រលាយដូចអំបិលត្រូវទឹក ! ដល់ថ្ងៃចូលរោងបាត់កូនកំលោះ
ខេត្តកំពង់ចាម ៖ វាពិតជារឿងដែលធ្វើឲ្យក្រុមគ្រួសារកូនក្រមុំមានការអាម៉ាសយ៉ាងខ្លាំង ដែលរោងការបានសង់រួចទៅហើយ ស្រាប់តែកូនកំលោះដ៏សង្ហារ ហើយវ័យក្មេងទៀត …
ខេត្តកំពង់ចាម ៖ វាពិតជារឿងដែលធ្វើឲ្យក្រុមគ្រួសារកូនក្រមុំមានការអាម៉ាសយ៉ាងខ្លាំង ដែលរោងការបានសង់រួចទៅហើយ ស្រាប់តែកូនកំលោះដ៏សង្ហារ ហើយវ័យក្មេងទៀតបែរជារត់ចោលរោងការបាត់ស្រមោល បណ្ដាលឲ្យពិធីអាពាហ៍ពិពាហ៍ត្រូវបានរលាយដូចអំបិលត្រូវទឹកអ៊ីចឹង ។ រោងការដែលគ្មានកូនកំលោះនេះកើតឡើងកាលពីថ្ងៃទី៩ ខែមករា ឆ្នាំ២០១៧ នៅភូមិត្រពាំងឈូក ឃុំតាអុង ស្រុកចំការលើ ខេត្តកំពង់ចាម ។
ប្រភពព័ត៌មាននៅកន្លែងកើតហេតុបានឲ្យដឹងថា រោងការនេះមានកូនកំលោះឈ្មោះ ខែម ចាន់ធូ អាយុ២៥ឆ្នាំ ជាបុគ្គលិកបម្រើការងារនៅក្រុមហ៊ុនទូរស័ព្ទចល័ត Smart មានទីលំនៅខេត្តស្វាយរៀង ចំណែកកូនក្រមុំឈ្មោះ កែម ចំរើន អាយុ៣១ឆ្នាំ រស់នៅភូមិត្រពាំងឈូក ឃុំតាអុង ស្រុកចំការលើ ខេត្តកំពង់ចាម ។
ប្រភពបន្តឲ្យដឹងទៀតថា ភាគីខាងកូនកំលោះដែលបានមកបម្រើការងារនៅស្រុកចំការលើបានឲ្យចៅមហា និងមេបា ចូលដណ្ដឹងកូនក្រមុំតាមប្រពៃណី ដោយព្រមព្រៀងគ្នា និងកំណើតថ្ងៃអាពាហ៍ពិពាហ៍នៅថ្ងៃទី៩ ខែមករា ឆ្នាំ២០១៧ នៅគេហដ្ឋានខាងស្រី ស្រាប់តែដល់ថ្ងៃចូលរោងការ កូនកំលោះបែរជារត់ចោលរោងការបាត់ស្រមោលសូន្យឈឹងទៅវិញ ធ្វើភាគីកូនក្រមុំទទួលរងនូវការអាម៉ាស់យ៉ាងខ្លាំង ហើយថែមទាំងខាតបង់លុយកាក់មួយចំនួនធំទៀត ដោយត្រូវក្នុងការបង់ទៅថ្លែភ្លេង ចុងភៅ សំអាងការ និងក្រុមតន្ត្រីដែលជួលមកសម្រាប់រៀបចំពិធីមង្គលការនេះ ។
ប្រភពព័ត៌មានបានឲ្យដឹងទៀតថា នៅព្រឹកថ្ងៃចូលរោង គេក៏បានឃើញកូនកំលោះបើកឡានមកជិតរោងការដែរ ប៉ុន្តែបន្តិចក្រោយមកស្រាប់តែកូនកំលោះរូបនោះបានបើកឡានទៅវិញបាត់ ធ្វើអាពាហ៍ពិពាហ៍ដែលរំពឹងថានឹងមានការត្រេកអរ និងសប្បាយរីករាយ បែរជាត្រូវរលាយដូចអំបិលត្រូវទឹកទៅវិញ ព្រោះតែគ្មានកូនកំលោះ ។
រហូតមកដល់រសៀលថ្ងៃទី១១ ខែមករា ឆ្នាំ២០១៧នេះ កូនកំលោះដែលត្រូវបានគេចោទប្រកាន់ថា រត់ចោលរោងការ «កោះសន្តិភាព» មិនទំនាក់ទំនងសុំការបំភ្លឺបាននៅឡើយទេ ៕
ចែករំលែកព័តមាននេះ