រាជធានីភ្នំពេញ ៖ ក្នុងនាមជាផ្នែកមួយនៃក្រុមហ៊ុន Socfin Group ក្រុមហ៊ុន Socfin នៅកម្ពុជា ដែលទទួលបានការវិនិយោគលើដំណាំកៅស៊ូនៅកម្ពុជាតាំងពីឆ្នាំ២០០៨មក បានសន្យា និងប្ដេជ្ញាមិនធ្វើឱ្យប៉ះពាល់ដល់បរិស្ថាន
រាជធានីភ្នំពេញ ៖ ក្នុងនាមជាផ្នែកមួយនៃក្រុមហ៊ុន Socfin Group ក្រុមហ៊ុន Socfin នៅកម្ពុជា ដែលទទួលបានការវិនិយោគលើដំណាំកៅស៊ូនៅកម្ពុជាតាំងពីឆ្នាំ២០០៨មក បានសន្យា និងប្ដេជ្ញាមិនធ្វើឱ្យប៉ះពាល់ដល់បរិស្ថាន និងការរស់នៅរបស់ប្រជាជនក្នុងមូលដ្ឋានខ្លួនឡើយ ។
តាមសេចក្តីប្រកាសរបស់ក្រុមហ៊ុនឲ្យដឹងថា ក្រុមហ៊ុន Socfin ដែលទទួលបានការវិនិយោគលើដំណាំកៅស៊ូក្នុងខេត្តមណ្ឌលគិរី បានខិតខំធ្វើកិច្ចការរបស់ខ្លួន ដើម្បីក្លាយជាក្រុមហ៊ុនកសិឧស្សាហកម្មនាំមុខគេមួយនៅក្នុងតំបន់ត្រូពិច ។ តាំងពីចាប់ផ្តើមក្នុងឆ្នាំ២០០៨មក Socfin តែងតែបានគិតគូរជាមូលដ្ឋានអំពីការកាត់បន្ថយលើផលប៉ះពាល់បរិស្ថានក្នុងតំបន់ដែលខ្លួនមានទីតាំងនៅទីនោះ ។ ជាមួយគ្នានេះ តាំងពីបង្កើតការដាំដុះកៅស៊ូដំបូងរហូតមកដល់បច្ចុប្បន្ន ក្រុមហ៊ុនតែងខិតខំអនុវត្តសកម្មភាពរក្សាបរិស្ថានល្អៗ និងសកម្មភាពដទៃជាច្រើនទៀតដូចជា បង្កើតចម្ការជីវៈចម្រុះ ថែរក្សាជីវៈចម្រុះតាមជួរច្រករបៀង ឬការពារព្រៃធម្មជាតិ និងទីបញ្ចុះសពជាដើម ។
លោក Jef Boedt ប្រធានគ្រប់គ្រងទូទៅនៃក្រុមហ៊ុន Socfin ប្រចាំប្រទេសកម្ពុជា លើកឡើងថា ៖ « ពួកយើងតែងមានការជឿជាក់ថា វត្តមានរបស់ពួកយើងនៅទីនេះអាចធ្វើឲ្យប្រជាជនរស់នៅជុំវិញសហគមន៍ទទួលបានអត្ថប្រយោជន៍ជាច្រើន និងអាចចែករំលែកនូវគុណតម្លៃដែលបានបង្កើតឡើងតាមរយៈសកម្មភាពរបស់ពួកយើង » ។
តាំងពីចាប់ដំណើរការដំបូងនៅក្នុងខេត្តមណ្ឌលគិរីមក ក្រុមហ៊ុនតែងបានចូលរួមសហការជាមួយប្រជាជនក្នុងតំបន់ និងប្តេជ្ញាថា នឹងគោរពសិទ្ធិកាន់កាប់ដីធ្លី និងសិទ្ធិរបស់សហគមន៍ក្នុងតំបន់ ។ Socfin ក៏បានរួមចំណែកក្នុងការអភិវឌ្ឍសហគមន៍ តាមរយៈការឧបត្ថម្ភដល់សាលារៀន មណ្ឌលសុខភាព ឬហេដ្ឋារចនាសម្ព័ន្ធក្នុងតំបន់ជាដើម ។
លោក Boedt បន្តថា ដើម្បីសម្រេចតាមគោលដៅនៃការប្តេជ្ញាចិត្តនេះ ពួកយើងត្រូវតែធ្វើការជាមួយដៃគូ និងភាគីពាក់ព័ន្ធក្នុងតំបន់ឲ្យបានជិតស្និទ្ធ ។ ក្នុងនាមជាក្រុមហ៊ុនកៅស៊ូដំបូងនៅកម្ពុជា ដែលបានបង្ហាញនូវការប្តេជ្ញាចិត្តយ៉ាងមុតមាំបែបនេះ យើងត្រូវតែខិតខំធ្វើខ្លួនឲ្យ ក្លាយជាក្រុមហ៊ុនគំរូដ៏ល្អមួយក្នុងប្រទេស ។ ក្រុមហ៊ុនយើងចង់ឲ្យមានដំណើរការប្រកបដោយតម្លាភាពតាមដែលអាចធ្វើទៅបាន និងសង្កេតឲ្យបានជាក់លាក់លើការប្តេជ្ញាចិត្តធ្វើការងារមួយនេះ ។
គួរបញ្ជាក់ថា Socfin Group គឺជាក្រុមហ៊ុនមានស្តង់ដាអន្តរជាតិ ដែលគ្រប់គ្រងដោយប៉ែក ប្រទេសអឺរ៉ុប ដោយមានជំនាញខាងផ្នែកឧស្សាហកម្មកៅស៊ូ និងដូងប្រេងទូទាំងពិភពលោក។ ក្នុងប្រទេសកម្ពុជា ក្រុមហ៊ុននេះបានសហការជាមួយក្រុមហ៊ុនជាបុត្រសម្ព័ន្ធ រួមមានSocfin Kcd Co., Ltd និងCoviphama Co., Ltd ដើម្បីដាំដំណាំកៅស៊ូនៅខេត្តមណ្ឌលគិរី។ ក្រុមហ៊ុនបានបង្កើតចម្ការកៅស៊ូនៅខេត្តមណ្ឌលគិរី ដែលមានចម្ងាយ៤០គីឡូម៉ែត្រពីក្រុងសែនមនោរម្យ ៕
ចែករំលែកព័តមាននេះ