រាជធានីភ្នំពេញ ៖ រថយន្តចំនួន៦គ្រឿង និងព្រូចំនួន៨នាក់ ត្រូវបានកម្លាំងសណ្តាប់ធ្នាប់ ខណ្ឌ និងនគរបាលខណ្ឌសែនសុខ ឃាត់ខ្លួនកាលពីព្រឹកថ្ងៃទី១១ ខែមករា នេះ
រាជធានីភ្នំពេញ ៖ រថយន្តចំនួន៦គ្រឿង និងព្រូចំនួន៨នាក់ ត្រូវបានកម្លាំងសណ្តាប់ធ្នាប់ ខណ្ឌ និងនគរបាលខណ្ឌសែនសុខ ឃាត់ខ្លួនកាលពីព្រឹកថ្ងៃទី១១ ខែមករា នេះ ខណៈដែលរថយន្តទាំងនោះឈប់ចតហៅម៉ូយអនាធិបតេយ្យ នៅតាមមហាវិថីសហព័ន្ធរុស្សី ក្នុងមូលដ្ឋានសង្កាត់ទឹកថ្លា។ តាមមន្ត្រីសណ្តាប់ធ្នាប់សាលាខណ្ឌសែនសុខ បានឲ្យដឹងថា ការឃាត់រថយន្តតាក់ស៊ី និងព្រូនេះ ធ្វើឡើងតាមការណែនាំរបស់លោក ប៉ឹល កុសល អភិបាលខណ្ឌសែនសុខ បន្ទាប់ពីម្ចាស់រថយន្តមិនបានស្តាប់តាមការណែនាំ របស់អាជ្ញាធរ មកឈប់ចត់ហៅម៉ូយយ៉ាងអនាធិបតេយ្យ ជាហេតុធ្វើឲ្យបាត់បង់សណ្តាប់ធ្នាប់ និងរបៀបរៀបរយនៅតាមដងផ្លូវ ព្រមទាំងបង្កឲ្យកកស្ទះចរាចរណ៍។
តាមមន្ត្រីរូបនោះបានឲ្យដឹងទៀតថា មហាវិថីសហព័ន្ធរុស្សីជាផ្លូវសម្រាប់ភ្ញៀវជាតិ និងអន្តរជាតិឆ្លងកាត់កន្លងមក គណៈអភិបាលខណ្ឌ បានណែនាំដល់កម្លាំងសណ្តាប់ធ្នាប់រៀបចំសណ្តាប់ធ្នាប់ជាប្រចាំ ព្រមទាំងឃាត់រថយន្ត ទៅទុកនៅសាលាខណ្ឌធ្វើកិច្ចសន្យាអប់រំ តែអ្នកបើកបរ និងព្រូមិនស្តាប់តាមការណែនាំ ហើយលើកនេះគឺឃាត់ទាំងរថយន្ត និងព្រូតែម្តង ដោយឡែកអ្នកបើកបរពុំបានឃាត់ឡើយ។
តាមមន្ត្រីសណ្តាប់ធ្នាប់ឲ្យដឹងទៀតថា ព្រូដែលហៅម៉ូយរថយន្តចំនួន៨នាក់ត្រូវបានសមត្ថកិច្ចធ្វើតេស្តទឹកនោមមានសារធាតុញៀនចំនួន៤នាក់ រួចបញ្ជូនទៅកាន់អធិការដ្ឋានខណ្ឌសែនសុខ ដើម្បីបញ្ជូនទៅមន្ទីរសង្គមកិច្ចរាជធានីភ្នំពេញបន្សាបគ្រឿងញៀន។ រីឯ៤នាក់ទៀត ធ្វើកិច្ចសន្យាអប់រំឲ្យឈប់ហៅម៉ូយបង្កឲ្យបាត់បង់សណ្តាប់ធ្នាប់ទៀត។ ចំណែករថយន្តឃាត់ទុកនៅសាលាខណ្ឌបណ្តោះអាសន្នជាការប្រមាន និងរង់ចាំសុំគោលការណ៍ពីគណៈអភិបាលខណ្ឌ៕
ចែករំលែកព័តមាននេះ