តម្លៃប្រេងបានធ្លាក់ចុះសាជាថ្មីកាលពីថ្ងៃចន្ទ ដោយសារតែប្រទេសអុីរ៉ង់បានបង្កើនការនាំចេញ និងអាមេរិកបន្ថែមសកម្មភាពខួងយកប្រេងរយៈពេល១០សប្តាហ៍ជាប់ៗគ្នា ។
ពាណិជ្ជករនិយាយថា ការធ្លាក់ចុះនៃតម្លៃនេះ គឺជាលទ្ធផលនៃការបង្កើនការនាំចេញរបស់អីុរ៉ង់ បន្ទាប់ពីសមាជិកអង្គការនៃប្រទេសនាំចេញប្រេង OPEC កាត់បន្ថយផលិតកម្មដើម្បីដំឡើងតម្លៃប្រេង ។
យោងតាមប្រភព និងទិន្នន័យក្នុងវិស័យនេះឲ្យដឹងថា អីុរ៉ង់បានលក់ចេញប្រេងច្រើនជាង១៣លានធុងទៅទៀត ប៉ុន្តែការបង្កើនការនាំចេញរបស់ប្រទេសនេះ មិនមែនជាមូលហេតុតែមួយដែលធ្វើឲ្យតម្លៃធ្លាក់ចុះនោះទេ ។
ក្រុមហ៊ុនថាមពលរបស់អាមេរិក កាលពីសប្តាហ៍មុនបានបន្ថែមឧបករណ៍ខួងយកប្រេង១០សប្តាហ៍ជាប់ៗគ្នា ដែលធ្វើឲ្យការដំឡើងថ្លៃប្រេងធ្លាក់មកត្រឹមកម្រិតមួយដែលក្រុមហ៊ុនប្រេងអាចដំណើរការបាន ។
ធនាគារ ANZ បាននិយាយកាលពីថ្ងៃចន្ទថា ៖ « ការកើនឡើងនៃតម្លៃប្រេងប្រហែលជាមិនអាចកើតឡើងទេ រហូតដល់ពាណិជ្ជករមើលឃើញពីភស្តុតាងដែលបង្ហាញថា កម្រិតផលិតកម្ម គឺពិតជាធ្លាក់ចុះមែន ។ បច្ចុប្បន្ននេះ ការកើនឡើងនៃសកម្មភាពជីកយកប្រេង និងផលិតកម្មរបស់សហរដ្ឋអាមេរិកនឹងរក្សាតម្លៃឲ្យនៅទាបដដែល » ។
ក្រុមហ៊ុនសេវាកម្មថាមពល Baker Hughes Inc បាននិយាយកាលពីថ្ងៃសុក្រថា ក្រុមហ៊ុនជីកប្រេងបានបន្ថែមឧបករណ៍ខួងយកប្រេង៤ទៀត ដែលសរុបមានប្រមាណ៥២៨ ជាចំនួនខ្ពស់ជាងគេ តាំងពីខែធ្នូ ឆ្នាំ២០១៥មក ៕
ចែករំលែកព័តមាននេះ