ភ្ញៀវទេសចរបរទេស១៤នាក់ភ័យស្លន់ស្លោរត់ចុះពីរថយន្ត
ខេត្តបន្ទាយមានជ័យ ៖ ភ្ញៀវទេសចរណ៍បរទេស១៤នាក់បានភ័យស្លន់ស្លោរត់ចុះពីលើរថយន្ត ខណៈរថយន្តបើកសុខៗស្រាប់តែឆ្លងចរន្តបណ្ដាលឲ្យឆាបឆេះយ៉ាង …
ខេត្តបន្ទាយមានជ័យ ៖ ភ្ញៀវទេសចរណ៍បរទេស១៤នាក់បានភ័យស្លន់ស្លោរត់ចុះពីលើរថយន្ត ខណៈរថយន្តបើកសុខៗស្រាប់តែឆ្លងចរន្តបណ្ដាលឲ្យឆាបឆេះយ៉ាង …
ខេត្តបន្ទាយមានជ័យ ៖ ភ្ញៀវទេសចរណ៍បរទេស១៤នាក់បានភ័យស្លន់ស្លោរត់ចុះពីលើរថយន្ត ខណៈរថយន្តបើកសុខៗស្រាប់តែឆ្លងចរន្តបណ្ដាលឲ្យឆាបឆេះយ៉ាងសន្ធោសន្ធៅ ។ ហេតុការណ៍នេះកើតឡើងកាលពីវេលាម៉ោង៥ និង៣០នាទីល្ងាច ថ្ងៃទី១០ ខែមករា ឆ្នាំ២០១៧ នៅតាមបណ្តោយផ្លូវជាតិលេខ៥ ស្ថិតខាងកើតភូមិសាលាក្រហម ឃុំសំរោង ស្រុកអូរជ្រៅ ។
លោកឧត្តមសេនីយ៍ត្រី ង៉ាន់ ចាន់ដា ស្នងការរងនគបាលខេត្តបន្ទាយមានជ័យ បានឲ្យដឹងថា រថយន្តដែលត្រូវបានឆាបឆេះគឺជារថយន្តធុន២៤កៅអីរបស់ក្រុមហ៊ុនថងស៊ិង ដែលដឹកភ្ញៀវទេសចរណ៍បរទេសចំនួន១៤នាក់មកពីខេត្តសៀបរាប ទិសដៅទៅក្រុងប៉ោយប៉ែត ខេត្តបន្ទាយមានជ័យ ។
ប្រភពព័ត៌មានពីអ្នកបើកបរបានឲ្យសមត្ថកិច្ចដឹងថា មុនពេលកើតហេតុគាត់ឃើញមានហុយផ្សែងចេញពីក្បែរចង្កូត ពេលនេះគាត់បានឲ្យភ្ញៀវទេសចរណ៍បរទេសទាំងនោះចុះចេញពីរថយន្ត ភ្លាមៗនោះស្រាប់តែអណ្ដាតភ្លើងឆាបឆេះឡើងសន្ធោសន្ធៅតែម្តង ។
លោកឧត្តមសេនីយ៍ត្រី ង៉ាន់ ចាន់ដា បានឲ្យដឹងទៀតថា នៅពេលអគ្គិភ័យឆាបឆេះភ្លាមៗ រថយន្តពន្លត់អគ្គិភ័យនៃស្នងការដ្ឋាននគបាលខេត្ត២គ្រឿងបានមកអន្តរាគមន៍បាញ់ទឹកពន្លត់ដែរ តែរថយន្តត្រូវភ្លើងឆាបឆេះអស់ស្ទើរទាំងស្រុងទៅហើយ ។
លោកស្នងការរងបញ្ជាក់ថា អគ្គិភ័យដែលឆាបឆេះរថយន្តដឹកភ្ញៀវទេសចរណ៍នេះបណ្តាលឲ្យភ្ញៀវបរទេសភ័យខ្លាច និងស្ទះចរាចរណ៍អស់ជិត១ម៉ោង ។ ចំណែកភ្ញៀវចំនួន១៤នាក់ ត្រូវបានរថយន្តក្រុមហ៊ុនថងស៊ិងមកដឹកសាងបន្តទៅក្រុងប៉ោយប៉ែត ៕
ចែករំលែកព័តមាននេះ