រិះគន់ឥតសំចៃមាត់ ! ចាប់បានតែតូចតាច បើកមានខ្នងមិនហ៊ានទៅក្បែរផង
ខេត្តកំពង់ស្ពឺ ៖ ស្ត្រីជាអ្នកកត់ឆ្នោតតូចតាចម្នាក់ត្រូវបានសមត្ថកិច្ចនគរបាលក្រុងច្បារមនឃាត់ខ្លួន ដកហូតវត្ថុតាងមួយចំនួនកាលពីរសៀលថ្ងៃទី១០ ខែមករា ឆ្នាំ២០១៧ …
ខេត្តកំពង់ស្ពឺ ៖ ស្ត្រីជាអ្នកកត់ឆ្នោតតូចតាចម្នាក់ត្រូវបានសមត្ថកិច្ចនគរបាលក្រុងច្បារមនឃាត់ខ្លួន ដកហូតវត្ថុតាងមួយចំនួនកាលពីរសៀលថ្ងៃទី១០ ខែមករា ឆ្នាំ២០១៧ នៅចំណុចភូមិពាណិជ្ជកម្ម សង្កាត់រការធំ ក្រុងច្បារមន ។
ស្ត្រីអ្នកកត់ឆ្នោតតូចតាចដែលត្រូវសមត្ថកិច្ចឃាត់ខ្លួនឈ្មោះ ស៊ីម ស៊ីណា អាយុ៤១ឆ្នាំ មានទីលំនៅភូមិរលួស សង្កាត់ច្បារមន ក្រុងច្បារមន ខេត្តកំពង់ស្ពឺ ។
មន្ត្រីនគរបាលព្រហ្មទណ្ឌកម្រិតស្រាលមួយរូបបានប្រាប់ឲ្យដឹងថា កម្លាំងនគរបាលក្រុងច្បារមន បានឃាត់មុខសញ្ញាកត់ឆ្នោតម្នាក់នៅ ដកហូតសៀវភៅកត់លេខចំនួន២ក្បាល វិញ្ញាបណ្ណបត្រ១ និងប្រាក់២០០០០រៀល ។
ក្រោយឃាត់ខ្លួន ស្ត្រីរូបនោះត្រូវបានបញ្ជូនទៅកាន់ការិយាល័យព្រហ្មទណ្ឌកម្រិតស្រាល ដើម្បីបន្តនីតិវិធីបញ្ជូនទៅកាន់សាលាដំបូងខេត្តចាត់ការបន្ត ។
ទាក់ទិននឹងការឃាត់ខ្លួនអ្នកកត់កន្ទុយលេខនេះដែរក៏មានការរិះគន់ពីសំណាក់ប្រជាពលរដ្ឋផងដែរថា អស់លោកសមត្ថកិច្ចហាក់បីដូចជាបង្ក្រាបបានតែអ្នកតូចតាចគ្មានខ្សែគ្មានខ្នងបង្អែក ដើម្បីឲ្យថ្នាក់លើបានឃើញថា ខ្លួនសកម្មនឹងការងារ ដោយឡែកអ្នកមានខ្នងបង្អែក និងខ្សែធំ ដូចជាមន្ត្រីអាវុធហត្ថម្នាក់មានកូនកញ្ច្រែងរាប់សិបនាក់គេមិនដែលឃើញអស់លោកទាំងនោះធ្វើការបង្ក្រាបបានម្តងណាឡើយ ។
មានការលើកឡើងទៀតថា កូនកញ្ច្រែងទាំងនោះមានកត់នៅក្នុងផ្សារកំពង់ស្ពឺដែលមានមេធំឈ្មោះ ធិ ជាមន្ត្រីអាវុធហត្ថខេត្តនិងម្នាក់ទៀតឈ្មោះ ហា៑ន ក៏ជាមន្ត្រីអាវុធហត្ថដូចគ្នា ដែលកូនកញ្ច្រែងរបស់មេឆ្នោតទាំងនេះមិនដែលត្រូវបានចាប់ឃាត់ម្តងណាឡើយ ។
មហាជនដែលដឹងរឿងបានរិះគន់អត់សំចៃមាត់ថា អស់លោកកំពុងតែធ្វើឲ្យពលរមើលឃើញថា អស់លោកធ្វើការលំអៀង បក្សពួកនិយម អ្នកដែលគ្មានខ្សែ គ្មានខ្នងត្រូវអស់លោកចាប់ និងបង្ក្រាប តែអ្នកដែលមានខ្សែ មានខ្នង អស់លោកមិនចាប់បង្ក្រាបទេ ។ ករណីនេះពលរដ្ឋបានដាក់ការសង្ស័យថា ប្រហែលជាមេឆ្នោតធំៗដែលជាមន្ត្រីប៉េអឹមបានសែនព្រេនអស់ហើយមើលទៅ បានជាមិនហា៑នទៅក្បែរ ដើម្បីចាប់បង្ក្រាបបែបនេះ ។
ពលរដ្ឋសំណូមពរថា អស់លោកសមត្ថកិច្ចគួរណាស់តែចាប់ផ្តើមកែលំអពីខ្លួនឯងជាមុនសិន ចាំកែលំអរអ្នកផ្សេង ដូចជាករណីមេឆ្នោតដែលជាមន្ត្រីប៉េអឹមខេត្តអ៊ីចឹងដែរ ខ្លួនជាសមត្ថកិច្ចបែរជាបើកលេងល្បែងស៊ីសង ដែលប្រមុខរាជរដ្ឋាភិបាលហាមឃាត់ សួរថា តើឯណាទៅភូមិឃុំសុវត្ថិភាព?
ចែករំលែកព័តមាននេះ