ខេត្តឧត្តរមានជ័យ ៖ ស្ត្រីម្នាក់ ខណៈទៅទារលុយ៦ពាន់បាតពីនារីវ័យក្មេងម្នាក់ដែលជំពាក់យូរហើយមិនព្រមសង ស្រាប់តែត្រូវនារីវ័យក្មេងរូបនោះវាយជាច្រើនដៃបណ្តាលឱ្យរងរបួសធ្ងន់ ។ ហេតុការណ៍នេះកើតឡើងកាលពីវេលាម៉ោង៤ និង៣០នាទីល្ងាច ថ្ងៃទី១០ ខែមករា ឆ្នាំ២០១៧ នៅភូមិគីរីវ័ន សង្កាត់កូនគ្រៀល ក្រុងសំរោង ខេត្តឧត្តរមានជ័យ ។
ស្ត្រីរងគ្រោះឈ្មោះ ចិន ស្រីលីស អាយុ២៧ឆ្នាំ រស់នៅភូមិគីរីវ័ន សង្កាត់កូនគ្រៀល ក្រុងសំរោង បានរងរបួសជាំភ្នែក និងដងខ្លួនជាច្រើនកន្លែង ចំណែកនារីវ័យក្មេងដៃដល់ឈ្មោះ កប ស្រីល័ក្ខ អាយុ១៨ឆ្នាំ រស់នៅភូមិសង្កាត់ជាមួយគ្នា ។
យោងតាមរបាយការណ៍ប៉ូលិសបានឱ្យដឹងថា មុនពេលកើតហេតុ ស្ត្រីរងគ្រោះបានដើរទៅទារលុយពីនារីវ័យក្មេងដៃដល់ចំនួន៦ពាន់បាតដែលជំពាក់យូរយារណាស់មកហើយ មិនព្រមសង នៅពេលស្ត្រីរងគ្រោះទៅទារលុយ ស្រាប់តែនារីវ័យក្មេងដៃដល់បានស្ទុះមកវាយតប់ជាច្រើនដៃ បណ្តាលឱ្យរងរបួសធ្ងន់ធ្ងរ ។
របាយការណ៍បន្តទៀតថា បន្ទាប់ពីត្រូវនារីដៃដល់វាយរួច ស្ត្រីរងគ្រោះបានរត់មកប្តឹងប៉ូលិស ទើបសមត្ថកិច្ចចុះទៅឃាត់ខ្លួននារីដៃដល់រូបនោះមកអធិការដ្ឋានក្រុងសំរោង ធ្វើការសួរចម្លើយ ។
នៅចំពោះមុខសមត្ថកិច្ច នារីដៃដល់បានសារភាពថា ខ្លួនពិតជាបានជំពាក់លុយស្ត្រីរងគ្រោះពិតប្រាកដមែន និងបានវាយទៅលើស្ត្រីរងគ្រោះមែន ។ យោងតាមចម្លើយសារភាព សមត្ថកិច្ចបានកសាងសំណុំរឿងបញ្ជូនទៅស្នងការដ្ឋាននគបាលខេត្ត ដើម្បីចាត់ការបន្តតាមនិតិវិធីច្បាប់ ៕
ចែករំលែកព័តមាននេះ