ប្រទេសថៃ ៖ វិស័យឯកជនបានព្យាករថា ការចំណាយសម្រាប់គ្រោះទឹកជំនន់នៅប៉ែកខាងត្បូងនៃប្រទេសថៃ គឺមិនលើសពី៤២០លានដុល្លារនោះទេ ហើយប៉ះពាល់ដល់លូតលាស់នៃសេដ្ឋកិច្ចជាតិមានទំហំតិចតួចប៉ុណ្ណោះ ។
ទឹកជំនន់បានបំផ្លិចបំផ្លាញខេត្តចំនួន១០ តាំងពីចូលឆ្នាំថ្មីនេះមកម្ល៉េះ ហើយមនុស្សប្រមាណ១លាននាក់បានប៉ះពាល់ និង២១នាក់បានបាត់បង់ជីវិតផងដែរ ។
លោក Chen Namchaisiri ប្រធានសហព័ន្ធឧស្សាហកម្មថៃ (FTI) ថ្លែងថា គណៈកម្មាធិការអចិន្ត្រៃយ៍កណ្តាលនៃពាណិជ្ជកម្ម ឧស្សាហកម្ម និងធនាគារកិច្ច ព្យាករថា ការប៉ះពាល់ដល់សេដ្ឋកិច្ច នឹងស្មើប្រមាណ២៨០លានដុល្លារ គឺមិនលើសពី៤២០លានដុល្លារឡើយ។ ដូច្នេះ វានឹងប៉ះពាល់បន្តិចបន្តួចប៉ុណ្ណោះដល់ GDP ប្រទេស ។ លោកថ្លែងថា ៖ « ទឹកជំនន់ភាគច្រើនធ្វើឲ្យខូចខាតផ្លូវថ្នល់ ស្ពាន និងផ្លូវសម្រាប់ដឹកជញ្ជូនប៉ុណ្ណោះ តែមិនបានប៉ះពាល់ច្រើនដល់ម៉ាស៊ីន ឬដំណើរការផលិតកម្មទេ ដែលជាធម្មតាមានការធានារ៉ាប់រង។ ដូច្នេះហើយការប៉ះពាល់ដល់វិស័យឯកជន គឺមានកម្រិតនៅឡើយ » ។
ប៉ុន្តែវាបង្កឲ្យមានការពន្យារពេលលើការដឹកជញ្ជូនផលិតផលក្នុងតំបន់មួយចំនួន ព្រោះពួកគេត្រូវប្រើប្រាស់ផ្លូវផ្សេង ។ ទោះជាបែបណា ស្ថានការណ៍នឹងដូចដើមវិញនៅចុងសប្តាហ៍នេះ ។
លោក Issara Wongkusolkij ប្រធានសភាពាណិជ្ជកម្មថៃ ក៏បានថ្លែងដែរថា ទឹកជំនន់មិនបានប៉ះពាល់ដល់ស្ថានភាពទេសចរណ៍ទាំងស្រុងនៅប៉ែកខាងត្បូងទេ ។
លោក Tanasak Patimapragorn ឧបនាយករដ្ឋមន្ត្រីថៃ ថ្លែងថា ទឹកជំនន់នេះមិនបានបង្កឲ្យមានការធ្លាក់ចុះនៃចំនួនភ្ញៀវទេសចរក្នុងប៉ែកខាងត្បូងទេ ។ ក្រសួងទេសចរណ៍ និងកីឡា នឹងត្រួតពិនិត្យលើកន្លែងទាក់ទាញភ្ញៀវទេសចរដែលអាចនឹងត្រូវបានខូចខាតក្នុងរយៈពេល១០ថ្ងៃខាងមុខនៅ Chumphon, Nakhon Si Thammarat, Phatthalung និង Songkhla ។
ប្រធានក្រុមប្រឹក្សាជ័រកៅស៊ូធម្មជាតិ លោក Uthai Sonlucksub ថ្លែងថា ប៉ែកខាងត្បូងនៃប្រទេសថៃ គឺជាតំបន់ផលិតជ័រកៅស៊ូដ៏ធំមួយ ហើយទឹកជំនន់ធ្វើឱ្យមានការប៉ះពាល់កសិករ។ លោកថ្លែងថា ៖ « នេះជាការប៉ះពាល់ខ្លាំងបំផុតនៅតំបន់នេះក្នុងរយៈពេល១០ឆ្នាំកន្លងមក។ ទឹកជំនន់នេះ ពិតជាធ្ងន់ធ្ងរណាស់ ។ បញ្ហា គឺក្នុងឆ្នាំនេះ ពួកយើងមានទាំងគ្រោះរាំងស្ងួត និងទឹកជំនន់ ។ ដូច្នេះ វាពិតជាអាក្រក់ណាស់សម្រាប់ការផលិតជ័រកៅស៊ូ ។ តម្លៃជ័រកៅស៊ូនឹងកើនឡើងក្នុងឆ្នាំនេះ ព្រោះតែការផ្គត់ផ្គង់ធ្លាក់
ចុះ » ៕
ចែករំលែកព័តមាននេះ