លោក Jack Ma ជាម្ចាស់ក្រុមហ៊ុន eCommerce ដែលធំបំផុតក្នុងប្រទេសចិន ឈ្មោះថា Alibaba ។ រឿងដែលមិនគួរឱ្យជឿ គឺក្រុមហ៊ុន Alibaba មានភាគហ៊ុនខ្ពស់បំផុតក្នុងប្រវត្តិសាស្ត្រសកលលោក ។ កាលពីមុន មុខរបររបស់លោកត្រឹមតែជាគ្រូបង្រៀនភាសាអង់គ្លេសម្នាក់ និងទទួលបានប្រាក់តែ១២ដុល្លារប៉ុណ្ណោះក្នុង១ថ្ងៃ ប៉ុន្តែបែរជាលោកក្លាយជាមហាសេដ្ឋីដែលមានបំផុតក្នុងប្រទេសចិនទៅវិញ ។ តើលោកឆ្លងកាត់រឿងរ៉ាវអ្វីខ្លះ ?
ភាពជោគជ័យរបស់ Jack Ma ជារឿងដែលមិនគួរឱ្យជឿ ប្រសិនបើពិចារណាពីចំណុចចាប់ផ្តើមដែលគ្មានអ្វីសោះរបស់លោក រួមទាំងការខ្វះខាតប្រាក់កាស ធនធាន និងអ្វីជាច្រើនផ្សេងទៀត ខណៈដែលលោកត្រូវជួបនឹងឧបសគ្គជាច្រើនជាងមនុស្សភាគច្រើន។ លោកទទួលការបរាជ័យមកអស់រាប់សិបដង តែក៏អាចឆ្លងកាត់បាន និងមកឈរត្រង់ចំណុចនេះ ដែលគួរឱ្យកោតសរសើរយ៉ាងខ្លាំង ។ ខាងក្រោមនេះជាឧបសគ្គធំៗទាំង៧ចំណុចដែល Jack Ma ធ្លាប់យកឈ្នះលើវាបាន ប្រៀបដូចជាតួអង្គ Forest Gump (តួសម្តែងកុនក្នុងរឿង Forest Gump) អីចឹងដែរ ។
១-គាត់មិនធ្លាប់ចុះចាញ់ ទោះបីជាគាត់បានប្រឡងធ្លាក់ជាញឹកញាប់ក្នុងសាលារៀនក្តី ៖
Jack Ma មិនមែនជាសិស្សរៀនពូកែទេ ការពិត គាត់ប្រឡងចូលរៀននៅមធ្យមសិក្សាមិនជាប់ម្តងហើយម្តងទៀត ។
« នៅពេលរៀននៅបឋមសិក្សា ខ្ញុំប្រឡងធ្លាក់រហូតដល់២ដង ហើយនៅមធ្យមសិក្សា ធ្លាក់៣ដង រួមទាំងប្រឡងចូលសាកលវិទ្យាល័យ ខ្ញុំបានប្រឡងធ្លាក់២ដងទៀត » ។ នេះជាសម្ដីលោក Jack Ma ។
ប៉ុន្តែបើមើលទៅក៏មិនមែនមានតែលោក Jack Ma ម្នាក់នោះទេ បុគ្គលជោគជ័យជាច្រើនក៏ជួបនឹងបញ្ហាដូចគ្នានេះដែរ តួយ៉ាងដូចជា លោក Albert T, លោក Ein Stein, លោក Winston Churchill និងលោក Abraham Lincoln ជាដើម ពួកគេសុទ្ធតែបានតស៊ូក្នុងជីវិតកាលពីកុមារទាំងអស់ ។
២-ប្រឡងផ្នែកគណិតវិទ្យាបានតែ១ពិន្ទុ នៃពិន្ទុសរុប១២០ ៖
