ខេត្តព្រះសីហនុ ៖ ករណីផ្ទុះអាវុធនៅខេត្តព្រះសីហនុ ដែលមានជនជាតិចិន៤នាក់ស្លា.ប់ និងម្នាក់ទៀតរបួសធ្ងន់កាលពីយប់រំលងអធ្រាត្រ ចូលថ្ងៃទី៩ សីហា ២០២២ សមត្ថកិច្ចគណៈបញ្ជាការឯកភាពរដ្ឋបាលខេត្តបានបញ្ជាក់ថា ជាអំពើចាប់ជំរិតទារប្រាក់ ក្នុងនោះ ក្រុមឧក្រិដ្ឋជន៣នាក់បានស្លា.ប់ ចំណែកជនរងគ្រោះ២នាក់ ក្នុងនោះម្នាក់ត្រូវក្រុមឧក្រិដ្ឋជនបា.ញ់ស្លា.ប់នៅចំណុចឆ្នេរ
អូត្រេះ មុខសណ្ឋាគា៥២០ ក្នុងសង្កាត់៤ ក្រុងព្រះសីហនុ និងជនរងគ្រោះម្នាក់ទៀតរងរបួសធ្ងន់។ សូមរំលឹកថា ៖ ចិនស.ម្លា.ប់ចិនកាន់តែសា.ហា.វ ! ជាក់ស្តែងដូចករណីនេះលើដីព្រះសីហនុ
សូមបញ្ជាក់ដែរថា កាលពីរសៀលថ្ងៃទី០៩ សីហា ឯកឧត្តមគួច ចំរើន អភិបាលខេត្តព្រះសីហនុនិងជាប្រធានគណៈបញ្ជាការឯកភាពរដ្ឋបាលខេត្ត បានអញ្ជើញពិនិត្យវត្ថុតាង និងឧបត្ថម្ភថវិកា២០លានរៀល លើកទឹកចិត្តដល់កងកម្លាំងនគរបាលស្នងការដ្ឋាននគរបាលខេត្តដែលសហការធ្វើប្រតិបត្តិការបង្ក្រាបក្រុមឧក្រិដ្ឋជននេះ។
ដោយឡែក យោងតាមរបាយការណ៍ស្នងការនគរបាលខេត្តព្រះសីហនុបានអោយដឹងថា នៅថ្ងៃទី០៩ ខែសីហា ឆ្នាំ២០២២ វេលារំលងអធ្រាត្រ នៅចំណុចមុខសណ្ឋាគារ៥២០ ស្ថិតក្នុងភូមិ៦ សង្កាត់៤ ខេត្តព្រះសីហនុ មានករណីផ្ទុះអាវុធមួយកើតឡើង បង្កដោយមនុស្ស១ក្រុម មានគ្នា៦នាក់ ជនជាតិខ្មែរ១នាក់ជាអ្នកបើកបររថយន្ត និងជនជាតិចិន៥នាក់ ជាមិត្តភក្តិគ្នាទើបស្គាល់គ្នា។
តាមការបំភ្លឺអ្នកឃើញហេតុការណ៍ថា នៅវេលាខាងលើ ជនរងគ្រោះនិងជនសង្ស័យបានជិះរថយន្តជាមួយគ្នាមកពីផឹកស៊ីមកដល់ចំណុចខាងលើ ក៏បង្កជំលោះគ្នាដោយជនសង្ស័យទាំង៣បានធ្វើសកម្មភាពយកអាវុធខ្លី និងកាំបិតគំរាមជនរងគ្រោះទាំង៣នាក់។
ឃើញដូច្នេះ អ្នកបើកបរជនជាតិខ្មែរបានរត់ចេញក្រៅរថយន្តស្រែកអោយគេជួយ ស្រាប់តែជនសង្ស័យ៣នាក់ដែលជិះខាងក្រោយចាប់ក្រៀកជនរងគ្រោះម្នាក់បានប្រតាយប្រតប់គ្នា ជនរងគ្រោះត្រូវបានជនសង្ស័យចា.ក់១កាំបិតចំ.ពោះ និងរុញទ្វារថយន្តលោតចេញក្រៅក៏ត្រូវជនសង្ស័យបា.ញ់១គ្រាប់ចំក្បាលស្លា.ប់ក្បែររថយន្ត ។ ចំណែកជនរងគ្រោះ២នាក់ទៀតដែលជិះខាងមុខ ត្រូវបានក្រុមជនសង្ស័យ៣នាក់ចាប់ខ្លួនយកទៅរួមជាមួយរថយន្តរបស់ជនរងគ្រោះ ជាមធ្យោបាយរត់គេចខ្លួនបាត់ផងដែរ។
ភ្លាមនោះ កម្លាំងរថយន្តល្បាតកងអន្តរាគមន៍ពិសេស នៃស្នងការដ្ឋាននគរបាលខេត្តព្រះសីហនុ ដែលកំពុងជិះល្បាតនៅក្បែរម្តុំនោះបានទទួលព័ត៌មានបានជិះដេញប្រកិតតាមរថយន្តដែលជនសង្ស័យបើករត់គេចខ្លួន ហើយក្រុមជនសង្ស័យបានធ្វើការបា.ញ់មកលើសមត្ថកិច្ចយើងទៅវិញទៅមកជាច្រើនគ្រាប់ជាមួយកម្លាំងសមត្ថកិច្ចយើង ។
កម្លាំងសមត្ថកិច្ចយើងបន្តការដេញតាមដោយមានការបន្ថែមកម្លាំងជំនាញពីស្នងការដ្ឋាននគរបាលខេត្ត សហការជាមួយកម្លាំងអធិការដ្ឋាននគរបាលក្រុងព្រះសីហនុ និងអធិការដ្ឋាននគរបាលស្រុកព្រៃនប់ បានចេញតាម រហូតដល់ចំណុចចន្លោះបង្គោលគីឡូម៉ែត្រលេខ១៨៧-១៨៨ ស្ថិតក្នុង ភូមិអណ្តូងថ្ម ឃុំអណ្តូងថ្ម ស្រុកព្រៃនប់ ខេត្តព្រះសីហនុ ទើបរថយន្តរបស់ជនសង្ស័យបើកបរដោយល្បឿនលឿនបានបើករេ ចង្កូតធ្លាក់ផ្លូវ បុកបង្គោលភ្លើងថ្ម ។
ខណៈនោះ កម្លាំងសមត្ថកិច្ចយើងចូលទៅព័ទ្ធរថយន្តបង្កមានការផ្ទុះអាវុធជាច្រើនគ្រាប់ ហើយរំដោះបានជនរងគ្រោះម្នាក់ ជាជនជាតិចិន (ដោយគាត់បានលូនចេញពីក្នុងរថយន្តមកលើកដៃក្រាបក្បែររថយន្តដោយដៃមានជាប់ខ្នោះ និងឃាត់ជនសង្ស័យបានចំនួន៣នាក់ ។
ដោយជនរងគ្រោះនិងជនសង្ស័យរបួសធ្ងន់ធ្ងរ កម្លាំងយើងបានបញ្ជូនជនរងគ្រោះម្នាក់ និងជនសង្ស័យម្នាក់ទៅសង្គ្រោះនៅមន្ទីរពេទ្យបង្អែក ខេត្តព្រះសីហនុ ។ ចំណែកជនសង្ស័យ២នាក់ទៀតបានស្លា.ប់នឹងកន្លែង រីឯជនសង្ស័យម្នាក់ដែលបញ្ជូនទៅមន្ទីរពេទ្យបានស្លា.ប់ពេលបញ្ជូនទៅដល់មន្ទីរពេទ្យ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