គោកំណាច១ក្បាល ដេញជល់អ្នកស្រុកផ្អើលពេញភូមិ
ខេត្តបន្ទាយមានជ័យ ៖ យ៉ាងហោចណាស់មនុស្សចាស់ក្មេង៣នាក់ បានរងរបួសធ្ងន់ស្រាលកាលពីព្រឹកថ្ងៃទី១ ខែមករា ឆ្នាំ២០១៦ ដោយសារគោ១ក្បាលក្នុងហ្វូងមួយដេញជល់
ខេត្តបន្ទាយមានជ័យ ៖ យ៉ាងហោចណាស់មនុស្សចាស់ក្មេង៣នាក់ បានរងរបួសធ្ងន់ស្រាលកាលពីព្រឹកថ្ងៃទី១ ខែមករា ឆ្នាំ២០១៦ ដោយសារគោ១ក្បាលក្នុងហ្វូងមួយដេញជល់ ហើយបង្កការភ្ញាក់ផ្អើលពេញភូមិ។ ហេតុការណ៍ដ៏កម្រ និងចម្លែកនេះ បានកើតឡើងនៅភូមិសាមគ្គីមានជ័យ សង្កាត់ និងក្រុងប៉ោយប៉ែត។ ជនរងគ្រោះដោយសារគោដេញជល់នេះគេស្គាល់អត្តសញ្ញាណច្បាស់តែស្ត្រីចំណាស់ម្នាក់ប៉ុណ្ណោះគឺឈ្មោះ ឡោ សុត អាយុ៧៧ឆ្នាំ មានទីលំនៅក្នុងភូមិកើតហេតុ។
ចំណែក២នាក់ទៀត ម្នាក់ជាក្មេងប្រុសអាយុប្រហែល១០ឆ្នាំ និងម្នាក់ទៀតជាប្រពន្ធលោក មុំ ម៉ារិន មេភូមិសាមគ្គីមានជ័យ។ ស្ត្រីចំណាស់ឈ្មោះឡោ សុត ត្រូវគោដេញជល់ចំទ្រូង បន្ទាប់មកចំកំភួនជើងឆ្វេងដេរជាច្រើនថ្នេរ។ អ្នកស្រុកនិយាយថា គោខាងលើ ក្រោយពីដេញជល់ស្ត្រីចំណាស់ឲ្យរបួសរួចមក ក៏បន្តទៅដេញជល់ក្មេងប្រុសដួលលើពំនូកខ្សាច់ថែមទៀត ប៉ុន្តែត្រូវអ្នកស្រុកជួយទាន់។ ចំណែកប្រពន្ធលោកមេភូមិក៏ត្រូវបានគោដដែលដេញជល់គ្រេចដៃតែត្រូវលោកមេភូមិជួយទាន់។
គោកំណាច១ក្បាលនេះក្រោយបង្ករបួសដល់អ្នកស្រុក ដំបូងគ្មាននរណាហ៊ានចូលចាប់ទេព្រោះ គ្រាន់ទៅជិតក៏មិនបានផង។ ដោយសារគោនោះគ្មានក្រឡុះ ឬខ្សែហើយគ្រប់គ្នាចង់បានភស្តុតាងជាក់ស្តែងអ្នកស្រុកបានប្រើឧបករណ៍សំណាញ់គ្របអីវ៉ាន់លើរថយន្តទៅបោះគ្របលើគោនោះទើបចាប់បានចងខ្សែវិញ។ ប្រភពថា ហ្វូងគោអនាធិបតេយ្យនោះ ជារបស់គ្រួសារមួយប្តីជាគ្រូបង្រៀនសាលាឯកជនមួយនៅក្រុងប៉ោយប៉ែត។ គេឃើញនគរបាលប៉ុស្តិ៍រដ្ឋបាលសង្កាត់ប៉ោយប៉ែតម្នាក់ បានចុះដល់កន្លែងកើតហេតុសួរនាំគ្រួសារអ្នករងគ្រោះផងដែរ។
គួរបញ្ជាក់ថា នៅក្រុងប៉ោយប៉ែតមានហ្វូងគោជាច្រើនត្រូវបានគេលែងចោលឲ្យដើរដេកអនាធិបតេយ្យពាសវាលពាសកាល ធ្វើឲ្យអ្នកដំណើរព្រួយបារម្ភអំពីសុវត្ថិភាពចរាចរណ៍ ខណៈអ្នកខ្លះក្តៅក្រហាយហ្វូងគោស៊ីផលដំណាំ ឯគ្រួសារខ្លះទៀតខឹងនឹងហ្វូងគោដេក និងជុះអាចម៌ដាក់មុខផ្ទះជារៀងរាល់ព្រឹក។ គេពុំដឹងថាម្ចាស់ហ្វូងគោទាំងនោះមានខ្នងបង្អែក ឬពាក់ផ្កាយប៉ុន្មានទេ ទើបអាជ្ញាធរ និងសមត្ថកិច្ចនៅក្រុងប៉ោយប៉ែតមិនហ៊ានប៉ះបណ្តោយឲ្យកើតមានជាបន្តបន្ទាប់ និងរងការរិះគន់ពីអ្នកស្រុកយ៉ាងដូច្នេះ៕
ចែករំលែកព័តមាននេះ