ខេត្តកំពង់ឆ្នាំង ៖ ពលរដ្ឋនៅក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ដែលមានមុខរបរទិញត្រីសម្រាប់ធ្វើត្រីឆ្អើរលក់ឲ្យឈ្មួញ បានបង្ហាញពីទឹកចិត្តសប្បាយរីករាយ និងកំពុងមមាញឹកក្នុងការឆ្អើរត្រីគ្រប់ៗគ្នា ព្រោះឆ្នាំនេះពួកគាត់និយាយថា សម្បូរត្រីជាងឆ្នាំកន្លងទៅ ។
ពួកគាត់រៀបរាប់ថា ពលរដ្ឋនៅភូមិនេះ មានមុខរបរមួយគឺទិញត្រីសម្រាប់ឆ្អើរលក់ និងបោះដុំឲ្យឈ្នួញរៀងរាល់ឆ្នាំ ។ នៅពេលដល់ខែត្រីត្រូវ គឺគ្រប់ផ្ទះនីមួយៗចាប់ផ្ដើមទិញត្រីមកឆ្អើរគ្រប់ៗគ្នា។ ពួកគាត់និយាយថា ៖ « ក្នុងអំឡុងខ្នើត ខែបុស្សនេះ ផ្ទះនីមួយៗទិញត្រីពី១តោន ទៅជាង២តោនក្នុងមួយថ្ងៃ ហើយជួលកម្មករដោតជាចង្កាក់ឆ្អើរទុកសម្រាប់លក់ឲ្យឈ្មួញមកពីភ្នំពេញ និងតាមបណ្តាខេត្តផ្សេងៗ ។ គិតមកដល់ពេលនេះ ផ្ទះខ្លះឆ្អើរបាន៣ទៅ៥ម៉ឺនក្រាស់ ប៉ុន្ដែមិនទាន់មានឈ្នួញមកយកនៅឡើយទេ ព្រោះត្រីដែលឆ្អើរឆ្អិននោះនៅមិនទាន់ស្ងួតល្អ ទាល់តែស្ងួតខ្លាំង ទើបគេមកទិញ » ។
ដោយសារតែឆ្នាំនេះសម្បូរត្រី ធ្វើឲ្យពួកគាត់សប្បាយរីករាយគ្រប់គ្នា ព្រោះរបរឆ្អើរត្រីនេះបានជួយដោះស្រាយជីវភាពគ្រួសារបានមួយចំណែក ។ ទោះបីជាបែបណា ពួកគាត់ប្រាប់ថា៖ « ថ្វីបើត្រីសម្បូរមែន តែតម្លៃក៏ថ្លៃដែរ ដូចជាត្រីរៀលស្រស់ ថ្លៃពី២.៥០០ទៅ៣.៥០០រៀលក្នុង១គីឡូក្រាម ហើយក្រោយពេលឆ្អើរលក់ចេញវិញ ១ចង្កាក់ថ្លៃ២.៥០០រៀល » ។
យ៉ាងណាក៏ដោយ ពួកគាត់បានសំណូមពរដល់បងប្អូនទាំងអស់សូមជួយគាំទ្រត្រីឆ្អើររបស់ខ្មែរដែលជាត្រីទន្លេពិតៗ មិននាំចូលពីបរទេសដែលមានជាតិគីមីឡើយ។
លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង បានឲ្យដឹងថា ក្នុងអំឡុងត្រីត្រូវកន្លងទៅ គឺចាប់ពីថ្ងៃទី៣ មករា កន្លងមកត្រីរៀល ត្រីលិញសម្រាប់ធ្វើប្រហុក និងឆ្អើរលក់ ចាប់ផ្តើមសម្បូរជាងឆ្នាំមុន ដោយក្នុងមួយថ្ងៃប្រជានេសាទអាចចាប់បានជិត៣០០តោន ។ សព្វថ្ងៃ អ្នកនេសាទមានជាង២ពាន់ទូកដែលកំពុងបណ្តែតមងក្នុងទន្លេ គ្រប់កន្លែងក្នុងខេត្តកំពង់ឆ្នាំង ។ ទោះបីបែបនេះក្តី ផលត្រីបានថមថយវិញនៅថ្ងៃទី៧ដល់ថ្ងៃទី៩ មករា ហើយសង្ឃឹមថា ត្រីនឹងត្រូវម្ដងទៀតនៅខ្នើតខែក្រោយ ៕
ចែករំលែកព័តមាននេះ