រាជធានីភ្នំពេញ ៖ នៅថ្ងៃអាទិត្យ ទី១៥ ខែមករា ខានស្អែកនេះ កីឡាករ ឡុង ជិន មកពីក្លិបខ្លារខិនមានរិទ្ធ និងកីឡាករ លាស់ ឃីន មកពីក្លិបតាព្រហ្មមានជ័យ នឹងជួបប្រកួតជាមួយកីឡាករបរទេសនៅលើសង្វៀន
រាជធានីភ្នំពេញ ៖ នៅថ្ងៃអាទិត្យ ទី១៥ ខែមករា ខានស្អែកនេះ កីឡាករ ឡុង ជិន មកពីក្លិបខ្លារខិនមានរិទ្ធ និងកីឡាករ លាស់ ឃីន មកពីក្លិបតាព្រហ្មមានជ័យ នឹងជួបប្រកួតជាមួយកីឡាករបរទេសនៅលើសង្វៀនទូរទស្សន៍អីុអិនស៊ី ។ អ្នកនិយមទស្សនាកីឡាករប្រដាល់ជាច្រើននាក់កំពុងរង់ចាំអ៊ុតមើលថា តើកីឡាករកម្ពុជាទាំងពីរអាចសម្រេចគោលដៅ ឬយ៉ាងណា ខណៈកីឡាករបរទេសដែលពួកគេត្រូវជួបនាពេលនេះ ហាក់ដូចមានសមត្ថភាពពិបាកផ្ដួលអីុចឹងនោះ ។
ការប្រកួតនៅថ្ងៃខានស្អែក ឡុង ជិន នឹងជួបប្រកួតជាមួយកីឡាករថៃឈ្មោះ វ៉ាត់ ឆារ៉ាក់ដេត ស.ដានឆ័យ ក្នុងប្រភេទទម្ងន់៥៧គីឡូក្រាម ។
ឡុង ជិន ធ្លាប់ប្រកួត៣៧ដង ឈ្នះ២៨ដង ចាញ់៦ដង ស្នើ៣ដង និងធ្លាប់ផ្ដួលគូប្រកួតឱ្យសន្លប់បាន៧ដង ក្នុងពេលកីឡាករថៃធ្លាប់៨៧ដង ឈ្នះ៦៥ដង ចាញ់១៧ដង ស្នើ៥ដង និងធ្លាប់ផ្ដួលគូប្រកួតឱ្យសន្លប់២០ដង ។ បើមើលលើប្រវត្ដិប្រកួតខុសគ្នាដាច់ឆ្ងាយបែបនេះ ឡុង ជិន ប្រហែលជាយ៉ាប់បន្ដិចហើយ ព្រោះកីឡាករថៃរូបនេះ គឺជាជើងខ្លាំងមួយរូបដែលគេគិតថា ពិបាកយកឈ្នះបំផុត ។
ចំណែក លាស់ យីន ជួបប្រកួតជាមួយកីឡាករថៃ រើងណយ វ៉ប៉ាន់វ៉ៃ ក្នុងប្រភេទទម្ងន់៦០គីឡូក្រាម ។ លាស់ យីន ធ្លាប់ប្រកួត៨៩ដង ឈ្នះ៥៧ដង ចាញ់២៧ដង ស្នើ៥ដង និងធ្លាប់ផ្ដួលគូប្រកួតឱ្យសន្លប់បាន៩ដង ក្នុងពេលកីឡាករថៃ ធ្លាប់ប្រកួត៨៨ដង ឈ្នះ៦០ដង ចាញ់២៥ដង ស្នើ៣ដង និងធ្លាប់ផ្ដួលគូប្រកួតឱ្យសន្លប់បាន៥ដង ។ ចាំមើលលាស់ ឃីន អាចយកឈ្នះកីឡាករថៃបានដោយរបៀបណា ?
ចំណែកគូប្រកួតមិត្ដភាពវិញ កីឡាករ ហូ សុភា មកពីក្លិបឃ្លាំងមឿងកីឡា ប្រកួតជាមួយកីឡាករ ធា វាសនា មកពីក្លិបរាជសីហ៍ខេត្ដរតនគិរី ។ កីឡាករ នឹម នន មកពីក្លិបកងទ័ពពិសេសឆត្រយោង៩១១ ប្រកួតជាមួយកីឡាករ សយ សី មកពីក្លិបពន្លឺវីបុល និងគូចុងក្រោយកីឡាករ ខាំ ខាវ មកពីក្លិបរ៉ាហាប់ស្វាយប៉ាក ប្រកួតជាមួយកីឡាករ ជា កំសត់ មកពីក្លិបកងពលតូចលេខ៧០ ៕
ចែករំលែកព័តមាននេះ