បន្ទាប់ពីលោក Jack Ma បានប្រឡងធ្លាក់ហើយ គាត់ថែមទាំងទទួលបានពិន្ទុតិចជាង១% ក្នុងពេលប្រឡងចូលសាកលវិទ្យាល័យ។ វាមិនមែនដោយសារតែគាត់គ្មានពេលវេលាត្រៀមខ្លួនអានសៀវភៅនោះទេ តែលោក Jack Ma ជាមនុស្សមានបញ្ហាជាមួយផ្នែកគណិតវិទ្យាតាំងពីក្មេងមក ហើយមិនគួរឱ្យជឿដែលក្រុមហ៊ុន Alibabaរបស់គាត់ ជាក្រុមហ៊ុនពាក់ព័ន្ធនឹងផ្នែកបច្ចេកវិទ្យា ។
« ខ្ញុំជាមនុស្សមិនពូកែខាងគណិតវិទ្យាទេ ហើយក៏មិនធ្លាប់រៀនផ្នែកគ្រប់គ្រងដែរ ។ សព្វថ្ងៃនេះ ខ្ញុំពិនិត្យរបាយការណ៍គណនេយ្យមិនដឹងរឿងឡើយ » ។ នេះបើតាមលោក Jack Ma ។
សរុបមក មនុស្សយើងមិនចាំបាច់ពូកែខាងគណិតវិទ្យា ក៏អាចក្លាយជាសេដ្ឋីបានដែរ ។ កាលពីកុមារភាពរបស់ Jack Ma គាត់មិនធ្លាប់ឮពាក្យថា កុំព្យូទ័រឡើយ ។
៣-ត្រូវសាកលវិទ្យាល័យ Harvard បដិសេធជាង១០ដង តែគាត់មិនព្រមចុះចាញ់ ៖
វាមិនមែនជារឿងប្លែកឡើយ ដែលសាកលវិទ្យាល័យ Harvard នាំមុខគេខាងបដិសេធនោះ ព្រោះអ្នកណាក៏ដឹងថា សាកលវិទ្យាមួយនេះពិបាកនឹងចូលរៀនណាស់ ហើយស្របនឹងលោក Jack Ma ជាក្មេងដែលរៀនមិនឆ្លាតទៀត ។ រឿងដែលចម្លែក គឺគាត់បានដាក់ពាក្យស្នើសុំជាង១០ដង ត្រូវគេបដិសេធទាំងជាង១០ដង ។ នេះបញ្ជាក់ឱ្យឃើញថា Jack Ma ជាមនុស្សដែលជម្នះ និងមានភាពអត់ធ្មត់ខ្ពស់ផងដែរ ។ នេះហើយជាចំណុចសំខាន់ដែលបុគ្គលជោគជ័យត្រូវមាន ។
ចុងបញ្ចប់ គាត់ក៏បានចូលរៀននៅសាកលវិទ្យាល័យ Hangzhou Normal University ផ្នែកភាសាអង់គ្លេស ។
៤-ត្រូវក្រុមហ៊ុនជាង៣០កន្លែងបដិសេធ ៖
ក្រោយពីលោក Jack Ma រៀនចប់ គាត់ស្វែងរកការងារធ្វើមិនបានឡើយ ។ គាត់បានដាក់ពាក្យជាង៣០ក្រុមហ៊ុន ក៏ប៉ុន្តែគាត់ត្រូវគេបដិសេធទាំងអស់ ។ គាត់ធ្លាប់ដាក់ពាក្យធ្វើជាប៉ូលិស តែបន្ទាប់ពីដាក់ពាក្យមួយរំពេច គាត់ក៏បានទទួលការឆ្លើយតបមកវិញភ្លាមៗថា អ្នកមិនល្អគ្រប់គ្រាន់ ។ តែគាត់ជាមនុស្សដែលមិនគិតនឹងចុះចាញ់ឡើយ ដូចជាវីរបុរសរបស់គាត់ក្នុងរឿង Forest Gump ។
លោក Jack Ma បាននិយាយថា ៖ «ថ្ងៃនេះអ្នកជួបរឿងអាក្រក់ ថ្ងៃស្អែកកាន់តែអាក្រក់ជាងនេះទៀត តែថ្ងៃខានស្អែក អ្នកនឹងជួបរឿងល្អ » ។
