ខេត្តពោធិ៍សាត់ ៖ លោកវរៈសេនីយ៍ទោ នាង វុធ អធិការនគរបាលស្រុកបាកាន បានឲ្យដឹងថា កាលពីថ្ងៃទី០៩ ខែមករា ឆ្នាំ២០១៧ ប្រជាពលរដ្ឋឈ្មោះ គឹម គីម ភេទប្រុស
ខេត្តពោធិ៍សាត់ ៖ លោកវរៈសេនីយ៍ទោ នាង វុធ អធិការនគរបាលស្រុកបាកាន បានឲ្យដឹងថា កាលពីថ្ងៃទី០៩ ខែមករា ឆ្នាំ២០១៧ ប្រជាពលរដ្ឋឈ្មោះ គឹម គីម ភេទប្រុស នៅភូមិប្រខ្នាយ ឃុំស្នាមព្រះ ស្រុកបាកានខេត្តពោធិ៍សាត់ បានមកប្ដឹងថា កាលពីល្ងាចថ្ងៃទី០៨ គាត់បានបាត់ក្របីមេមួយក្បាលភ្នែកបាយម្ខាង ខ្វាក់ម្ខាង ដែលចងឲ្យស៊ីស្មៅនៅព្រៃល្បះខាងក្រោយភូមិ។ នៅថ្ងៃទី០៩ គាត់បានដើររកស្រាប់តែឃើញមនុស្ស០៤នាក់ កំពុងដឹកឡើងឡាននៅចំណុចអតីតដេប៉ូខ្សាច់តាម៉ៅ ស្ថិតក្នុងភូមិស្វាយអាត់ សង្កាត់ស្វាយអាត់ ក្រុងពោធិ៍សាត់។
លោកអធិការបន្តទៀតថា ទទួលបានបណ្ដឹងនេះភ្លាម លោកបានសហការជាមួយនគរបាលព្រហ្មទណ្ឌកម្រិតស្រាលខេត្ត និងនគរបាលប៉ុស្តិ៍ស្វាយអាត់ ចុះទៅដល់គោលដៅ ជាបន្ទាន់នៅវេលាម៉ោង៥ និង៣០នាទីល្ងាច។ នៅពេលឃើញសមត្ថកិច្ចទៅដល់ជនទាំង០៤នាក់ ដែលកំពុងដេញក្របីឡើងឡាននោះបាននាំគ្នារត់គេចបាត់អស់បន្សល់ទុកឡានកង់០៦មួយគ្រឿង និងក្របីចំនួន០៤ក្បាល សមត្ថកិច្ចក៏យកទៅដាក់នៅប៉ុស្តិ៍រដ្ឋបាលស្នាមព្រះដើម្បីត្រួតពិនិត្យ និងស្រាវជ្រាវបន្ត។
លោកវរៈសេនីយ៍ទោ ម៉ូ លីដា ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបានឲ្យដឹងថា បន្ទាប់ពីត្រួតពិនិត្យឃើញក្របីមេមួយក្បាលខ្វាក់ភ្នែកម្ខាង និងម្ខាងទៀតបាយភ្នែកនោះក៏បានធ្វើកិច្ចសន្យាស្នាមមេដៃប្រគល់ទៅឲ្យម្ចាស់ដើមវិញ តាមការឯកភាពរបស់លោកព្រះរាជអាជ្ញាអមសាលាដំបូងខេត្ត និងលោកស្នងការនគរបាលខេត្ត។
ដោយឡែកក្របីចំនួន០៣ក្បាលទៀតក្នុងនោះមិនទាន់ចាក់ក្រឡុស០២ក្បាលមិនទាន់ស្គាល់អត្តសញ្ញាណនៅឡើយទេ។ សមត្ថកិច្ចកំពុងផ្សព្វផ្សាយដល់បងប្អូនប្រជាពលរដ្ឋណាដែលមានបាត់ក្របីសូមមកពិនិត្យមើលនៅប៉ុស្តិ៍រដ្ឋបាលស្នាមព្រះ ស្រុកបាកានដើម្បីប្រគល់ជូនវិញដោយមានសាក្សី និងមានការទទួលស្គាល់ច្បាស់លាស់៕
ចែករំលែកព័តមាននេះ