រាជធានីភ្នំពេញ ៖ អ្នកធុរកិច្ចជាតិ អន្តរជាតិ និងវាគ្មិនល្បីៗមកពីជុំវិញពិភពលោកប្រមាណ៥០០នាក់នឹងចូលរួមក្នុងកិច្ចប្រជុំកំពូលធុរកិច្ចនៅកម្ពុជា នាពាក់កណ្តាលខែកុម្ភៈខាងមុខ ។ នេះបើតាមបុគ្គលិកផ្នែករដ្ឋបាលនៃសភាពាណិជ្ជកម្មអន្តរជាតិនៃកម្ពុជា បានឲ្យដឹងកាលពីព្រឹកថ្ងៃទី១០ មករា កន្លងមក ។
« សម្តេចតេជោ ហ៊ុន សែន នឹងអញ្ជើញចូលរួមជាអធិបតីក្នុងពិធីបើកកិច្ចប្រជុំនេះ ដែលនឹងប្រារព្ធធ្វើនៅថ្ងៃទី១៥ កុម្ភៈ ខាងមុខ។ វេទិកាធុរកិច្ចអន្តរជាតិនេះ នឹងរៀបចំឡើងនៅសណ្ឋាគារអីុនធើរកុងទីណង់តាល់ រាជធានីភ្នំពេញ » ។ នេះបើតាមការអះអាងរបស់លោក ប៊ុន សីហៈ បុគ្គលិកផ្នែករដ្ឋបាលនៃសភាពាណិជ្ជកម្មអន្តរជាតិនៃកម្ពុជារូបនេះ។
លោកបន្តថា ៖ « កិច្ចប្រជុំនេះមានផលប្រយោជន៍យ៉ាងច្រើនដល់កម្ពុជា ព្រោះវានឹងទាក់ទាញអ្នកវិនិយោគអន្តរជាតិកាន់តែច្រើន អាចចាប់យកកាលានុវត្តភាពដើម្បីធ្វើការវិនិយោគនៅកម្ពុជា ។ តាមធម្មតា កិច្ចប្រជុំនេះរៀបចំធ្វើឡើងរៀងរាល់ពីរឆ្នាំម្តង និងរៀបចំដោយសភាពាណិជ្ជកម្មអន្តរជាតិនៃកម្ពុជា និងសហការឧបត្ថម្ភដោយដៃគូផ្នែកឯកជនដទៃទៀត » ។
កិច្ចប្រជុំនេះបានរៀបចំលើកទី១ កាលពីឆ្នាំ២០១៤ និងគ្រោងរៀបចំនៅឆ្នាំ២០១៦ ប៉ុន្តែដោយសារមានបញ្ហាមួយចំនួន កិច្ចប្រជុំបានលើកពេលមកធ្វើនៅឆ្នាំ២០១៧ជំនួសវិញ។ វាគ្មិនល្បីៗជាច្រើនរំពឹងចូលរួមក្នុងកិច្ចប្រជុំរហូតមកទល់ពេលនេះ គឺអគ្គនាយកនៃក្រុមប្រឹក្សាទេសចរណ៍ពិភពលោក បានផ្តល់ការយល់ព្រមធ្វើជាវាគ្មិនក្នុងកម្មវិធីនេះរួចហើយ ។
លោក ប៊ុន សីហៈ បន្តថា ស្ថាប័នហិរញ្ញវត្ថុធំៗដូចជា ធនាគារពិភពលោក និងដៃគូអភិវឌ្ឍន៍ដទៃទៀត ក៏រំពឹងចូលរួមក្នុងកិច្ចប្រជុំធុរកិច្ចអន្តរជាតិនេះដែរ ហើយអ្នកចូលរួមកម្មវិធីនេះ តម្រូវឲ្យបង់ប្រាក់ក្នុងម្នាក់ចំនួន៣៥០ដុល្លារអាមេរិក ។
លោក អុិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ថ្លែងថា ការរៀបចំវេទិកាធំៗបែបនេះ ជាឱកាសសម្រាប់បង្ហាញវិនិយោគិនពីបរិយាកាសវិនិយោគ ប្រព័ន្ធច្បាប់របស់កម្ពុជា និងផ្តល់ព័ត៌មាននានាដល់វិនិយោគិន ដើម្បីពួកគេទទួលបានព័ត៌មាន អាចបង្ហាញពីព័ត៌មានទាក់ទងតំបន់សេដ្ឋកិច្ចពិសេស ព័ត៌មានទាក់ទងនឹងកម្ពុជា រៀបចំធ្វើជាម្ចាស់ផ្ទះវេទិកាធុរកិច្ចពិភពលោកជាដើម ។
លោកបន្តថា ៖ « ប្រសិនជាមិនមានការរៀបចំកិច្ចប្រជុំបែបនេះទេ អ្នកវិនិយោគគាត់ពិបាករកព័ត៌មានពីកម្ពុជា ប៉ុន្តែតាមរយៈវេទិកានេះ ពួកគេអាចទទួលបានព័ត៌មាន ហើយបើពួកគេចាប់អារម្មណ៍ ពួកគេនឹងសម្រេចចិត្តវិនិយោគនៅកម្ពុជា » ។
លោកបន្ថែមថា ៖ « នៅពេលអ្នកវិនិយោគមកវិនិយោគនៅកម្ពុជា ពួកគេអាចផ្តល់ចំណូលដោយផ្ទាល់ដល់រាជរដ្ឋាភិបាល តាមរយៈការបង់ពន្ធ និងផ្តល់ការងារជាច្រើនដល់ប្រជាពលរដ្ឋ » ។
សេដ្ឋវិទូកម្ពុជា លោកបណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការរៀបចំកិច្ចប្រជុំបែបនេះពិតជាមានផលប្រយោជន៍ តាមរយៈការរៀបចំរបស់វិស័យឯកជន ដើម្បីទាក់ទាញអ្នកធុរកិច្ចមកវិនិយោគនៅកម្ពុជា ដែលពួកគេភាគច្រើនមិនស្គាល់កម្ពុជានោះទេ ។ ដូច្នេះ ការរៀបចំកិច្ចប្រជុំនេះ នឹងជាវេទិកាមួយផ្សព្វផ្សាយព័ត៌មានពីកម្ពុជាទៅកាន់ពិភពលោក ហើយវេទិកាបែបនេះគួររៀបចំជារៀងរហូត ព្រោះពេលពួកគេទទួលបានព័ត៌មានល្អៗពីកម្ពុជា ពួកគេនឹងមកវិនិយោគបន្តទៀត ។
លោកបន្តថា ៖ « ការរៀបចំវេទិកាបែបនេះ បើសិនជាមិនល្អ ពួកគេអាចរាងចាលមិនត្រឡប់មកវិញម្តងទៀតទេ ។ ដូច្នេះ យើងត្រូវប្រើប្រាស់ទ្រឹស្តីអតីតប្រធានាធិបតី លី ក្វាន់យូ ដែលបានលើកឡើងថា ឲ្យយើងខិតខំថែរក្សាអ្នកវិនិយោគមករួចហើយ ហើយត្រូវទាក់ទាញអ្នកថ្មីមកបន្ថែមទៀត » ៕
ចែករំលែកព័តមាននេះ