រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានណែនាំសិស្សនគរបាលទាំងអស់ត្រូវខិតខំរៀនសូត្របន្ថែមពីការងារជាក់ស្ដែង ពិសេសពាក់ព័ន្ធទៅនឹងការប្រែប្រួលនៃបទល្មើសថ្មីៗ ហើយភ្ជាប់ការងារទៅនឹងជីវភាពប្រជាពលរដ្ឋផងដែរ ដើម្បីឲ្យកាត់មានកក់ក្តៅពីសមត្ថកិច្ច…
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានណែនាំសិស្សនគរបាលទាំងអស់ត្រូវខិតខំរៀនសូត្របន្ថែមពីការងារជាក់ស្ដែង ពិសេសពាក់ព័ន្ធទៅនឹងការប្រែប្រួលនៃបទល្មើសថ្មីៗ ហើយភ្ជាប់ការងារទៅនឹងជីវភាពប្រជាពលរដ្ឋផងដែរ ដើម្បីឲ្យកាត់មានកក់ក្តៅពីសមត្ថកិច្ច ។
ថ្លែងក្នុងពិធីសំណេះសំណាល និងសួរសុខទុក្ខ សិស្សនាយនគរបាល សិស្សនាយនគរបាលរងវគ្គបណ្ដុះបណ្ដាលកម្រិតបឋមវិជ្ជាជីវៈនគរបាលជំនាន់ទី១៥ លើកទី២ នៅសាលានគរបាលភូមិភាគ២ ខេត្តកំពង់ចាម នាថ្ងៃទី៩ ខែសីហា ឆ្នាំ២០២២ សម្ដេច ស ខេង បានថ្លែងឲ្យដឹងថា ដើម្បីឲ្យនគរបាលមានការយល់ដឹងមានវិជ្ជាជីវៈមានគុណវុឌ្ឍិ មានគុណធម៌ និងប្រតិបត្តិការប្រកបដោយការទទួលខុសត្រូវ គឺចាំបាច់ណាស់ត្រូវតែសិក្សារៀនសូត្រឲ្យបានត្រឹមត្រូវ ពោល គឺអ្នកដែលត្រូវបានប្រឡងជាប់ជាមន្ត្រីនគរបាលត្រូវតែឆ្លងកាត់វគ្គសិក្សាជាក់ស្ដែងវគ្គមូលដ្ឋាននាពេលនេះមានរយៈពេល៤ខែ ។
សម្ដេចក្រឡាហោមបានបន្តថា មន្ត្រីនគរបាលដែលឆ្លងកាត់ការរៀនសូត្រប្រាកដជានឹងបំពេញភារកិច្ចបានល្អប្រសើរជាងអ្នកមិនបានរៀនសូត្រ ។
សម្ដេច ក្រឡា ហោម បានគូសបញ្ជាក់ថា ៖«សិស្សនគរបាលទាំងអស់ ខិតខំសិក្សារៀនសូត្រ និងត្រៀមខ្លួនបំពេញភារកិច្ចជាក់ស្ដែង និងសិក្សារៀនសូត្របន្ថែមពីការងារជាក់ស្ដែង ពិសេសពាក់ព័ន្ធនឹងការប្រែប្រួលនៃបទល្មើសប្រឈមៗនិងថ្មីៗ ដូចជា ៖ គ្រឿងញៀ.នខុសច្បាប់ ការជួញដូរមនុស្ស និងបទល្មើសបច្ចេកវិទ្យាជាដើម ហើយភាពចាំបាច់នៃការផ្សារភ្ជាប់ការងារទៅនឹងជីវភាពប្រជាពលរដ្ឋផងដែរ» ។
សម្ដេចក្រឡាហោម ក៏បានគូសបញ្ជាក់ថា សម្ដេចនឹងបន្តអញ្ជើញចុះទៅឲ្យគ្រប់សាលានគរបាលជាតិភូមិភាគ និងមានការតាំងចិត្តច្បាស់ ។ សម្ដេចថា ក្រសួងមហាផ្ទៃនឹងកាត់បន្ថយការបញ្ជូនមន្ត្រីនគរបាលជាតិថ្នាក់មូលដ្ឋានទៅរៀននៅក្រៅប្រទេសឲ្យបាន១០០ភាគរយ ។
ជាមួយគ្នានោះដែរ សម្ដេច ស ខេង ក៏បានគូសបញ្ជាក់អំពីការខិតខំប្រឹងប្រែងបង្កើនចំនួនក្របខ័ណ្ឌមន្ត្រីនគរបាលរំលែកទៅឲ្យប៉ុស្តិ៍នគរបាលរដ្ឋបាលឃុំ សង្កាត់ ដោយបែងចែកពីការិយាល័យ និងនាយកដ្ឋាននានាដែលមានបុគ្គលិកច្រើន។ សម្ដេចបន្តថា ប៉ុស្តិ៍នគរបាលរដ្ឋបាលឃុំ សង្កាត់នេះ ស្ថិតក្នុងចំណោមតួអង្គសំខាន់ដែលនៅជិតប្រជាពលរដ្ឋបំផុតដូចជា ៖ ក្រុមប្រឹក្សឃុំ សង្កាត់ ស្មៀន មេភូមិ អនុភូមិ ប៉ុស្តិ៍សុខភាព និងគ្រូបង្រៀនជាដើម៕
ចែករំលែកព័តមាននេះ