បើករថយន្តដេញបំបុកបុរស២នាក់ ក្រោយធ្វើសកម្មភាពយកកាបូបរបស់ជនជាតិចិន
- ភ្នំពេញ
ជនសង្ស័យ២នាក់បានធ្វើសកម្មភាពឆក់កាបូបរបស់បុរសជនជាតិចិនម្នាក់បានសម្រេច ហើយព្យាយាមជិះរត់គេច ក៏ត្រូវបុរសជនជាតិចិន
ជនសង្ស័យ២នាក់បានធ្វើសកម្មភាពឆក់កាបូបរបស់បុរសជនជាតិចិនម្នាក់បានសម្រេច ហើយព្យាយាមជិះរត់គេច ក៏ត្រូវបុរសជនជាតិចិន
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យ២នាក់បានធ្វើសកម្មភាពឆក់កាបូបរបស់បុរសជនជាតិចិនម្នាក់បានសម្រេច ហើយព្យាយាមជិះរត់គេច ក៏ត្រូវបុរសជនជាតិចិនជាម្ចាស់កាបូបបានបើករថយន្តដេញតាមបំបុកពីក្រោយម៉ូតូរបស់ជនសង្ស័យ បណ្ដាលឲ្យជ្រុលរថយន្តទៅបុកតូបលក់ទូរស័ព្ទរបស់បងប្អូនប្រជាពលរដ្ឋ បណ្តាលឱ្យរងការខូចខាត តែសំណាងល្អបានយកកាបូបលុយមកវិញផងដែរ បង្កឱ្យមានការភ្ញាក់ផ្អើលកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី៩ ខែសីហា ឆ្នាំ២០២២ ជិតផ្សារបឹងកេងកង ផ្លូវ៣៨០ កែងផ្លូវ៦៣ ស្ថិតក្នុងសង្កាត់បឹងកេងកងទី១ ខណ្ឌបឹងកេងកង ។
បើតាមប្រភពព័ត៌មានពីសមត្ថកិច្ចបានអោយដឹងថា មុនពេលកើតហេតុ គឺមានបុរសជនជាតិចិនម្នាក់ជាជនរងគ្រោះ បានហៅរថយន្ដតាក់ស៊ីរបស់ក្រុមហ៊ុន LMCAR ម៉ាក ALPHARD ពណ៌ខ្មៅ ពាក់ស្លាកលេខ ភ្នំពេញ 2AU 3200 អោយមកទទួលនៅមុខខារ៉ាអូខេមួយកន្លែង ម្ដុំផ្លូវព្រះមុនីវង្ស ស្ថិតក្នុងសង្កាត់បឹងកេងកងទី១ ខណ្ឌបឹងកេងកង ។
ប្រភពដដែលបន្តថា ពេលនោះអ្នកបើករថយន្តក៏បានរៀបចំអីវ៉ាន់របស់ភ្ញៀវជនជាតិចិននោះដាក់ចូលក្នុងរថយន្ត ចំណែកបុរសជនជាតិចិនវិញឈរកាន់កាបូបយូរដៃមួយ ក៏ស្រាប់តែលេចមុខជនសង្ស័យចំនួន២នាក់ជិះម៉ូតូម៉ាក ហុងដាឃ្លីក ពណ៌ក្រហម ពាក់ស្លាកលេខ ភ្នំពេញ 1IX 1642 បានជិះមកធ្វើសកម្មភាពឆក់យកកាបូបពីជនជាតិចិនបានសម្រេច ហើយក៏នាំគ្នាជិះម៉ូតូរត់គេចខ្លួនតែម្តង។
ប្រភពដដែលបន្តទៀតថា ប៉ុន្តែនៅពេលភ្លាមៗនោះ បុរសជាជនជាតិចិនរូបនេះក៏បានរត់ឡើងទៅបើករថយន្ត ALPHARD ដែលមានអ្នកបើកបរកំពុងតែរៀបចំអីវ៉ាន់ រួចដេញតាមជនសង្ស័យពីក្រោយ រហូតដល់ម្ដុំផ្សារបឹងកេងកង ផ្លូវ៣៨០ កែងផ្លូវ៦៣ ស្ថិតក្នុងសង្កាត់បឹងកេងកងទី១ ខណ្ឌបឹងកេងកងដដែលនោះ ហើយបុរសជនជាតិចិនក៏បើករថយន្តបានបំបុកម៉ូតូរបស់ជនសង្ស័យពីក្រោយ បណ្ដាលឲ្យដួលម៉ូតូតែម្តង។ រីឯរថយន្តវិញក៏ជ្រុលទៅបុកតូបលក់ទូរស័ព្ទដៃរបស់បងប្អូនប្រជាពលរដ្ឋ បណ្តាលឱ្យរងការខូចខាត ហើយរថយន្តខ្ទេចស្រុញផ្នែកខាងមុខ ក៏ដូចជាខូចខាតសម្ភារៈក្នុងផ្ទះអស់មួយចំនួនផងដែរ ។
ដោយឡែកជនសង្ស័យវិញ នៅពេលដែលរថយន្តបើកបុកហើយដួលម៉ូតូ បណ្តាលឱ្យរងរបួសតិចតួច ក៏នាំគ្នារត់គេចខ្លួនបាត់ស្រមោលអស់ ដោយបន្សល់ទុកតែម៉ូតូ១គ្រឿង និងកាបូបលុយរបស់ជនរងគ្រោះនៅកន្លែងកើតហេតុ ។
ពាក់ព័ន្ធក្នុងករណីខាងលើនេះដែរ ភាគីខាងរថយន្តក៏មិនចង់មានរឿងវែងឆ្ងាយអ្វីនោះដែរ និងមិនបានដាក់ពាក្យបណ្ដឹងនោះទេ គឺគ្រាន់តែសុំធ្វើការដោះស្រាយជាមួយនឹងតូបលក់ទូរស័ព្ទដែលរងការខូចខាតតែប៉ុណ្ណោះ ។
ក្រោយពេលកើតហេតុ ភាគីខាងរថយន្តក៏បានសុខចិត្តសងសំណងរបស់របរដែលខូចខាតក្នុងតូបលក់ទូរស័ព្ទ ដើម្បីសុំយករថយន្តទៅធ្វើការជួសជុលខ្លួនឯងវិញ ចំណែកម៉ូតូជនសង្ស័យវិញ ក៏ត្រូវបានប្រគល់អោយសមត្ថកិច្ចយកទៅរក្សាទុក ដើម្បីធ្វើការស្រាវជ្រាវស្វែងរកជនសង្ស័យតាមជំនាញរបស់សមត្ថកិច្ចផងដែរ ៕
ចែករំលែកព័តមាននេះ