បិទវគ្គសិក្ខាសាលាស្តីពីការគ្រប់គ្រងព្រឹត្តិការណ៍កីឡា

ថ្ងៃទី ១១ ខែ មករា ឆ្នាំ ២០១៧
ម៉ោង ០៤:១៥
bopha bopha

រាជធានីភ្នំពេញ ៖ សិក្ខាសាលាស្ដីពីការគ្រប់គ្រងព្រឹត្តិការណ៍កីឡាដែលរៀបចំធ្វើឡើងដោយសហព័ន្ធកីឡាបាល់ទាត់កម្ពុជា អស់រយៈពេល២ថ្ងៃមកនេះ ត្រូវបានធ្វើពិធីបិទកាលពីថ្ងៃទី១០ មករា ឆ្នាំ២០១៧ នៅពហុកីឡដ្ឋានជាតិអូឡាំពិក ។

សិក្ខាសាលាស្ដីពីការគ្រប់គ្រងព្រឹត្តិការណ៍កីឡានេះបានធ្វើឡើងកាលពីថ្ងៃទី៩ មករា ដោយបានការចូលរួមពីសិក្ខាកាមដែលជាមន្ត្រីការិយាល័យនៃមន្ទីរអប់រំយុវជននិងកីឡារាជធានី-ខេត្តចំនួន៤៨នាក់ ។ សិក្ខាសាលានេះធ្វើឡើងក្នុងគោលបំណងពង្រឹង និងពង្រីកធនធានមន្ត្រីដឹកនាំការប្រកួត ពិសេសមន្ត្រីគ្រប់គ្រងព្រឹត្តិការណ៍បាល់ទាត់ (Local General Coordinator) ។

លោក ម៉ៃ តុលា អគ្គលេខាធិការស្ដីទីរបស់សហព័ន្ធកីឡាបាល់ទាត់កម្ពុជាបានឱ្យដឹងថា សិក្ខាសាលាបែបនេះ ត្រូវបានគេរៀបចំធ្វើឡើងមួយឆ្នាំម្ដងនៅមុនពេលព្រឹត្តិការណ៍ប្រកួតកីឡាបាល់ទាត់ធំៗប្រចាំឆ្នាំមកដល់ ។ សិក្ខាសាលានេះមានសារៈសំខាន់ខ្លាំងណាស់ ព្រោះសិក្ខាកាមទាំងអស់ដែលបានឆ្លងកាត់វគ្គនេះ ទៅ នឹងក្លាយជាតួអង្គសំខាន់ក្នុងការរៀបចំបច្ចេកទេសការងារ ឬហៅកាត់ថា ជាអ្នកសម្របសម្រួលលើបញ្ហាក្នុងការប្រកួតដែលតែងតែកើតមានឡើងនូវភាពចម្រូងចម្រាសដោយកាត់បន្ថយបញ្ហាដើម្បីឱ្យដំណើរការនៃការប្រកួតមានដំណើរការល្អ និងទទួលបានជោគជ័យដល់ទីបញ្ចប់ ។

ជាក់ស្ដែង សិក្ខាសាលានេះត្រូវបានរៀបចំធ្វើឡើងនៅមុនពេលការប្រកួតពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១១ ឆ្នាំ២០១៧ ឈានចូលមកដល់ ដែលការប្រកួតជុំទី១នឹងត្រូវចាប់ផ្ដើមពីថ្ងៃទី១៨ មករា ដល់ថ្ងៃទី១ តុលា ។ លោកបានឱ្យដឹងទៀតថា សិក្ខាសាលានេះពិតជាមានសារៈសំខាន់ខ្លាំងណាស់ ព្រោះអាចជួយពង្រឹងសមត្ថភាពមន្ត្រីគ្រប់គ្រងការប្រកួតឱ្យមានការយល់ដឹងបន្ថែមទៀត ជាពិសេសក្នុងការដោះស្រាយវិវាទដែលកើតមានឡើងនៅក្នុងពេលប្រកួត ។ នៅស្រុកគេ សូម្បីតែស្នងការអាជ្ញាកណ្ដាល អាជ្ញាកណ្ដាលតំណាងដឹកនាំក្រុម និងអ្នកសារព័ត៌មានក៏ត្រូវឆ្លងកាត់សិក្ខាសាលាបែបនេះដែរ ព្រោះថាបើសិនជាអ្នកដែលមានការពាក់ព័ន្ធកីឡាបាល់ទាត់ទាំងអស់គ្នាមានការយល់ដឹងនោះ ការប្រកួតនឹងអាចកាត់បន្ថយនូវរាល់បញ្ហា និងភាពចម្រូងចម្រាសទាំងឡាយ ធ្វើឱ្យព្រឹត្តិការណ៍នៃការប្រកួតបាល់ទាត់មានភាពរលូនល្អ និងទទួលបានជោគជ័យ ។

គួររំលឹកផងដែរថា សិក្ខាសាលារយៈពេល២ថ្ងៃមកនេះ មានទាំងការអនុវត្តជាក់ស្ដែងនៅលើទីលាន និងការសិក្សាផ្នែកទ្រឹស្ដីផងដែរ ៕