រាជធានីភ្នំពេញ ៖ អតីតតារាសម្តែង និងចម្រៀងជើងចាស់ អ្នកនាងអម្ពរ ទេវី, អ្នកនាងម៉ៅ សុចាន់ធី, អ្នកនាង ឆោម និមល, អ្នកនាងទូច លក្ខិណា និងលោកពេជ្រ សារុណ បានបង្ហាញវត្តមានចូលរួមសប្បាយរីករាយជាមួយនឹងបងប្អូនខ្មែរជាច្រើនទៀត ក្នុងកម្មវិធីអបអរសាទរទិវា៧មករា ខួបលើកទី៣៨ នៅក្នុងទឹកដីសហរដ្ឋអាមេរិក ។
កម្មវិធីនេះ បានរៀបចំធ្វើឡើងកាលពីរាត្រីថ្ងៃទី៨ មករា នៅរដ្ឋវ៉ាស៊ីនតោន សហរដ្ឋអាមេរិក ក្រោមកិច្ចផ្តួចផ្តើមពីលោកណុប តារា ប្រធានយុវជនគណបក្សប្រជាជនប្រចាំរដ្ឋវ៉ាស៊ីនតោន និងក្រោមវត្តមានចូលរួមពីលោកជុំ ប៊ុនរ៉ុង ឯកអគ្គរាជទូតកម្ពុជាប្រចាំសហរដ្ឋអាមេរិក រួមជាមួយលោកកស សេរីវិចិត្រ អនុប្រធានយុវជនគណបក្សប្រជាជនកម្ពុជាប្រចាំឆ្នេរខាងលិច។
ពិធីខាងលើ បានប្រារព្ធធ្វើឡើងដោយក្តីសប្បាយរីករាយជាមួយនឹងការជួបជុំជជែកលែងកម្សាន្ត ការពិសាអាហារសាមគ្គីជាមួយនឹងការច្រៀងរាំកម្សាន្ត និងកម្មវិធីផ្សេងទៀតៗជាច្រើន។
តំណាងឱ្យអតីតសិល្បករជើងចាស់អ្នកនាងម៉ៅ សុចាន់ធី បានអះអាងថា នេះជាលើកទីមួយហើយដែលប្រជាពលរដ្ឋខ្មែរដែលរស់នៅរដ្ឋវ៉ាស៊ីនតោនបានប្រារព្ធកម្មវិធីនេះឡើង មុនពេលដំណើរទស្សនិកកិច្ចរបស់លោកបណ្ឌិត ហ៊ុន ម៉ាណែត កាលពីពេលកន្លងទៅ។
អ្នកនាងបញ្ជាក់ថា កម្មវិធីប្រារព្ធឡើងមិនមែនសំដៅទៅលើនិន្នាការនយោបាយអ្វីឡើយ ប៉ុន្តែផ្ទុយទៅវិញគឺជាការរំលឹកឡើងវិញនូវថ្ងៃជ័យជំនះ៧មករា ដែលជាថ្ងៃរំដោះប្រជាពលរដ្ឋខ្មែរ ឲ្យរស់រានមានជីវិតឡើងវិញ រហូតដល់សព្វថ្ងៃពីរបបប៉ុល ពត ។ ថ្ងៃ៧មករា មិនមែនជារបស់អ្នកណាម្នាក់ឡើយ ពោលគឺជាថ្ងៃរបស់យើងទាំងអស់គ្នា ហើយការជួបជុំនាពេលនេះគឺបង្ហាញពីការរួបរួមគ្នា ក្នុងនាមជាខ្មែរតែមួយដើម្បីរួមចំណែកជាមួយថ្នាក់ដឹកនាំដោយឈរលើមាគ៌ាសន្តិភាព និងការបង្រួមបង្រួមជាតិ ។
បើតាមអ្នកនាង ម៉ៅ សុចាន់ធី ទាំងសិល្បះករ និងប្រជាពលរដ្ឋដែលបានចូលរួមក្នុងកម្មវិធីខាងលើនេះគឺជាការស្ម័គ្រចិត្រ ពោលគឺមិនមានការបង្ខិតបង្ខំ និងគាបសង្កត់ពីផ្នែកណាមួយឡើយ ។ អ្វីដែលយើងបានប្រារព្ធធ្វើកម្មវិធីនេះឡើង គឺក្នុងគោលបំណងតែមួយគត់ គឺផ្តល់ការជួបជុំ និងការសប្បាយរីករាយដល់ពលរដ្ឋខ្មែរដែលរស់នៅឯនាយសមុទ្រ ហើយវាក៏ជាការតាស់តឿន និងរំលឹកឡើងវិញពីភាពឈឺចាប់ក្នុងរបបខ្មៅងងឹត ជាពិសេសរំលឹកគុណដល់ថ្ងៃ៧មករា ដែលបានរំដោះយើងឲ្យមានជីវិតដល់ថ្ងៃនេះ។
យ៉ាងណាក៏ដោយអ្នកនាងម៉ៅ សុចាន់ធី បានសម្តែងការអរគុណដល់ប្រធានក្រុមយុវជនគណបក្សប្រជាជនកម្ពុជាប្រចាំទីក្រុងវ៉ា
ស៊ីនតោន ដែលបានផ្តួចផ្តើមកម្មវិធីនេះឡើង ហើយអ្នកនាងរំពឹងថា កម្មវិធីជួបជុំខាងលើនេះនឹងអាចធ្វើឡើងជារៀងរាល់ឆ្នាំ ៕
ចែករំលែកព័តមាននេះ