រាជធានីភ្នំពេញ ៖ ក្រោយការឡើងប្រដាល់ហើយចាញ់បន្តបន្ទាប់នាពេលចុងក្រោយ អ្នករៀបចំកម្មវិធីប្រដាល់នៅលើសង្វៀនទូរទស្សន៍អាស៊ីអាគ្នេយ៍ និងសង្វៀនទូរទស្សន៍ផ្សេងទៀតសុទ្ធតែបានបង្ហាញជំហរលែងចង់ផ្គូផ្គង
រាជធានីភ្នំពេញ ៖ ក្រោយការឡើងប្រដាល់ហើយចាញ់បន្តបន្ទាប់នាពេលចុងក្រោយ អ្នករៀបចំកម្មវិធីប្រដាល់នៅលើសង្វៀនទូរទស្សន៍អាស៊ីអាគ្នេយ៍ និងសង្វៀនទូរទស្សន៍ផ្សេងទៀតសុទ្ធតែបានបង្ហាញជំហរលែងចង់ផ្គូផ្គងកីឡាករផាន់ គ្រាន់ ឱ្យឡើងប្រកួតនៅលើសង្វៀនរបស់ពួកគេទៀតហើយ ។
ជំហរបែបនេះចាប់ផ្ដើមកើតមានបន្ទាប់ពីកីឡាកររូបនេះបណ្ដោយខ្លួនឱ្យឡើងទម្ងន់ធ្វើឱ្យប៉ះពាល់ដល់សមត្ថភាពប្រកួតស្ទើរតែគ្រប់ពេលឡើងរេញ ។
លោកញាណ សុធី អ្នករៀបចំកម្មវិធីប្រដាល់ប្រចាំសង្វៀនទូរទស្សន៍អាស៊ីអាគ្នេយ៍បានបង្ហាញពីការមិនសប្បាយចិត្តបន្ទាប់ពីផ្គូផ្គងឱ្យកីឡាករផាន់ គ្រាន់ ឡើងប្រកួតប៉ុន្មានលើកចុងក្រោយទទួលបរាជ័យជារឿយៗធ្វើឱ្យអ្នកគាំទ្រមិនសប្បាយចិត្ត ។ លោកថា ហេតុផលដែលជើងខ្លាំងរូបនេះបន្តចាញ់នៅលើសង្វៀនម្ដងហើយម្ដងទៀត គឺបណ្ដាលមកពីគេបណ្ដោយឱ្យឡើងទម្ងន់ខ្លាំងធ្វើឱ្យប៉ះពាល់ដល់សមត្ថភាពប្រកួត ។ លោកថា កីឡាករម្នាក់ៗមិនអាចបណ្តយឱ្យឡើងទម្ងន់ពី៦៣ដល់៦៩គីឡូក្រាមតែក្នុងរយៈពេលខ្លីបែបនេះនោះទេ ព្រោះអាចប៉ះពាល់ដល់សមត្ថភាពប្រកួត ។ សង្វៀនទូរទស្សន៍អាស៊ីអាគ្នេយ៍នឹងសម្រេចផ្អាកការផ្គូផ្គងមិនឱ្យកីឡាកររូបនេះឡើងវាយទៀតទេបន្ទាប់ពីការប្រកួតលើកចុងក្រោយរបស់គេក៏ចាញ់យ៉ាងអាម៉ាស់ក្រោមកណ្ដាប់ដៃកីឡាករថៃកាលពីថ្ងៃអាទិត្យ ។
តាមការកត់សម្គាល់ក្រោយការឡើងទម្ងន់ដល់៦៩គីឡូក្រាមនាពេលចុងក្រោយសមត្ថភាព និងកម្រិតវាយលុករបស់កីឡាកររូបនេះខុសពីមុនដាច់ឆ្ងាយ ដោយលោកយល់ថាធ្លាក់ដៃមិនក្រោម៥០ភាគរយនោះទេ បើធៀបនឹងពេលកីឡាកររូបនេះនៅវាយក្នុងប្រភេទទម្ងន់៦៣,៥គីឡូក្រាមនាពេលកន្លងមក ។ លោកព្រមានកីឡាកររូបនេះឱ្យសម្រកទម្ងន់នៅត្រឹម៦៥គីឡូក្រាមឱ្យបានដាច់ខាត បើមិនធ្វើតាមទេឱកាសឡើងប្រកួតញឹកញាប់នឹងត្រូវកាត់បន្ថយ ហើយបើមានការកាត់បន្ថយបែបនេះពិតមែន គឺច្បាស់ណាស់ថា ទឹកដៃរបស់ ផាន់ គ្រាន់ នឹងបន្តធ្លាក់ដៃទៀតព្រោះមិនសូវបានហ្វឹកហាត់ ។ លោកថា ភាពរស់រវើករបស់កីឡាកររូបនេះលែងល្អដូចមុនទៀតហើយដោយសារតែលោកឆាប់ហត់ ហើយបច្ចេកទេសវាយដ្បិតថាល្អ ប៉ុន្តែដល់ពេលធាត់ខ្លាំងឆាប់អស់កម្លាំងគឺវាយមិនចូល ។ ផាន់ គ្រាន់ អាចជ្រុះបាត់ប្រជាប្រិយភាព ប្រសិនបើការសម្រកទម្ងន់របស់គេមិនអាចវិលត្រឡប់មកកាន់ក្រោម៦៥គីឡូក្រាមដូចដើម ។
