យុវជន៣នាក់ត្រូវចាប់ខ្លួនភ្លាមៗ ក្រោយយកដាវកា.ប់យុវជនម្នាក់ដើម្បីសងសឹក
- បន្ទាយមានជ័យ
សមត្ថកិច្ចបានឃាត់ខ្លួនជនសង្ស័យជាក្មេងទំនើងចំនួន៣នាក់ ដែលបានយកដាវសាំម៉ូរ៉ៃកា.ប់ទៅលើជនរងគ្រោះចំ
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា សមត្ថកិច្ចបានឃាត់ខ្លួនជនសង្ស័យជាក្មេងទំនើងចំនួន៣នាក់ ដែលបានយកដាវសាំម៉ូរ៉ៃកា.ប់ទៅលើជនរងគ្រោះចំក្បាលរបួសធ្ងន់ ដេរអស់ចំនួន៧ថ្នេរ ហើយជនសង្ស័យត្រូវបានឃាត់កាលពីថ្ងៃទី០៦ ខែសីហា ឆ្នាំ២០២២ នៅចំណុចភូមិមាត់ស្រះ ឃុំស្រះជីក ស្រុកភ្នំស្រុក។
កម្លាំងកងរាជអាវុធហត្ថស្រុកភ្នំស្រុក បានប្រាប់ថា ជនសង្ស័យទាំង៣នាក់ខាងលើរួមមាន ៖ ១- ឈ្មោះ ម៉ែន ជូសឹង ភេទប្រុស អាយុ១៦ឆ្នាំ ២- ឈ្មោះ អឿន វ៉ាន់ឆេង ភេទប្រុស អាយុ១៦ឆ្នាំ និង៣- ឈ្មោះ យួត រ៉ាយុត ភេទប្រុស អាយុ១៧ឆ្នាំ ដែលរស់នៅភូមិត្រពាំងត្បូង ឃុំប៉ោយចារ ស្រុកភ្នំស្រុក។
បើតាមកម្លាំងកងរាជអាវុធហត្ថ បានបញ្ជាក់ថា នៅមុនពេលឃាត់ខ្លួនជនសង្ស័យ កាលពីវេលាម៉ោង៧យប់ ថ្ងៃទី០៦ ខែសីហា ឆ្នាំ២០២២ នៅចំណុចប្រមាណជា១៥០ម៉ែត្រខាងកើត ហាងខារ៉ាអូ «ខេឌីកូល» ក្នុងស្រុកភ្នំស្រុកនោះ គឺមានករណីជនរងគ្រោះម្នាក់ឈ្មោះ កោត មុនា ភេទប្រុស អាយុ១៧ឆ្នាំ រស់នៅភូមិស្រះជីក ឃុំស្រះជីក ស្រុកភ្នំស្រុក ត្រូវបានជនសង្ស័យ១ក្រុម មានគ្នា៣នាក់ មានកាំបិតសាំម៉ូរ៉ៃ បានកា.ប់ទៅលើជនរងគ្រោះចំក្បាល បណ្តាលរបួសធ្ងន់ និងបញ្ជូនទៅមន្ទីពេទ្យបង្អែកស្រុកភ្នំស្រុក ដេរអស់ចំនួន៧ថ្នេរ។
កម្លាំងកងរាជអាវុធហត្ថបានបញ្ជាក់ថា ក្រោយពេលសកម្មភាពរួច ជនសង្ស័យជាក្មេងទំនើងដែលបានកា.ប់ជនរងគ្រោះនោះ ត្រូវបានកម្លាំងកងរាជអាវុធហត្ថស្រុកភ្នំស្រុកបានធ្វើការឃាត់ខ្លួនបានចំនួន៣នាក់ភ្លាមៗ ក្រោយធ្វើសកម្មភាព ហើយត្រូវបាននាំខ្លួនយកមកសាកសួរតែម្តង ។ បើតាមតាមចម្លើយសារភាព គឺមូលហេតុកា.ប់ទៅលើជនរងគ្រោះ ព្រោះតែរឿងគំនុំ ដែលជនរងគ្រោះធ្លាប់ធ្វើសកម្មភាពដេញកា.ប់ពួកគេ ទើបបណ្តាលកា.ប់សងសឹកវិញ ។ ក្រោយសាកសួរហើយ ក្រុមជនសង្ស័យត្រូវបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់៕
ចែករំលែកព័តមាននេះ