ខេត្តព្រះសីហនុ ៖ នាវាទេសចរណ៍ខ្នាតយក្សមួយគ្រឿងឈ្មោះ AIDA BELLA សញ្ជាតិអុីតាលី បាននាំភ្ញៀវទេសចរចម្រុះជាតិសាសន៍ប្រមាណជិត៣ពាន់នាក់មកចូលសំចតនៅកំពង់ផែអន្តរជាតិក្រុងព្រះសីហនុ កាលពីព្រឹកថ្ងៃទី៧ មករា កន្លងមក មុននឹងបន្ដដំណើរឆ្ពោះទៅប្រទេសថៃ ។ ការចូលសំចតនាវានេះ ក្នុងគោលបំណងឈ្វេងយល់ពីជីវភាពរស់នៅរបស់ប្រជាជននៅតាមទីប្រជុំជននានា ទស្សនារមណីយដ្ឋានវប្បធម៌ តំបន់ឆ្នេរ និងភូមិនេសាទ ជាដើម ។ នេះបើតាមមន្ត្រីនគរបាលប៉ុស្តិ៍ច្រកទ្វារអន្តរជាតិស្វយ័តក្រុងព្រះសីហនុ ។
លោកវរសេនីយ៍ទោ ង៉ុយ ជៀន ប្រធាននគរបាលប៉ុស្តិ៍ច្រកទ្វារអន្តរជាតិស្វយ័តក្រុងព្រះសីហនុ បានឱ្យដឹងថា នាវាទេសចរណ៍នេះមានបណ្តោយ២៣០ម៉ែត្រ ទទឹង៣២ម៉ែត្រ និងជម្រៅទឹក៧,៣០ម៉ែត្រ បាននាំភ្ញៀវទេសចរបរទេសចម្រុះជាតិសាសន៍ជិត៣ពាន់នាក់ចូលចតកំពង់ផែអន្តរជាតិក្រុងព្រះសីហនុ ដើម្បីធ្វើទស្សនកិច្ចនៅកម្ពុជារយៈពេលមួយថ្ងៃ មុននឹងចាកចេញទៅកាន់ប្រទេសថៃ ។
លោកបានបញ្ជាក់ថា ៖ « ភ្ញៀវទេសចរចម្រុះជាតិសាសន៍នៅក្នុងនាវានេះមានចំនួន២.១៦១នាក់ ស្រី១.១០៦នាក់ មាន២៨សញ្ជាតិផ្សេងគ្នា ដែលភាគច្រើនមានវ័យចំណាស់។ ចំណែកនាវិកសរុបមានចំនួន៥៩៩នាក់ ស្រី១២៨នាក់ មាន២៥សញ្ជាតិ ។ នាវានេះបានធ្វើដំណើរចាកចេញពីប្រទេសវៀតណាម ចូលសំចតនៅកំពង់ផែអន្តរជាតិក្រុងព្រះសីហនុ មុននឹងបន្ដធ្វើដំណើរឆ្ពោះទៅកាន់ប្រទេសថៃ» ។
គួរកត់សម្គាល់ថា នៅក្នុងឆ្នាំ២០១៦ មាននាវាទេសចរណ៍បរទេសជាច្រើនគ្រឿងបាននាំភ្ញៀវទេសចរចូលចតធ្វើទស្សនកិច្ចនៅកម្ពុជា តាមច្រកកំពង់ផែសមុទ្រ មានការកើនឡើងជាងឆ្នាំ២០១៥ ។ នេះដោយសារតែកម្ពុជាមានសុខសន្តិភាព សុវត្ថិភាព និងការអភិវឌ្ឍលើគ្រប់វិស័យ ។ ទន្ទឹមនឹងនេះ ខេត្តព្រះសីហនុ ក៏ជាតំបន់ដែលមានសក្ដានុពលទេសចរណ៍ធម្មជាតិ ដោយប្រជុំកោះទាំង៣២ ត្រូវបានអភិវឌ្ឍន៍កែលម្អឲ្យក្លាយជាតំបន់ទេសចរណ៍ទាក់ទាញបែបធម្មជាតិ ដើម្បីស្រូបយកភ្ញៀវទេសចរបរទេសមកកម្សាន្តមានការកើនឡើងពីមួយឆ្នាំទៅមួយឆ្នាំ តាមរយៈការទៅទស្សនានៅកោះតូច កោះរ៉ុងសន្លឹម និងកោះមួយចំនួនទៀត ៕
ចែករំលែកព័តមាននេះ