដោយឡែកក្រុមហ៊ុនដែលមានអាជ្ញាប័ណ្ណ និងកំពុងធ្វើសកម្មភាពត្រឹមត្រូវនោះបានលួចបង្ហើបប្រាប់ឲ្យដឹងថា ការពិតក្រុមហ៊ុនដែលទទួលបានអាជ្ញាប័ណ្ណធ្វើអាជីវកម្មយកថ្មភ្នំនៅលើភ្នំឈើកាច់នេះមានចំនួន៥ក្រុមហ៊ុន ប៉ុន្តែកាលពីប៉ុន្មានខែមុននេះ មានក្រុមហ៊ុន១ដែលគេមិនបានចាំឈ្មោះបានគេចមិនព្រមបង់ពន្ធសួយសារអាករចូលរដ្ឋ២/៣ឆ្នាំជាប់គ្នា ហើយត្រូវក្រសួងចាប់បង្ខំឲ្យបង់ផាកពិន័យជិត១០ម៉ឺនដុល្លារ ប៉ុន្តែម្ចាស់ក្រុមហ៊ុននោះមិនព្រមបង់ ទើបត្រូវក្រសួងសម្រេចលុបអាជ្ញាប័ណ្ណចោលតែម្តង ។ តែទោះជាយ៉ាងណាក៏ដោយ ថ្មីៗនេះគេបានឮដំណឹងមកថា ម្ចាស់ក្រុមហ៊ុននោះគេមានខ្សែនៅក្រសួង ហើយពេលនេះគេកំពុងតែរត់ការសុំអាជ្ញាប័ណ្ណថ្មី ដោយប្រើឈ្មោះក្រុមហ៊ុនថ្មី ។ មានការរិះគន់ថា បើគេធ្វើបែបនោះបានមែននោះ គឺវាមិនយុត្តិធម៌ទេសម្រាប់ក្រុមហ៊ុនផ្សេងទៀតដែលគេរកស៊ីបង់ពន្ធចូលរដ្ឋត្រឹមត្រូវនោះ ។
ចំណែកខាងមន្ត្រីមូលដ្ឋានវិញ ក៏បានបង្ហើបប្រាប់ឲ្យដឹងដែរថា នៅលើភ្នំនោះមានក្រុមហ៊ុន១ក្នុងចំណោម៤ គឺក្រុមហ៊ុន ឡុង ណាំ ដែលបានធ្វើសកម្មភាពយកថ្មភ្នំ និងយកខ្សាច់ភ្នំខុសទីតាំងអាជ្ញាប័ណ្ណ ដោយប្រើរូបភាពទិញពីអ្នកស្រុកដែលនៅជិតនោះ ហើយកន្លងទៅថ្មីៗនេះសកម្មភាពជីកយកខ្សាច់ភ្នំរបស់ក្រុមហ៊ុន ឡុង ណាំ ក៏បានធ្វើឲ្យបាក់ដីប៉ះពាល់ដល់ដីចម្ការ និងផ្ទះសម្បែងអ្នកស្រុកនៅក្បែនោះជាច្រើនគ្រួសារផងដែរ ដោយសារតែគេធ្វើសកម្មភាពជីកយកខ្សាច់ភ្នំនោះនៅកៀកជាប់ដីចម្ការ និងផ្ទះអ្នកស្រុកខ្លាំងពេក ប៉ុន្តែរហូតមកដល់ពេលនេះ ក្រុមហ៊ុន ឡុង ណាំ បានធ្វើការដោះស្រាយសងសំណងដល់អ្នកស្រុករួចរាល់អស់ហើយ គឺនៅសល់តែខាងមន្ទីរជំនាញរ៉ែ និងថាមពលខេត្ត ដែលគេមិនទាន់ឃើញចាត់វិធានការអ្វីទេចំពោះសកម្មភាពខុសច្បាប់នេះ ៕
ចែករំលែកព័តមាននេះ