រដ្ឋការចប់អាណត្ដិរបស់ប្រធានាធិបតីអាមេរិក លោកបារ៉ាក់ អូបាម៉ា កាលពីថ្ងៃទី៩ មករា បានប្រកាសដាក់ទណ្ឌកម្មថ្មីៗទៀត ប្រឆាំងបណ្ដាអ្នកទទួលខុសត្រូវរុស្ស៊ី ក្នុងនោះមានមនុស្សជំនិតម្នាក់របស់លោកប្រធានាធិបតីវ្ល៉ាឌីមៀរ ពូទីន ដែលការប្រកាសទណ្ឌកម្មថ្មីៗនោះធ្វើឡើង ខណៈសល់ពេល១០ថ្ងៃទៀត លោកដូណាល់ ត្រាំ ជាអ្នកចង់ខិតជិតរុស្ស៊ីចូលកាន់សេតវិមាន ។
ក្រោយការបណ្ដេញចេញពីសហរដ្ឋអាមេរិក នូវអ្នកការទូតរុស្ស៊ី៣៥នាក់ ដែលចោទប្រកាន់ថា លូកដៃចូលក្នុងការបោះឆ្នោតប្រធានាធិបតីអាមេរិក រដ្ឋាភិបាលរបស់លោកអូបាម៉ា ពេលនេះផ្ដោតលើការដាក់ទណ្ឌកម្មប្រឆាំងជនជាតិរុស្ស៊ី៥នាក់ទៀត ក្នុងនោះមានអ្នកជាប់ចោទ២នាក់ជាអ្នកសម្លាប់ជនប្រឆាំងអតីតចារបុរស លោកអេឡិចសាន់ដ្រ៏ លីតវី ណេនកូ ដែលរងការបំពុលដោយសារធាតុ POLONIUM នៅទីក្រុងឡុងដ៍ កាលពីឆ្នាំ២០០៦ ។ ជនទាំង២នាក់ គឺលោកអានដ្រេយ លូហ្គោវ៉ូអីុ ជាភ្នាក់ងារសម្ងាត់រុស្ស៊ី ក្លាយជាសមាជិកសភា និងលោកឌីមីឌ្រី កូវទុន ជាពាណិជ្ជករម្នាក់ ។
រតនាគារអាមេរិក ក៏ដាក់ទណ្ឌកម្មដែរប្រឆាំងរដ្ឋអាជ្ញា លោកអាឡិចសាន់ឌ័រ បាស្រីុគីន ជាមនុស្សជំនិតរបស់លោកពូទីន និងជាប្រមុខគណៈកម្មាធិការស្រាវជ្រាវសហព័ន្ធ មានមុខងារដូច FBI អាមេរិក ដែលធ្វើការស៊ើបអង្កេតពួកអ្នកប្រឆាំងនឹងប្រមុខវិមានក្រឹមឡាំង ។ ទណ្ឌកម្មប្រឆាំងអ្នកទាំងនោះ មានដូចជាផ្អឹបទុកទ្រព្យសម្បត្ដិពួកគេដែលមាននៅសហរដ្ឋអាមេរិក ហាមឃាត់ពួកគេមិនឱ្យស្នាក់អាស្រ័យក្នុងសហរដ្ឋអាមេរិកជាដើម ៕
ចែករំលែកព័តមាននេះ