លេងធំហើយ! Barcelona ត្រៀមលេងផ្លូវច្បាប់លើកីឡាករខ្លួន៤រូប ជុំវិញរឿងកុងត្រា
អេស្ប៉ាញ ៖ ក្លិបបាល់ទាត់អ្នកមានបុណ្យ Barcelona ត្រូវបានរាយការណ៍ថាត្រៀមនាំកីឡាករខ្លួន៤រូប
អេស្ប៉ាញ ៖ ក្លិបបាល់ទាត់អ្នកមានបុណ្យ Barcelona ត្រូវបានរាយការណ៍ថាត្រៀមនាំកីឡាករខ្លួន៤រូប
អេស្ប៉ាញ ៖ ក្លិបបាល់ទាត់អ្នកមានបុណ្យ Barcelona ត្រូវបានរាយការណ៍ថាត្រៀមនាំកីឡាករខ្លួន៤រូបឡើងប្តឹងផ្តល់ផ្លូវច្បាប់នៅតុលាការ ប្រសិនបើពួកគេមិនយល់ព្រមលុបចោលការបន្តកុងត្រាថ្មី ដែលបានចុះហត្ថលេខាកាលពី២ឆ្នាំមុន។
ខ្សែបម្រើ Frenkie de Jong, ខ្សែការពារ Gerard Pique, ខ្សែការពារ Clement Lenglet និងអ្នកចាំទី Marc-Andre ter Stegen សុទ្ធតែបានចុះហត្ថលេខារួចហើយកាលពីឆ្នាំ ២០២០ លើការបន្តកុងត្រាថ្មី ដែលពេលនោះ ពួកគេយល់ព្រមកាត់បន្ថយប្រាក់ឈ្នួល ដើម្បីជួយសម្រួលក្លិបដែលកំពុងជួបវិបត្តិហិរញ្ញវត្ថុ។ ប៉ុន្តែស្ថិតក្រោមលក្ខខណ្ឌនឹងផ្តល់ប្រាក់ឈ្នួលពួកគេដូចដើមឡើងវិញ (សម្រាប់កិច្ចសន្យាថ្មី) នៅ១ឆ្នាំបន្ទាប់។ ដោយ Pique បានបន្តកុងត្រាថ្មីរហូតដល់ឆ្នាំ ២០២៤ ហើយ Ter Stegen បានបន្តរហូតដល់ឆ្នាំ ២០២៥ ខណៈដែល De Jong និង Lenglet បានបន្តរហូតដល់ឆ្នាំ ២០២៦ ។
មួយសប្តាហ៍បន្ទាប់ពីកុងត្រាថ្មីបានចុះហត្ថលេខា អតីតប្រធានក្លិប Barcelona លោក Josep Maria Bartomeu បានលាលែងពីតំណែងរួមនឹងក្រុមប្រឹក្សាភិបាលក្លិបដែលនៅសល់។ ហើយក្លិបបានធ្លាក់ចូលក្នុងវិបត្តិសេដ្ឋកិច្ចយ៉ាងធ្ងន់ធ្ងរ។ ដោយពួកគេត្រូវបញ្ចប់ការចំណាយបន្ថែមរហូត៣១១លានអឺរ៉ូ (៣១៨លានដុល្លារ) ក្នុងការទូទាត់ប្រាក់ឈ្នួលកីឡាកររយៈពេលវែង។
ទោះយ៉ាងណា ឥឡូវនេះ ក្រុមប្រឹក្សាភិបាលបច្ចុប្បន្នរបស់ Barcelona ដឹកនាំដោយប្រធានថ្មី លោក Joan Laporta បានអះអាងថាបានរកឃើញភស្តុតាងនៃសកម្មភាពព្រហ្មទណ្ឌក្នុងនាមជាភាគី ដែលបានចុះហត្ថលេខាលើការបន្តកុងត្រាថ្មី។
ប្រភពពី The Athletic និង SPORTbible អះអាងថា Barcelona បានដោះស្រាយបញ្ហានេះអស់ពេល៣ខែរួចមកហើយ និងកំពុងព្យាយាមបញ្ចុះបញ្ចូលកីឡាករទាំង៤ឱ្យលុបចោលកុងត្រាថ្មី ឬបោះបង់ការដំឡើងប្រាក់ឈ្នួលរបស់ពួកគេ។ ដ្បិតក្លិបបច្ចុប្បន្នកំពុងតស៊ូនឹងវិបត្តិហិរញ្ញវត្ថុ។ ហើយប្រសិនបើកីឡាករទាំង៤មិនយល់ព្រម នោះក្លិបនឹងត្រូវរៀបចំសំណុំឯកសារផ្លូវច្បាប់ឡើងទៅកាន់ការិយាល័យព្រះរាជអាជ្ញាតែម្តង។
ដោយសារភាពជាប់គាំងនេះហើយ បានធ្វើឱ្យ Barcelona មិនទាន់អាចចុះឈ្មោះកីឡាករចំណូលថ្មីពួកគេក្នុងនោះរួមមានទាំង Robert Lewandowski និង Raphinha ក្នុងបញ្ជីសម្រាប់ការប្រកួតនៃក្របខណ្ឌ La Liga រដូវកាលថ្មី ២០២២-២៣ ដែលនឹងចាប់ផ្តើមនៅថ្ងៃទី១២ ខែសីហា ឆាប់ៗខាងមុខនេះ៕
ចែករំលែកព័តមាននេះ