ខេត្តបាត់ដំបង ៖ សេចក្តីរាយការណ៍បានឱ្យដឹងថា មានករណីចោរគាស់ផ្ទះលោកគ្រូបង្រៀនម្នាក់ ដែលសង្ស័យថា ចោរធ្វើសកម្មភាពនៅចន្លោះពីម៉ោង៧ព្រឹក ទៅម៉ោង១រសៀលថ្ងៃទី១២ មករា នេះ ស្ថិតនៅចំណុចភូមិសូភី២ សង្កាត់រតនៈ ក្រុងបាត់ដំបង ដោយបង្កការភ្ញាក់ផ្អើល ពេលដែលលោកគ្រូត្រឡប់មកផ្ទះវិញ ដោយចោរប្រមូលយកទ្រព្យសម្បត្តិសរុប គិតជាទឹកប្រាក់អស់ជាង១ម៉ឺនដុល្លារឯណោះ ។
ប្រភពឱ្យដឹងថា បុរសម្ចាស់ផ្ទះខាងលើ ឈ្មោះម៉ម ម៉ារិន អាយុ៤៦ឆ្នាំ ជាគ្រូបង្រៀន មានទីលំនៅក្នុងភូមិកើតហេតុ ។ រីឯក្រុមចោរអត់មានប៉ុន្មាននាក់ទេ ដោយធ្វើសកម្មភាពគាស់ទ្វារក្រោយ ចូលទៅកាត់ចំរឹងដែកបានរើកកាយអីវ៉ាន់ពេញផ្ទះ ។
ប្រភពបន្តទៀតថា ម្ចាស់ផ្ទះខាងលើបានចាក់សោតាំងពីព្រឹកមកម្ល៉េះ ព្រោះគាត់ចេញទៅបង្រៀនសិស្ស រីឯប្រពន្ធក៏មិននៅដែរ ។ ទ្រព្យសម្បត្តិដែលត្រូវចោរប្រមូលយកទៅ ត្រូវម្ចាស់រៀបរាប់បឋមថា មានខ្សែ.កមាស១តម្លឹងកន្លះ, បន្តោងព្រះស្រោបមាស១ (ទម្ងន់៣ជី), ខ្សែដៃធ្វើមាស១ (ទម្ងន់៥ជី), ខ្សែដៃប្លាទីនដាំពេជ្រ១ខ្សែ (តម្លៃ៣៧០០ដុល្លារ), ចិញ្ចៀន២វង់ (៦០០ដុល្លារ), លុយខ្មែរ៣លាន៦សែនរៀល, ប្រាក់៦៥០ដុល្លារ, កាតអេធីអឹម១ និងឯកសារគ្រួសារមួយចំនួនទៀត ។
បច្ចុប្បន្ន សមត្ថកិច្ចជំនាញកំពុងចុះពិនិត្យផ្ទះកើតហេតុ ដើម្បីស្វែងរកមុខសញ្ញាយ៉ាងក្តៅបំផុត ។
ចែករំលែកព័តមាននេះ