៥-Jack Ma ស្ម័គ្រចិត្តធ្វើការជាបុគ្គលិក KFC ហើយជាអ្នកចូលសម្ភាសន៍តែម្នាក់គត់ ដែលគេបដិសេធក្នុងចំណោមមនុស្ស២៤នាក់ ៖
ក្នុងចំណោមបេក្ខជនចូលសម្ភាសន៍បម្រើការងារនៅ KFC ទាំងអស់២៤នាក់ Jack Ma ជាមនុស្សតែម្នាក់គត់ដែលត្រូវគេបដិសេធ បន្ទាប់ពីឃើញរូបរាងខាងក្រៅរបស់គាត់
(មាឌតូច) ។
ភរិយារបស់គាត់ ឈ្មោះ Zhang Ying (នាងបានរៀបការជាមួយ Jack Ma មុនពេលដែលគាត់ក្លាយជាមនុស្សមានឋានៈ មុខតំណែង) នាងនិយាយថា ៖ « ខ្ញុំមិនចាប់អារម្មណ៍លើរូបរាងខាងក្រៅរបស់គាត់ទេ អ្វីដែលខ្ញុំលង់ស្រឡាញ់គាត់ ពីព្រោះថា គាត់អាចធ្វើបានច្រើនយ៉ាងដែលអ្នកមានមុខមាត់ស្អាតធ្វើមិនបាន » ។
៦-បញ្ចុះបញ្ចូលឱ្យ Silicon Valley បណ្តាក់ទុនជាមួយ Alibaba មិនបានសម្រេច ៖
បន្ទាប់ពីគាត់បានបង្កើតក្រុមហ៊ុន Alibaba បានហើយ គាត់នៅតែជួបនឹងឧបសគ្គជាច្រើនដូចដើម ។ ក្រុមហ៊ុនរបស់គាត់មិនបានទទួលប្រាក់ចំណេញឡើយក្នុងរយៈពេល៣ឆ្នាំដំបូង។ នៅពេលបង្កើតក្រុមហ៊ុនថ្មីៗ គាត់បានពង្រីកខ្លួនខ្លាំងពេក ហើយស្ទើរតែត្រូវបិទក្រុមហ៊ុន ព្រោះតែស្ថានភាពសេដ្ឋកិច្ចមិនរឹងមាំនាពេលនោះ នៅរយៈពេល១៨ខែទៀត Alibaba នឹងត្រូវក្ស័យធន ។
៧-Jack Ma ប្រាប់ភាគហ៊ុនទាំង១៨នាក់របស់គាត់ថា «នឹងគ្មាននរណាម្នាក់បានតំណែងជាអ្នកគ្រប់គ្រងឡើយ» ៖
លោក Jack Ma និយាយថា កំហុសឆ្គងធំបំផុតដែលគាត់ធ្លាប់បង្កើតឡើងគឺ គាត់ប្រាប់ទៅសមាជិកក្រុមដែលរួមគ្នាបង្កើតក្រុមហ៊ុន Alibaba ថា ៖ «នឹងគ្មាននរណាម្នាក់បានទទួលតំណែងធំជាងអ្នកចាត់ការឡើយ» ដោយសារតែគាត់មានផែនការជួលអ្នកគ្រប់គ្រងពីកន្លែងផ្សេងមកមើលការខុសត្រូវក្រុមហ៊ុន Alibaba ជំនួស ។
លោក Jack Ma និយាយថា ៖ « អ្វីដែលខ្ញុំបានរៀនសូត្រក្នុងពេលក្រុមហ៊ុន Alibaba ចុះខ្សោយ គឺអ្នកត្រូវអភិវឌ្ឍន៍ក្រុមការងាររបស់ខ្លួនឱ្យមានគុណតម្លៃ មានគំនិតច្នៃប្រឌិតថ្មី និងចក្ខុវិស័យ » ៕
ចែករំលែកព័តមាននេះ