ខេត្តពោធិ៍សាត់ ៖ រថយន្តដឹកជញ្ជូនបទ ល្មើសព្រៃឈើមួយគ្រឿងបានត្រូវនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃសហការជាមួយមន្ត្រីមេព្រៃ ចាប់ឃាត់នៅចំណុចភូមិឈើទាលខ្ពស់ ឃុំក្បាលត្រាច ស្រុកក្រគរ កាលពីថ្ងៃទី៧ មីនា ឆ្នាំ២០១១ វេលាម៉ោង៤ទៀបភ្លឺ ខណៈពេលកំពុងធ្វើដំណើរលើផ្លូវជាតិលេខ៥ ក្នុងទិសដៅពីបាត់ដំបងទៅភ្នំពេញ។
សមត្ថកិច្ចឱ្យដឹងថា នៅវេលាម៉ោង៤ទៀបភ្លឺថ្ងៃទី៧ មីនា បន្ទាប់ពីភ្នាក់ងារផ្តល់ព័ត៌មានថា មានរថយន្តទួរីស១២កៅអី ពណ៌ទឹកប្រាក់ ពាក់ស្លាកលេខ បាត់ដំបង 2A-3977 លួចដឹកបទល្មើសព្រៃឈើភ្លាម កម្លាំងនគរបាលប្រឆាំងបទល្មើសសេដ្ឋកិច្ចក្រសួងសហការជាមួយមន្ត្រី មេព្រៃដែលចល័តលើផ្លូវជាតិលេខ៥ បានស្ទាក់ និងបើកប្រដេញតាមក្រោយជាប់រហូត ។ លុះទៅដល់ចំណុចភូមិឈើទាលខ្ពស់ ឃុំក្បាលត្រាច ស្រុកក្រគរ អ្នកបើកបរមិនស្គាល់ឈ្មោះ ទំនងជាដឹងខ្លួនក៏អែបរថយន្តឈប់ក្បែរចិញ្ចើមថ្នល់ទុកចោលនៅទីនោះ រួចហើយបើកទ្វារចេញគេចខ្លួនបាត់ ។ ភ្លាមៗនោះ សមត្ថកិច្ចយើងបានអូសរថយន្តយកមករក្សាទុកនៅផ្នែករដ្ឋបាលព្រៃឈើក្រគរ និងបានបើកត្រួតពិនិត្យមើលក្នុងរថយន្តឃើញមានផ្ទុកឈើគ្រញូង ចំនួន១៥៩ដុំ មានទម្ងន់ស្មើនឹង៣២៦គីឡូក្រាម ។
ប្រភពព័ត៌មាននិយាយថា ពេលសមត្ថកិច្ចចាប់ឃាត់យកមករក្សាទុកនៅផ្នែករដ្ឋបាលព្រៃឈើក្រគរនោះ គេឃើញបុរសម្នាក់ជិះរថយន្តម៉ាកឡិចស៊ីស ពណ៌ស្ករ ដែលគេស្គាល់ថា ជាមន្ត្រីប៉េអឹមខេត្តកំពង់ឆ្នាំង បានមកធានាដោះស្រាយដើម្បីយករថយន្តទៅវិញ ប៉ុន្តែសមត្ថកិច្ចខាងខេត្តពោធិ៍សាត់មិនយល់ព្រម ដោយសារបំពេញបែបបទតាមនីតិវិធីគេដឹងឮអស់ទៅហើយ ។ ប្រភពដដែលនិយាយទៀតថា សព្វថ្ងៃឈើប្រណីតពិសេសប្រភេទគ្រញូង បេង នាងនួន អស់ពីក្នុងព្រៃហើយ បើសិនជាសំបូរដូចមុនវិញ មិនដឹងជាឈ្មួញឈើសប្បាយដឹកជញ្ជូនយ៉ាងណាទេ ខណៈពេលដែលអតីតព្រះរាជអាជ្ញាកំពុងជាប់ឃុំក្នុងពន្ធនាគារនោះ៕
ចែករំលែកព័តមាននេះ