ផ្អើលសមត្ថកិច្ច ! ដឹកគោទៅប៉ុស្តិ៍ទាមទាររកយុត្តិធម៌
ខេត្តបន្ទាយមានជ័យ ៖ សេចក្តីរាយការណ៍បានឲ្យដឹងថា កាលពីរសៀលថ្ងៃទី១១ ខែមករា ឆ្នាំ២០១៧ បុរស២នាក់បាននាំគ្នាដឹកគោក្បាលទៅកាន់ប៉ុស្តិ៍នគរបាលរដ្ឋបាល …
ខេត្តបន្ទាយមានជ័យ ៖ សេចក្តីរាយការណ៍បានឲ្យដឹងថា កាលពីរសៀលថ្ងៃទី១១ ខែមករា ឆ្នាំ២០១៧ បុរស២នាក់បាននាំគ្នាដឹកគោក្បាលទៅកាន់ប៉ុស្តិ៍នគរបាលរដ្ឋបាលប៉ោយប៉ែតដើម្បីទាមទាររកយុត្តិធម៌ បន្ទាប់ពីគោកំណាច១ក្បាលនោះបានជល់ស្ត្រីចំណាស់ម្នាក់ឲ្យរងរបួសធ្ងន់ និង២នាក់ទៀតរងរបួសស្រាលកាលពីព្រឹកថ្ងៃទី១០ ខែមករា ឆ្នាំ២០១៧កន្លងទៅ ។
សេចក្តីរាយការណ៍បានឲ្យដឹងទៀតថា ស្ត្រីម្នាក់ឈ្មោះ អោម ឡាច អាយុ៤៥ឆ្នាំ ជាអាជីវករជ្រេអីវ៉ាន់នៅច្រកទ្វារអន្តរជាតិប៉ោយប៉ែត ត្រូវជាកូនស្រីរបស់ស្ត្រីវ័យចំណាស់ឈ្មោះ ឡោ សុត អាយុ៧៧ឆ្នាំ ដែលត្រូវគោកំណាចជល់បណ្ដាលឲ្យរងរបួសធ្ងន់ បានឲ្យដឹងថា គាត់បានស្គាល់ម្ចាស់គោហើយ គឺជាអ្នកភូមិជាមួយគ្នា ដែលបុរសជាប្តីជាគ្រូបង្រៀននៅសាលាឯកជនមួយនៅទីក្រុងប៉ោយប៉ែត ប៉ុន្តែគាត់មិនបានស្គាល់ឈ្មោះឡើយ ។
ស្ត្រីដដែលបន្តទៀតថា ការដឹកគោមកប៉ុស្តិ៍នេះគឺដោយសារតែគាត់ និងសាច់ញាតិបានជួបនិយាយគ្នាជាមួយម្ចាស់គោសុំឲ្យចេញថ្លៃពិនិត្យ និងព្យាបាលម្តាយរបស់គាត់ តែម្ចាស់គោឲ្យត្រឹមតែ២០០ដុល្លារអាមេរិកប៉ុណ្ណោះ ខណៈម្តាយរបស់គាត់កំពុងស្ថិតក្នុងគ្លីនិកទាំងសភាពធ្ងន់ធ្ងរនៅឡើយ ។
ប្រភពពីនគរបាលប៉ុស្តិ៍រដ្ឋបាលសង្កាត់ប៉ោយប៉ែតបានឲ្យដឹងថា រហូតមកដល់ពេលនេះសមត្ថកិច្ចនៅមិនទាន់ស្គាល់អត្តសញ្ញាណម្ចាស់គោនៅឡើយទេព្រោះមិនទាន់ឃើញចូលខ្លួនមកដោះស្រាយ ខណៈម្ចាស់គោកំណាចនេះមិនអាចទាក់ទងសុំការបំភ្លឺបាន ព្រោះមិនស្គាល់លេខទូរស័ព្ទ ៕
ចែករំលែកព័តមាននេះ