សហរដ្ឋអាមេរិក ៖ យោងតាមធនាគារពិភពលោក World Bank បានឲ្យដឹងថា ការកាត់បន្ថយពន្ធ និងគម្រោងចំណាយរបស់លោកប្រធានាធិបតីជាប់ឆ្នោត Donald Trump អាចជំរុញដល់សេដ្ឋកិច្ចសហរដ្ឋអាមេរិក និងបង្កើនការលូតលាស់ដល់ប្រទេសទូទាំងពិភពលោក ប៉ុន្តែភាពមិនប្រាកដប្រជានៃគោលនយោបាយពាណិជ្ជកម្មរបស់លោក អាចនឹងនាំមកនូវហានិភ័យ ។
ធនាគារនេះបាននិយាយកាលពីថ្ងៃអង្គារកន្លងមកថា រដ្ឋាភិបាលរបស់លោក Trump អាចនឹងខាតបង់ការលូតលាស់សេដ្ឋកិច្ច ប្រសិនបើចេញឧបសគ្គពាណិជ្ជកម្មដែលអាចធ្វើឲ្យប្រទេសដទៃសងសឹក ។
ធនាគារនេះបន្តថា សរុបមក វានៅលឿននៅឡើយក្នុងការព្យាករថា តើការប៉ះពាល់ពីគោលនយោបាយសេដ្ឋកិច្ចរបស់លោក Trump នឹងមានដល់កម្រិតណា ។ ធនាគារព្យាករថា សេដ្ឋកិច្ចពិភពលោក នឹងលូតលាស់២,៧%ក្នុងឆ្នាំ២០១៧នេះ និងកើនឡើងដល់២,៩%ក្នុងឆ្នាំក្រោយទៀត ។
ការលូតលាស់របស់សហរដ្ឋអាមេរិកអាចនឹងកើន២,៥%ក្នុងឆ្នាំនេះ និង២,៩%ក្នុងឆ្នាំ២០១៨ ប្រសិនបើរដ្ឋាភិបាលរបស់លោក Trump ធ្វើតាមការសន្យាថា នឹងកាត់បន្ថយពន្ធលើចំណូលក្រុមហ៊ុន ពី៣៥% ទៅ១៥% ។
ការលូតលាស់នៃសេដ្ឋកិច្ចរបស់អាមេរិក ក៏អាចជំរុញដល់ការលូតលាស់របស់ពិភពលោកប្រមាណ០,១%ផងដែរក្នុងឆ្នាំ២០១៧ និងយ៉ាងតិច ក៏០,៣%ក្នុងឆ្នាំក្រោយ ។
ធនាគារនេះនិយាយទៀតថា គម្រោងរបស់លោក Trump ដើម្បីបង្កើនការចំណាយផ្នែកហេដ្ឋារចនាសម្ព័ន្ធ ក៏អាចបង្កើនការលូតលាស់ផងដែរ ។
សហរដ្ឋអាមេរិក គឺជាដៃគូពាណិជ្ជកម្មធំជាងគេរបស់ប្រទេសប្រមាណ១ភាគ៤នៃប្រទេសទាំងអស់លើពិភពលោក ។ ជាលទ្ធផល ប្រសិនបើប្រទេសនេះចង់ចរចាលើកិច្ចព្រមព្រៀងពាណិជ្ជកម្មសាជាថ្មី និងដាក់ឧបសគ្គពាណិជ្ជកម្មថ្មីនោះ វាអាចនឹងធ្វើឲ្យប៉ះពាល់ដល់សេដ្ឋកិច្ចពិភពលោក ។
គួរបញ្ជាក់ថា លោក Trump នឹងឡើងកាន់តំណែងក្នុងថ្ងៃទី២០ មករា ខាងមុខ ដោយបានផ្តោតគំនិតលើពាណិជ្ជកម្មនាពេលធ្វើយុទ្ធនាការឃោសនាបោះឆ្នោត និងនិយាយ ថាលោកនឹងពិចារណាឡើងវិញលើទំនាក់ទំនងពាណិជ្ជកម្មជាមួយប្រទេសចិន ចរចាឡើងវិញ ឬដកខ្លួនចេញពីកិច្ច ព្រមព្រៀងពាណិជ្ជកម្ម NAFTA និងមិនឲ្យសហរដ្ឋអាមេរិកចូលរួមក្នុងកិច្ចព្រមព្រៀងពាណិជ្ជកម្ម TPP ៕
ចែករំលែកព័តមាននេះ