ខេត្តកំពង់ឆ្នាំង ៖ យុវជនម្នាក់បានស្លា.ប់នៅនឹងកន្លែង ក្នុងហេតុការណ៍គ្រោះថ្នាក់ចរាចរណ៍មួយបានកើតឡើង នៅវេលាម៉ោង២ និង៣០នាទី រំលងអាធ្រាត្រ ឈានចូលថ្ងៃទី១២
ខេត្តកំពង់ឆ្នាំង ៖ យុវជនម្នាក់បានស្លាប់នៅនឹងកន្លែង ក្នុងហេតុការណ៍គ្រោះថ្នាក់ចរាចរណ៍មួយបានកើតឡើង នៅវេលាម៉ោង២ និង៣០នាទី រំលងអាធ្រាត្រ ឈានចូលថ្ងៃទី១២ ខែមករា ឆ្នាំ២០១៧ នៅលើកំណាត់ផ្លូវជាតិលេខ៥ ត្រង់ចំណុចភូមិស្រះកែវ ឃុំមេលំ ស្រុកបរិបូរណ៌ ខណៈដែលជនរងគ្រោះត្រឡប់ពីខេត្តកំពង់ឆ្នាំង ជិៈម៉ូតូទៅលំនៅឋានវិញ។ សមត្ថកិច្ចនគរបាលមូលដ្ឋានបានឲ្យដឹងថា ជនរងគ្រោះដែលបានស្លាប់មានឈ្មោះ អ៊ុន ដារា អាយុ១៩ឆ្នាំ ជាអ្នកបើកម៉ូតូ និងអ្នកជិះពីក្រោយម្នាក់ទៀត មានឈ្មោះ តាំង ប្រូ អាយុ១៥ឆ្នាំ មានទីលំនៅ ភូមិកែវឡាត ឃុំពន្លៃ ស្រុកបរិបូរណ៌។
ប្រភពដដែលបានបន្តថា នៅរសៀលថ្ងៃទី១១ ខែមករា យុវជនទាំងពីរនាក់ខាងលើ បានទៅហូបការគេ បន្ទាប់ពីចេញពីហូបការ យុវជនទាំងពីរនាក់រួមនឹងមិត្តភក្ដិ២នាក់ទៀត សរុប៤នាក់ បានជិះម៉ូតូ ២គ្រឿងសំដៅមកក្រុងកំពង់ឆ្នាំង ដោយប្រាប់ថាមកហូបបបរស។ ស្រាប់តែរំលងអាធ្រាត្រសមត្ថកិច្ចបានទទួលព័ត៌មានថា មានករណីគ្រោះថ្នាក់ចរាចរណ៍មួយបានកើតឡើងនៅចំណុចកើតហេតុខាងលើ ហើយពេលទៅពិនិត្យស្គាល់អត្តសញ្ញាណជនរងគ្រោះ ឈ្មោះ អ៊ុន ដារា ស្លាប់នៅកន្លែងកើតហេតុ ចំណែកយុវជនឈ្មោះ តាំង ប្រូ បានរងរបួសធ្ងន់ និងបាក់ជើងម្ខាង។
ក្រោយពេលកើតហេតុ សមត្ថកិច្ចនគរបាល បានហៅរថយន្តមណ្ឌលសុខភាពស្រុក ដឹកជនរងគ្រោះមកមន្ទីរពេទ្យខេត្ត ដើម្បីសង្គ្រោះ ចំណែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី នៅលំនៅដ្ឋាន។ ដោយឡែកម៉ូតូជនរងគ្រោះម៉ាក ស៊ុយហ្សុយគីនិច ត្រូវបានសមត្ថកិច្ចយកទៅរក្សាទុក ដើម្បីប្រគល់ជូនម្ចាស់ នៅពេលក្រោយ។ សមត្ថកិច្ចនគរបាលបញ្ជាក់ថា គ្រោះថ្នាក់ចរាចរណ៍ខាងលើ មិនច្បាស់ថា កើតឡើងបែបណាទេ ព្រោះរំលងអាធ្រាត្រ គ្មានអ្នកឃើញហេតុការណ៍ និងគ្មានស្លាកស្នាមសន្និដ្ឋានបាន ៕
ចែករំលែកព័តមាននេះ