លោកនិយាយថា៖«ពួកខ្ញុំពិភាក្សាគ្នាហើយ ផាន់ គ្រាន់ វ៉ៃគីឡូធ្ងន់អីុចឹងអត់កើតទេ ធ្លាក់ដៃណាស់ បើអត់សម្រកឱ្យនៅ៦៥គីឡូក្រាមទេ អត់ដាក់ឱ្យវ៉ៃតែម្ដង ឱ្យវ៉ៃម៉េចបើធាត់ឡើងស្ពឹកដៃជើងលើកមិនចង់រួចផងហ្នឹង!» ។
យោងតាមមន្ត្រីជាអ្នកផ្គូផ្គងការប្រដាល់នៅក្នុងសហព័ន្ធប្រដាល់កម្ពុជា កីឡាករផាន់ គ្រាន់ ត្រូវបានអ្នករៀបចំការប្រកួតនៅលើសង្វៀនផ្សេងៗរិះគន់ពាក់ព័ន្ធនឹងបញ្ហាធ្លាក់ដៃក្រោយឡើងទម្ងន់ដល់ជិត៧០គីឡូក្រាម ។ មន្ត្រីទាំងនោះបានអះអាងថា ប្រជាប្រិយភាពរបស់កីឡាកររូបនេះ នឹងត្រូវបាត់ឈ្មោះដោយសារតែមន្ត្រីផ្គូផ្គងមិនដាក់ឈ្មោះឱ្យឡើងប្រកួតព្រោះតែផលប៉ះពាល់ ។ កីឡាករផាន់គ្រាន់ បានទទួលស្គាល់ថា សមត្ថភាពឡើងប្រកួតចុងក្រោយមានការធា្លក់ដៃដោយលោកចាប់ផ្ដើមធ្ងន់ដៃជើង ហើយប្រើកម្លាំងមិនសូវបានល្អតាំងពីឡើងទម្ងន់មក ។
ការប្រកួតចាញ់ពិន្ទុកីឡាករថៃកាលពីបីថ្ងៃមុន លោកថាក៏មិនសប្បាយចិត្តដែរធ្វើឱ្យលោកមិនចង់បន្តប្រកួតដូចគ្នា ដរាបណាលោកមិនអាចសម្រកទម្ងន់បានដល់៦៥គីឡូក្រាមដូចការគ្រោងទុក ។ លោកថា ការបណ្ដោយខ្លួនឱ្យឡើងទម្ងន់មានការប៉ះពាល់ដល់សមត្ថភាពប្រកួតយ៉ាងខ្លាំង ដោយលោកក៏ទទួលស្គាល់ថានឹងពិបាកឡើងរេញបណ្ដាលឱ្យមានការរិះគន់បន្តទៀតបែបនេះ ។ លោកថា ពីដើមលោកមានទម្ងន់តែជាង៥០គីឡូក្រាមប៉ុណ្ណោះ តែក្រោយមកលោកក៏បានវិវត្តទៅប្រកួតប្រភេទទម្ងន់៦៣គីឡូក្រាម ដើម្បីបានឡើងប្រកួតដណ្ដើមខ្សែក្រវាត់នៅលើសង្វៀនទូរទស្សន៍ ទើបខំដំឡើងទម្ងន់ ហើយដោយសារតែភ្លេចខ្លួនទើបទម្ងន់បន្តឡើងដល់៦៩គីឡូក្រាមនាពេលចុងក្រោយ ។
ម្យ៉ាងមកពីក្នុងក្លិបប្រដាល់លោកមិនសូវមានឧបករណ៍ហ្វឹកហាត់ ហើយក្លិបល្អ ស្ថិតនៅឆ្ងាយពីផ្ទះធ្វើឱ្យលោកបាត់បង់កម្លាំងចិត្តចង់ហាត់ហើយបណ្ដោយឱ្យធាត់បែកសាច់បែបនេះ ។ លោកថា អាជីពកីឡាប្រដាល់ខុសពីអាជីពកីឡាផ្សេងទៀត ពោលគឺឱ្យតែភ្លាត់ឡើងទម្ងន់នោះផលប៉ះពាល់នឹងកើតឡើងភ្លាមដោយសារតែពេលបែកសាច់គឺសរសៃសសូងសុទ្ធតែស្ពឹកស្រពន់លែងសូវរស់រវើក ។ លោកប្រកាសស្វែងរកក្លិបថ្មីដើម្បីហ្វឹកហាត់ដោយគ្រោងសម្រកឱ្យបានដាច់ខាតទើបសម្រេចចិត្តទទួលយកការប្រកួតញឹកញាប់វិញ ។ លោកចង់បានទម្ងន់ត្រឹម៦៤គីឡូក្រាមប៉ុណ្ណោះ ប៉ុន្តែក៏ភ័យបារម្ភផងដែរដោយសារតែពេលចុងក្រោយទោះបីជាលោកមិនសូវផឹកស៊ីក៏ធាត់ ឡើងទម្ងន់ស្រឺតៗដូចគេសប់បែបនេះ ៕
ចែករំលែកព័តមាននេះ