រថយន្តក្រុង ហ៊ាតុង បើកកៀររថយន្តពលរដ្ឋ តៃកុងបើករត់គេចខ្លួន
ខេត្តបន្ទាយមានជ័យ ៖ រថយន្តក្រុងក្រុមហ៊ុន ហ៊ា តុង ដឹកអ្នកដំណើរមួយគ្រឿង បង្កគ្រោះថ្នាក់ចរាចរណ៍បើកបុករថយន្ត ពលរដ្ឋ រួចតៃកុងបើករត់គេចយករថយន្តមកផ្លុងចោលនៅមុខក្រុមហ៊ុន
ខេត្តបន្ទាយមានជ័យ ៖ រថយន្តក្រុងក្រុមហ៊ុន ហ៊ា តុង ដឹកអ្នកដំណើរមួយគ្រឿង បង្កគ្រោះថ្នាក់ចរាចរណ៍បើកបុករថយន្ត ពលរដ្ឋ រួចតៃកុងបើករត់គេចយករថយន្តមកផ្លុងចោលនៅមុខក្រុមហ៊ុន
ក្រុងប៉ោយប៉ែត ៖ រថយន្តក្រុងក្រុមហ៊ុន ហ៊ា តុង ដឹកអ្នកដំណើរមួយគ្រឿង បង្កគ្រោះថ្នាក់ចរាចរណ៍បើកបុករថយន្ត ពលរដ្ឋ រួចតៃកុងបើករត់គេចយករថយន្តមកផ្លុងចោលនៅមុខក្រុមហ៊ុន នៅជាប់ផ្លូវជាតិលេខ៥ ស្ថិតក្នុងក្បាលស្ពាន២ សង្កាត់ និងក្រុងប៉ោយប៉ែត។ តាមប្រភពពីសមត្ថកិច្ចនគរបាលចរាចរណ៍ក្រុងប៉ោយប៉ែត បានឲ្យដឹងថា រថយន្តក្រុងរបស់ក្រុមហ៊ុនយីហោ ហ៊ា តុង ដឹកជញ្ជូនអ្នកដំណើរមួយគ្រឿងមានពាក់ស្លាក លេខ ភ្នំពេញ 3D-1238 មួយគ្រឿងនេះ បានបើកបុកកៀររថយន្ត របស់ស្ត្រីម្នាក់ នៅចំណុចផ្លូវបេតុងមួយកន្លែង មុខសាលារៀនឯកជន អេបផល ស្ថិតនៅក្នុងភូមិបាលិលេយ្យ១ ខណៈពេលស្ត្រីជាជនរងគ្រោះបានបើករថយន្ត ម៉ាក ប៉ាហ្សេរ៉ូ ចាំទទួលយកកូនចេញពីសាលារៀនឯកជន នោះ ហើយក៏ត្រូវរថយន្តក្រុងខាងលើនោះ បើកបរគ្មានការប្រុងប្រយ័ត្ន ក៏បណ្តាល មកពាររថយន្តស្ត្រីរងគ្រោះដែលបើកបញ្ច្រាស ទិសគ្នា បណ្តាលឲ្យខូចខាតមួយចំហៀងយ៉ាងដំណំផងដែរ។
សមត្ថកិច្ចបានឲ្យដឹងថា តៃកុងរថយន្តក្រុងខាងលើ ក្រោយពេលកើតហេតុ មិនបានឈប់រថយន្ត នៅកន្លែងកើតហេតុនោះ គឺគេបានបន្ថែមល្បឿន បើករត់គេចយករួចខ្លួន និងបានយករថយន្តមកផ្លុងចោល នៅទីស្នាក់ការរបស់ខ្លួន ហើយ ចុះគេចខ្លួនបាត់ស្រមោលតែម្តង។ តែទោះជាបែបណាក្តី ករណីគ្រោះថ្នាក់ចរាចរណ៍នេះ ត្រូវបានជនរងគ្រោះប្តឹងសមត្ថកិច្ចជំនាញផ្នែកសណ្តាប់ធ្នាប់សាធារណៈក្រុងប៉ោយប៉ែត ឲ្យជួយអន្តរាគមន៍ រកយុត្តិធម៌ ទើបគេឃើញមានសមត្ថកិច្ចជំនាញចុះមកតាមចាប់យករថយន្តក្រុង ដែលបង្កទៅរក្សាទុកនៅអធិការដ្ឋាននគរបាលក្រុងប៉ោយប៉ែត ជាបណ្តោះអាសន្ន ដើម្បីឲ្យតំណាងក្រុមហ៊ុន ចូលខ្លួនទៅដោះស្រាយគ្នាតាមនីតិវិធីផងដែរ។
ប្រជាពលរដ្ឋនៅប៉ោយប៉ែត បាននាំគ្នាលើកឡើងថា ជារឿយៗកន្លងមក គេតែងសង្កេតឃើញ តៃកុងរថយន្ត ក្រុងមួយចំនួនបើកបរ ដោយល្បឿនលឿន ខ្វះការប្រុងប្រយត្ន័ និងគ្មានសុជីវធម៌ទេ ហើយនៅពេលដែលមានករណី គ្រោះថ្នាក់ចរាចរណ៍អ្វីមួយកើតឡើង គឺពួកគេមិនមានទំនួលខុសត្រូវឡើយ ដោយពួកគេអាងខ្នងបង្អែក មានអ្នកកាងចេញមុខមកដោះស្រាយ ហើយពួកគេចាត់ទុកជីវិតពលរដ្ឋ ដូចជាជិវិតសត្វធាតុយ៉ាងអញ្ចឹង។ ដូចច្នេះពួកគាត់ជាពលរដ្ឋសូមអំពាវនាវដល់សមត្ថកិច្ច ក្រសួងស្ថាប័នជំនាញ ក៏ដូចជាសម្តេចតេជោ មេត្តាជួយរឹតបន្តឹង នូវបញ្ហាច្បាប់ចរាចរណ៍ឲ្យមានប្រសិទ្ធភាពផង ចៀសវាងកុំឲ្យពួកគេចេះហ៊ានធ្វើអ្វីតាមតែអំពើរចិត្តបែបនេះ តទៅទៀត ដើម្បីឲ្យពួកគាត់រស់នៅមានភាពកក់ក្តៅទៅថ្ងៃអនាគតផង៕
ចែករំលែកព័តមាននេះ