ខេត្តរតនគិរី ៖ មហោស្រពសិល្បៈគងក្រោមគំនិតផ្តួចផ្តើមរបស់លោកប៊ូ ថង ប្រធានគណៈកម្មការទី៤ព្រឹទ្ធសភា និងលោកថង សាវុន អភិបាលខេត្តរតនគិរី ។ មហោស្រព «ប្រារព្ធធ្វើឡើងនៅសាលមហោស្រពសម្តេចតេជោសែន
ខេត្តរតនគិរី ៖ មហោស្រពសិល្បៈគងក្រោមគំនិតផ្តួចផ្តើមរបស់លោកប៊ូ ថង ប្រធានគណៈកម្មការទី៤ព្រឹទ្ធសភា និងលោកថង សាវុន អភិបាលខេត្តរតនគិរី ។ មហោស្រព «ប្រារព្ធធ្វើឡើងនៅសាលមហោស្រពសម្តេចតេជោសែន កាលពីព្រឹកថ្ងៃទី៨ ខែមករា ឆ្នាំ២០១៧ ក្រោមអធិបតីភាពលោកអ៊ុក សុជាតិ រដ្ឋលេខាធិការតំណាងលោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងលោកថង សាវុន អភិបាលខេត្តរតនគិរី ។ មហោស្រពនេះមានការចូលរួមពីក្រុមសិល្បៈគងចំនួន៨ក្រុមពីស្រុក-ក្រុងទាំង៩ ។
លោកអភិបាលខេត្តថ្លែងថា នេះជាលើកទី១ហើយដែលមហោស្រពសិល្បៈគងជនជាតិដើមភាគតិចប្រារព្ធធ្វើឡើងដើម្បីឆ្លុះបញ្ចាំងពីការថែរក្សាវប្បធម៌ប្រពៃណីដ៏ល្អផូរផង់របស់ជនជាតិដើមភាគតិច នៅខេត្តរតនគិរីកុំឱ្យបាត់បង់ ខណៈបច្ចុប្បន្នសម្ភារនិយម សម័យនិយមបាននិងកំពុងវាយលុកសហគមន៍ជនជាតិដើមភាគតិច ។
លោកថង សាវុន ជំរុញឱ្យសហគមន៍ជនជាតិដើមភាគតិចទាំងអស់ក្នុងខេត្តត្រូវខិតខំប្រឹងប្រែងរិះរកបទភ្លេង និងបទចម្រៀង ថ្មីៗសម្រាប់ចូលរួមមហោស្រពឆ្នាំក្រោយ ជាពិសេសត្រូវបង្ហាត់ដល់យុវជន យុវនារីក្នុងសហគមន៍ឱ្យចេះសិល្បៈគងដើម្បីអភិរក្សឱ្យមាននិរន្តរភាព ។
ក្នុងពិធីបើកមហោស្រពសិល្បៈគងជនជាតិដើមភាគតិចនោះលោកអ៊ុក សុជាតិ ជំរុញឱ្យមន្ទីរវប្បធម៌ និងវិចិត្រសិល្បៈខេត្តធ្វើយ៉ាងណាបំផុសយន្តការអភិរក្សសិល្បៈគងឱ្យបានទូលំទូលាយដល់ជនជាតិដើមភាគតិច និងយុវជន ជំនាន់ក្រោយឱ្យបានផុសផុល ។
បន្ទាប់ពីប្រឡងរយៈពេលពេញ១ព្រឹក ជ័យលាភីចំណាត់ថ្នាក់លេខ១បានទៅលើក្រុមសិល្បៈគងស្រុកអូរជុំ ។ ជ័យលាភីចំណាត់ថ្នាក់លេខ២ បានទៅស្រុកវ៉ើនសៃ ។ ជ័យលាភីចំណាត់ថ្នាក់លេខ៣ បានទៅក្រុងបានលុង ។ ជ័យលាភីទាំង៣ក្រុមបានទទួលរង្វាន់លើកទឹកចិត្តពីគណៈកម្មការរៀបចំការប្រឡងដែលមានលោកប៊ូ ឡាំ តំណាងរាស្ត្រជាប្រធានគណៈកម្មការផ្តល់ពិន្ទុ លោកថង សាវុន អភិបាលខេត្ត និងលោករដ្ឋលេខាធិការផងដែរ ៕
ចែករំលែកព័តមាននេះ