រាជធានីភ្នំពេញ ៖ នៅក្នុងឆ្នាំ២០១៦ មានរោងចក្រកាត់ដេរសម្លៀកបំពាក់ជាង១០០ត្រូវបានបិទ ប៉ុន្តែមិនបានធ្វើឱ្យវិស័យមួយនេះថមថយ ឬធ្លាក់ចុះនោះទេ ។ ផ្ទុយទៅវិញ នៅឆ្នាំ២០១៧នេះរំពឹងថា នឹងទទួលបានកំណើនលើសឆ្នាំមុន ដោយសាររោងចក្របើកថ្មីក៏មានចំនួនច្រើនដែរ ។ នេះបើតាមការឲ្យដឹងពីមន្ត្រីក្រសួងការងារ និងបណ្តុះបណ្តាលវិជ្ជាជីវៈ ។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មានប្រសាសន៍ថា កាលពីឆ្នាំ២០១៥ មានរោងចក្រចំនួន៧៧ត្រូវបានបិទ និងមានរោងចក្របើកថ្មីចំនួន៤៣ ហើយនៅឆ្នាំ២០១៦ មានរោងចក្របិទទ្វារចំនួន១៤១ និងបានបើកថ្មីវិញចំនួន១៤៩រោងចក្រដែរ ។ បើប្រៀបធៀបនឹងស្ថានភាពនៅឆ្នាំ២០១៥ គឺអាចអវិជ្ជមានជាងឆ្នាំ២០១៦ ហើយនៅឆ្នាំ២០១៧នេះរំពឹងថា វិស័យកាត់ដេរនៅមានលទ្ធភាពទទួលបានកំណើន បើទោះបីកំណើននេះអាចមានការថយ ឬប្រហាក់ប្រហែលនឹងឆ្នាំ២០១៦ ប៉ុន្តែវាមិនទាន់ជាអវិជ្ជមាននៅឡើយទេ ។
លោក ហេង សួរ បន្ដថា ៖ « ចំនួនរោងចក្របានបិទនៅក្នុងឆ្នាំ២០១៦ វាច្រើនជាងឆ្នាំ២០១៥ បង្កើតជាកង្វល់មួយរបស់សមាគមរោងចក្រកាត់ដេរនៅកម្ពុជា ប៉ុន្តែចំនួនរោងចក្រដែលបើកនៅឆ្នាំ២០១៦ ក៏វាច្រើនជាងឆ្នាំ២០១៥ដែរ ។ បើយើងធ្វើសមតុល្យទៅឃើញថា ការបើកនិងបិទរោងចក្រនេះមានសមតុល្យនឹងគ្នានៅឡើយ អីចឹងបង្ហាញឱ្យឃើញថា ចំនួនរោងចក្រដែលបើកនៅមានច្រើនជាងរោងចក្របិទ » ។
លោកបន្ថែមថា ក្រៅពីរោងចក្រកាត់ដេរសម្លៀកបំពាក់និងផលិតស្បែកជើងនេះ ក៏មានសហគ្រាសជាង៤៦០ផ្សេងទៀតបានបើកថ្មីនៅឆ្នាំ២០១៦ អីចឹងហើយធ្វើឱ្យសមតុល្យនៃកម្លាំងពលកម្មនៅកម្ពុជាអាចរក្សាបានសម្រាប់អ្នកស្វែងរកការងារធ្វើ មិនបានបង្កជាការព្រួយបារម្ភ និងជារឿងអវិជ្ជមានឡើយ ។
ពាក់ព័ន្ធនឹងវិស័យកាត់ដេរនេះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ធ្លាប់មានប្រសាសន៍ថា ៖ « ខ្ញុំមើលមិនទាន់ឃើញមានផលប៉ះពាល់អ្វីនោះទេ ។ ដូចយើងបានដឹងហើយថា វិស័យកាត់ដេរនេះបានបន្ថែមនូវវិស័យកាត់ដេរកាបូបសម្រាប់ធ្វើដំណើរឃើញថា មានសក្តានុពលខ្ពស់ ។ វិស័យកាត់ដេរខាងកាបូបនេះជំរុញឱ្យការកាត់ដេរទូទៅកើនឡើងនូវតម្លៃបន្ថែម នាំចេញទៅសហរដ្ឋអាមេរិកដោយមិនកំណត់បរិមាណ និងមិនជាប់ពន្ធ » ។
លោកបន្តថា ៖ « យើងកំពុងរៀបចំវិស័យនេះឱ្យបានរឹងមាំ និងបន្តជំរុញបន្ថែម ។ ចំពោះខ្ញុំ វិស័យកាត់ដេរកាបូបនេះជាវិស័យពិសេសមួយទៀត មិនមែនជាការប្តូរពីវិស័យកាត់ខោអាវ ទៅកាត់កាបូបនោះទេ ។ ដូច្នេះ វិស័យកាត់ដេរកាបូបនឹងមានការផ្សារភ្ជាប់គ្នា ព្រោះរោងចក្រខ្លះមានទាំងកាត់ដេរ និងកាត់កាបូប។ វិស័យកាត់ដេរនៅកម្ពុជា នៅថ្ងៃខាងមុខអាចនឹងធំធាត់បន្តទៅទៀត ដោយសារសព្វថ្ងៃនេះ កម្ពុជាមានតែកាត់និងដេរ ហើយនៅថ្ងៃក្រោយនឹងមានទាំងការរចនាម៉ូដ ក្រៅពីការកាត់ និងដេរ » ៕
ចែករំលែកព័តមាននេះ