ស្ត្រីអ្នកកាសែត លោកស្រី CLARE HOLLINGWORTH ជនជាតិអង់គ្លេស ដែលកាលពីឆ្នាំ១៩៣៩ សរសេរប្រកាសពីការចាប់ផ្តើមសង្គ្រាមលោកលើកទី២ បានទទួលមរណភាពហើយកាលពីថ្ងៃទី១០ មករា
ស្ត្រីអ្នកកាសែត លោកស្រី CLARE HOLLINGWORTH ជនជាតិអង់គ្លេស ដែលកាលពីឆ្នាំ១៩៣៩ សរសេរប្រកាសពីការចាប់ផ្តើមសង្គ្រាមលោកលើកទី២ បានទទួលមរណភាពហើយកាលពីថ្ងៃទី១០ មករា នៅទីក្រុងហុងកុង ក្នុងជន្មាយុ១០៥ឆ្នាំ ។
លោកស្រីក្រោយមកក្លាយជាអ្នកកាសែតតាមដានយកព័ត៌មានពីសង្គ្រាម ហើយចុះយកព័ត៌មានក្នុងជម្លោះជាច្រើនលើពិភពលោក។ ក្នុងទំព័រប្រវត្តិសាស្ត្រ អ្នកយកព័ត៌មានពីសង្គ្រាមរូបនេះជាអ្នកកាសែតដំបូងគេប្រកាសពីការលុកលុយរបស់អាល្លឺម៉ង់ចូលប្រទេសប៉ូឡូញ ។ លោកស្រីទទួលមរណភាពនៅក្រុងហុងកុង ជាកន្លែងគាត់រស់នៅចាប់តាំងពីជាង៣០ឆ្នាំមកហើយ ។ ស្ត្រីអ្នកកាសែតរូបនេះធ្វើការនៅលើទីលាននៃសង្គ្រាម ជាច្រើននៃសតវត្សទី២០ ដូចជាសង្គ្រាមនៅវៀតណាម អាល់ហ្សេរី មជ្ឈិមបូព៌ា ឥណ្ឌា ប៉ាគីស្ថាន និងចិនជាដើម។ លោកស្រីជាស្ត្រីអ្នកកាសែតមានឈ្មោះល្បីល្បាញដោយសារសេចក្តីរាយការណ៍ពីការផ្ទុះសង្គ្រាមលោកលើកទី២ កាលពីឆ្នាំ១៩៣៩ ពេលលោកស្រីទើបចាប់ផ្តើមអាជីពនេះ ។
ពេលអាយុ២៧ឆ្នាំ លោកស្រីទើបចូលធ្វើការក្នុងប្រទេសប៉ូឡូញឱ្យកាសែតអង់គ្លេស DAILY TELEGRAPH ហើយទើបបានរយៈពេលមួយសប្តាហ៍ លោកស្រីក្លាយជាអ្នកកាសែតដំបូងគេប្រកាសពីការលុកលុយរបស់អាល្លឺម៉ង់ ។ ដោយប្រើប្រាស់រថយន្តការទូតអង់គ្លេស ដើម្បីឆ្លងកាត់ព្រំដែនអាល្លឺម៉ង់-ប៉ូឡូញ លោកស្រីអាចថតបានរូបភាពទាំងឡាយនៃរថក្រោះ និងរថពាសដែកអាល្លឺម៉ង់ជាច្រើនរយគ្រឿង ដែលត្រៀមចូលលុកលុយប៉ូឡូញ ។ អត្ថបទកាសែតរបស់លោកស្រីដែលចារជាប្រវត្តិសាស្ត្រនេះមានចំណងជើងថា រថក្រោះ១.០០០គ្រឿង រង់ចាំនៅព្រំដែនប៉ូឡូញ កងពលធំ១០ត្រៀមវាយលុកភ្លាមៗ ។ ៣ថ្ងៃក្រោយមក គឺថ្ងៃទី១ កញ្ញា ឆ្នាំ១៩៣៩ អាល្លឺម៉ង់ចាប់វាយលុកចូលទីក្រុង KOTOWICE របស់ប៉ូឡូញក្បែរព្រំដែន ។ លោកស្រីខំរាយការណ៍ប្រាប់ស្ថានទូតអង់គ្លេសប្រចាំក្រុងវ៉ាសូវី ពីការចាប់ផ្តើមសង្គ្រាម តែពេលនោះស្ថានទូតមិនទាំងជឿផង ៕
ចែករំលែកព័តមាននេះ