រាជធានីភ្នំពេញ ៖ រថយន្តដឹកឥដ្ឋការ៉ូមួយគ្រឿង ជិះគ្នា៣នាក់ (តៃកុងនិងព្រូ២នាក់) បើករថយន្តរវល់តែផឹកស្រាក្នុងរថយន្តបណ្តាលឱ្យរេចង្កូតទៅបុកខឿនសួនច្បារពុះចែកផ្លូវ និងបាក់ដើមជ្រៃក្រឹមមួយដើម ហើយបុករលំបង្គោលប៉ាណូស្រាបៀរធ្វើឱ្យរថយន្តក្រឡាប់ដេកតាមផ្លូវ តែសំណាងល្អមិនមានអ្នករងរបួស បង្កភ្ញាក់ផ្អើលកាលពីវេលាម៉ោង៩យប់ថ្ងៃទី១២ មករា ២០១៧ ស្ថិតតាមបណ្តោយផ្លូវជាតិលេខ៦ ត្រង់ចំណុចជិតខារ៉ាអូខេឌ្រីមវ៉ើល ក្នុងសង្កាត់ជ្រោយចង្វារ ខណ្ឌជ្រោយចង្វារ ។
សាក្សីបានឱ្យដឹងថា មុនពេលកើតហេតុ គេឃើញបុរស៣នាក់ជាកម្មករដឹកឥដ្ឋការ៉ូ បើករថយន្តម៉ាក ISUZU ពណ៌ត្រួយចេក ពាក់ស្លាកលេខភ្នំពេញ2M-0804 បើកតាមបណ្តោយផ្លូវជាតិលេខ៦ ទិសដៅពីជើងទៅត្បូងក្នុងល្បឿនលឿន ហើយស្រវឹងស្រាផងនោះ ខណៈពេលមកដល់ចំណុចកើតហេតុ តៃកុងរថយន្តបើករថយន្តបណ្តើរផឹកនៅលើរថយន្តជាមួយព្រូ ដោយរវល់តែផឹកមិនបានមើលមុខបានរេចង្កូតទៅបុកខឿនសួនច្បារពុះចែកទ្រូងផ្លូវ បណ្តាលឲ្យបាក់ដើមជ្រៃក្រឹមអស់មួយដើម ហើយរថយន្តបង្កមិនទាន់អស់ល្បឿន ក៏ជ្រុលទៅបុកបង្គោលប៉ាណូរបស់ស្រាបៀរ បាក់រលំហើយធ្វើឲ្យរថយន្តបង្កក្រឡាប់ដេកនៅលើថ្នល់ តែមិនបណ្តាលឲ្យអ្នកបើកបរនិងព្រូ២នាក់ទៀតរងរបួសទេបាននាំគ្នារត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុសមត្ថកិច្ចបានរកឃើញនៅក្នុងរថយន្តបង្កមានកំប៉ុងស្រាបៀរចំនួន២ទៅ៣កំប៉ុងទៀតផង។
ចែករំលែកព័តមាននេះ