ប្រទេសវៀតណាម ៖ ការនាំចេញអង្ករពីវៀតណាមនៅឆ្នាំមុនបានកើនឡើងក្នុងកម្រិតទាបបំផុត គិតចាប់ពីឆ្នាំ២០០៩មក ។ ក្រុមអ្នកជំនាញបានព្រមានពីនិន្នាការទីផ្សារ ដែលគ្មានលក្ខណៈអំណោយផល ។
ប្រទេសវៀតណាម ៖ ការនាំចេញអង្ករពីវៀតណាមនៅឆ្នាំមុនបានកើនឡើងក្នុងកម្រិតទាបបំផុត គិតចាប់ពីឆ្នាំ២០០៩មក ។ ក្រុមអ្នកជំនាញបានព្រមានពីនិន្នាការទីផ្សារ ដែលគ្មានលក្ខណៈអំណោយផល ។
ការផ្គត់ផ្គង់ជាសកលមានច្រើន និងមានការប្រកួតប្រជែងកើនឡើង គឺបានដាក់សម្ពាធបន្ថែមទៀតលើក្រុមហ៊ុននាំចេញអង្កររបស់វៀតណាម ។
ការនាំចេញអង្កររបស់វៀតណាមកាលពីឆ្នាំមុនបានធ្លាក់ចុះ២៥,៨% ឬស្មើនឹង៤,៩លានតោន ជាកម្រិតទាបបំផុតគិតចាប់តាំងពីឆ្នាំ២០០៩មក ដែលធ្វើឱ្យប្រាក់ចំណូលធ្លាក់ចុះ២១,២% ឬស្មើនឹង២,២ប៊ីលានដុល្លារ ។ នេះបើតាមក្រសួងកសិកម្ម ។
ក្រសួងកសិកម្មបានកំណត់ពីការធ្លាក់ចុះនេះ ដោយសារតែគ្រោះរាំងស្ងួតអូសបន្លាយរយៈពេលយូរ និងការហូរចូលនៃទឹកប្រៃក្នុងតំបន់ដីសណ្តទន្លេមេគង្គ ដែលជាកន្លែងផលិតស្រូវជិតពាក់កណ្តាលរបស់ប្រទេសនេះ ។ ទិន្នផលស្រូវសរុបរបស់វៀតណាមបានធ្លាក់ចុះ៣,៣% ឬស្មើនឹង៤៣,៦លានតោនកាលពីឆ្នាំមុន ។
ក្រៅពីផលប៉ះពាល់យូរអង្វែងនៃលក្ខខណ្ឌអាកាសធាតុមិនល្អ ក្រុមអ្នកជំនាញឱ្យដឹងថា ការនាំចេញអង្ករក្នុងឆ្នាំនេះអាចនៅតែទាប ដោយសារតែការផ្គត់ផ្គង់យ៉ាងច្រើននៅលើទីផ្សារពិភពលោក និងការប្រកួតប្រជែងកើនឡើងក្នុងចំណោមប្រទេសនាំចេញអង្ករកំពូលរបស់ពិភពលោក ។
នាយកដ្ឋានកសិកម្មសហរដ្ឋអាមេរិកបានលើកឡើងក្នុងរបាយការណ៍ទស្សនវិស័យឆ្នាំ២០១៧ថា អង្ករក្នុងស្តុករបស់ពិភពលោក នឹងកើនឡើងដល់កម្រិតខ្ពស់បំផុតក្នុងរយៈពេល១៥ឆ្នាំ ច្រើនជាង១២០លានតោន ។ ការធ្វើពាណិជ្ជកម្មស្រូវអង្ករពិភពលោកនៅឆ្នាំ២០១៧ អាចនឹងថយចុះ២% ពី៤១,៣ ទៅ៤០,៥លានតោន ។
ក្រុមប្រឹក្សាផ្នែកធញ្ញជាតិអន្តរជាតិឱ្យដឹងថា ការនាំចេញអង្ករពីប្រទេសថៃ និងឥណ្ឌា នឹងនៅតែបន្តកើនឡើងក្នុងឆ្នាំ២០១៧នេះ ។ ប្រទេសទាំងពីរ គឺជាអ្នកផ្គត់ផ្គង់អង្ករធំជាងគេរបស់ពិភពលោក នឹងកាត់បន្ថយភាគហ៊ុនទីផ្សាររបស់វៀតណាម ។
ប្រទេសថៃគ្រោងនឹងសម្អាតស្តុកអង្កររដ្ឋរបស់ខ្លួនប្រហែល៩លានតោននៅចុងឆ្នាំនេះ ហើយអង្ករវៀតណាមនឹងមានការប្រកួតប្រជែងតិចជាងមុនក្នុងទីផ្សារសំខាន់នៅតំបន់អាស៊ី ។
ទិន្នន័យគយបង្ហាញថា ក្នុងរយៈពេលពីខែមករា ដល់ខែតុលាឆ្នាំមុន ការនាំចេញអង្កររបស់វៀតណាមបានធ្លាក់ចុះ២៥% បើធៀបនឹងរយៈពេលដូចគ្នាកាលពីឆ្នាំ២០១៥ ឬស្មើនឹង៤,៥៤លានតោន ។ ផ្ទុយទៅវិញ ប្រទេសឥណ្ឌា និងថៃមានដំណើរការយ៉ាងល្អ ។ ក្នុងអំឡុងពេលដូចគ្នានេះ ថៃបាននាំចេញអង្ករ៨,៧លានតោន កើនឡើង១,៥% បើធៀបនឹងរយៈពេលដូចគ្នាកាលពីឆ្នាំមុន ។
ទន្ទឹមនឹងនេះ ប្រទេសចិនជាអតិថិជនសំខាន់របស់វៀតណាម បានកាត់បន្ថយការនាំចូលរបស់ខ្លួន២០%ក្នុងឆ្នាំ២០១៦ ខណៈវៀតណាមបានពឹងផ្អែកលើប្រទេសនេះ ។ បរិមាណនៃការទិញរបស់ចិនមានជិត៣៥% នៃការនាំចេញសរុបពីវៀតណាម ។
ក្រុមអ្នកជំនាញនិយាយថា ដោយសារការស្តុកទុកច្រើនពេកប្រហែល៤៦,៨លានតោន ប្រទេសចិនអាចកាត់បន្ថយការនាំចូលឆ្លងកាត់ព្រំដែនពីវៀតណាម នៅត្រឹម១លានតោនប៉ុណ្ណោះក្នុងឆ្នាំនេះ ៕
ចែករំលែកព័តមាននេះ