រាជធានីភ្នំពេញ ៖ តារាសម្តែងសុខ ស្រីម៉ុច បើបុរសណាលាក់អាថ៌កំបាំងអត្តសញ្ញាណមិនអាចស្រឡាញ់នាងបានទេ ។ ប្រកាន់ជំហរបែបនេះព្រោះតែមិនចង់បានស្នេហ៍បែបភ័យខ្លាច ដូចជាខ្លាចគេមានប្រពន្ធជាដើម ។
កញ្ញាសុខ ស្រីម៉ុច និយាយថា«មានគេស្រឡាញ់ខ្ញុំច្រើន តែមកខុសចិត្តដែលនាងខ្ញុំមិនចង់គឺខ្ញុំមិនចង់ បានស្នេហាប្តីគេនោះទេ ។ ម្ល៉ោះហើយទើបនាងខ្ញុំចង់បានអ្នកស្មោះល្អម្នាក់ បើគ្មានគឺរំពឹងលើវាសនា ។ ពេលនេះគិតគូរតែរឿងសិល្ប:សិនចុះ គ្រាដែលការងារហក់មកជាប់គ្នារហូតដែលនេះជាលទ្ឋផលមួយល្អសម្រាប់នាងខ្ញុំផងដែរ» ។
នៅក្នុងជំនួបជាមួយកញ្ញាសុខ ស្រីម៉ុចកាលពីពេល ថ្មីៗកន្លងមកនាងបញ្ជាក់ថា ខណៈដែលអាជីពសិល្បៈរបស់នាងកំពុងស្ទុះ ឡើងមានបុរសសម្បូរទ្រព្យមួយចំនួនតាមថ្ពក់ស្នេហ៍នាង ។
«និយាយតាមត្រង់ កន្លងមកមានទាំងអ្នកជំនួញ មន្ត្រីធំ ឧកញ៉ា និងផ្កាយ១ ផ្កាយ២ ជាដើមតាមស្រលាញ់ខ្ញុំ ដោយសន្យាឱ្យរបស់ទ្រព្យជាថ្នូរនឹងរឿងស្នេហា តែខ្ញុំមិនទទួល។ នាងខ្ញុំមិនហ៊ានទទួលស្នេហ៍ប្រុសអ្នកមាន ឬក៏បុរសមានអំណាចបុណ្យស័ក្ដិខ្ពង់ខ្ពស់ ព្រោះនាងខ្ញុំខ្លាចប៉ះស្នេហ៍ប្ដីគេនាំឱ្យរងទឹកភ្នែក ។ បើខ្ញុំព្រមទទួលស្នេហាមន្ត្រីធំម្ល៉េះខ្ញុំហ៊ឺហាមានវីឡា រថយន្ត ទំនើបៗជិះឡូយឆាយបាត់ ហើយៗក៏មិនខ្វះទ្រព្យចាយដែរតែខ្ញុំមិនចង់ប្រឡូកប្រឡាក់នឹងស្នេហាលោតឆត្រ ទើបនៅប្រឹងតស៊ូចិញ្ចឹមជីវិតជាមួយអាជីពសិល្បៈបន្តទៀត» ។
តារាភាពយន្តរូបស្រស់កញ្ញាសុខ ស្រីម៉ុច ចុងក្រោយនេះហាក់លេចធ្លោគួរឱ្យកត់សម្គាល់ដោយក្រសោបបានឱកាសថតភាពយន្តជាបន្តបន្ទាប់ ខណៈមានដំណឹងថាមន្ត្រីធំសុំចិញ្ចឹមជាស្រីស្នេហ៍ ។
កញ្ញាសុខ ស្រីម៉ុច ប្រឡូកសិល្បៈជាង៥ឆ្នាំមកនេះបានចូលរួមសម្តែងភាពយន្តជាច្រើនរឿង ។
ជាក់ស្ដែងអំឡុងពេលនេះនាងកំពុង ថតភាពយន្ត៤រឿងព្រមគ្នា ។ លើសពីនេះនាងកំពុងត្រៀមចូលច្រៀងនៅផលិតកម្មមួយដែលមានគោលការណ៍ផលិតតែបទនិពន្ធថ្មី ។
ស្រីម៉ុច ធ្លាប់ចូលរួមសម្ដែងក្នុងខ្សែភាពយន្តជាច្រើនរឿងទាំងរឿងភាគ និងរឿងដុំដូចជារឿង«ល្បិចនាយកម្សត់» «ជីវិតនាងរក្សា» «កម្មលោកីយ៍» «មនុស្សគ្មានតម្លៃ» «ពន្លកស្នេហ៍ក្បែរជាយដែន» និងរឿង«ស្ដេចកន» ជាដើម។ លើសពីនេះស្រីម៉ុចកំពុងថត៤រឿងទៀតព្រមគ្នា មានរឿង«កំលោះយំក្រមុំសើច» «ដួងចន្ទ» «ចម្ការលាក់ស្នេហ៍» និងរឿង«អំបិល» ជាដើមដោយភាគច្រើននាងសម្ដែងជាតួរង ។ កន្លងមកស្រីម៉ុច ធ្លាប់សម្តែងជាតួឯកក្នុងរឿង «ល្បិចនាយកម្សត់» ក្រៅពីនេះជាតួរង ៕
ចែករំលែកព័តមាននេះ