ត្រេកអរណាស់! សម្តេចតេជោ សម្រេចយកដី និងព្រៃនៅជុំវិញសួនសត្វភ្នំតាម៉ៅពីក្រុមហ៊ុនមករក្សាទុកវិញ
- ភ្នំពេញ
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចយកដី និងព្រៃនៅជុំវិញសួនសត្វ «ភ្នំតាម៉ៅ» ពីក្រុមហ៊ុន
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចយកដី និងព្រៃនៅជុំវិញសួនសត្វ «ភ្នំតាម៉ៅ» ពីក្រុមហ៊ុន មករក្សាទុក និងបញ្ជាឱ្យដាំដើមឈើឡើងវិញ លើដីដែលក្រុមហ៊ុនបានឈូសឆាយកន្លងមក។
សម្តេចតេជោ ហ៊ុន សែន បានប្រកាសបទបញ្ជាលើហ្វេសប៊ុកផ្លូវការរបស់សម្តេចដែលមានខ្លឹមសារទាំងស្រុងថា «បងប្អូនជនរួមជាតិជាទីគោរពស្រឡាញ់! ប៉ុន្មានថ្ងៃមកនេះ មានសំណូមពរជាច្រើនមករាជរដ្ឋាភិបាល ដើម្បីរក្សាទុកព្រៃនៅក្បែរសួនសត្វភ្នំតាម៉ៅ ទោះបីក្រសួងកសិកម្មបានពន្យល់ថាសួនសត្វភ្នំតាម៉ៅ មិនមានប៉ះពាល់ក៍ដោយ»។
សម្តេចនាយករដ្ឋមន្ត្រី បានបន្តថា «ក្នុងនាមជាអ្នកទទួលខុសត្រូវខ្ពស់បំផុតនៃ រាជរដ្ឋាភិបាល ខ្ញុំសូមចេញបញ្ជា ៖ ១- លប់ចោលទាំងអស់នូវរាល់ការអនុញ្ញាតិ ឱ្យធ្វើការដោះដូរ និងអភិវឌ្ឍ។ ២- រក្សាទុកដី និងព្រៃនៅជុំវិញសួនសត្វភ្នំតាម៉ៅ ជាដីដែលត្រូវការពារ និងអភិរក្សដោយក្រសួងកសិកម្ម»។
សម្តេចបានបន្តថា «ក្រុមហ៊ុន ដែលបានឈូសឆាយត្រូវបញ្ឈប់សកម្មភាព និងត្រូវដាំដើមឈើឡើងវិញ លើដីដែលបានឈូសឆាយ»។ ព្រមជាមួយគ្នានោះ សម្តេចបានសម្តែងការអរគុណ ចំពោះបងប្អូនជនរួមជាតិដែលបានចូលរួមផ្តល់យោបល់ប្រកបដោយការស្ថាបនា។
ការសម្រេចលុបចោលទាំងអស់នូវរាល់ការអនុញ្ញាតិឱ្យធ្វើការដោះដូរនិងអភិវឌ្ឍដីនៅភ្នំតាម៉ៅនិងសម្រេចរក្សាទុកដីនិងព្រៃនៅជុំវិញសួនសត្វភ្នំតាម៉ៅជាដីដែលត្រូវការពារនិងអភិរក្សនោះ ធ្វើឡើងក្រោយពីមានចលនាយ៉ាងផុសផុលក្នុងបណ្តាញសង្គម ទាមទារឱ្យរក្សាដីព្រៃភ្នំតាម៉ៅ។ គួររម្លឹកផងដែរថារាជរដ្ឋាភិបាល បានចេញ សជណ តាំងថ្ងៃទី១៤ ខែមករា ឆ្នាំ២០២២ សម្រេចកាត់ដីជាង ១ ពាន់ ហិកតានៅតំបន់ភ្នំតាម៉ៅ ទៅឲ្យក្រុមហ៊ុនចំនួន ២ ដើម្បីធ្វើការអភិវឌ្ឍន៍ជាថ្នូនឹងការដោះដូរដីនៅខេត្តសៀមរាបនិងតំបន់មួយចំនួនទៀត។ កន្លងមករដ្ឋាភិបាលសម្រេចយក តំបន់ភ្នំតាម៉ៅ
សម្រាប់ធ្វើការអភិវឌ្ឍ ដោយសារតែតំបន់នោះនៅក្បែរទីក្រុង ក្បែរព្រលានយន្តហោះថ្មី និងកៀកតំបន់ទេសចរណ៍បាទី ខណៈតំបន់នោះពោរពេញដោយដីខ្សាច់ ព្រៃឈើមិនមានការលូតលាស់ល្អ និងពុំមានសត្វព្រៃសំខាន់ៗនោះទេ។
ការសម្រេចកន្លងមកយកដីភ្នំតាម៉ៅឱ្យក្រុមហ៊ុនអភិវឌ្ឍន៍ទទួលបាននូវការរិះគន់ដូចទឹកបាក់ទំនប់ រហូតមានការប្រកាសពីការធ្វើពហិការមិនប្រើប្រាស់ផលិតផលនិងសេវាកម្មរបស់ក្រុមហ៊ុនដែលវិនិយោគ ដែលធ្វើឱ្យបាត់បង់ព្រៃឈើ និងជម្រកសត្វព្រៃនៅតំបន់ភ្នំតាម៉ៅ។
កាលពីថ្ងៃទី ០៤ ខែសីហា ឆ្នាំ២០២២ កន្លងទៅរដ្ឋបាលព្រៃឈើនៃ ក្រសួងកសិកម្ម រុក្ខាប្រម៉ាញ់ និងនេសាទ បានលើកឡើងថា តំបន់ភ្នំតាម៉ៅ ជាតំបន់ស្ថានីយស្ដារព្រៃឈើមួយ ដែលមានដំណុះឈើដាំប្រភេទអាកាស្យា ប្រេងខ្យល់ និងឈើធម្មជាតិ ហើយតំបន់នេះពោរពេញទៅដោយដីខ្សាច់ និងដំណុះឈើដែលមិនមានការលូតលាស់ល្អ។ រដ្ឋបាលព្រៃឈើបន្តថា ករណីនេះហើយបានជារដ្ឋាភិបាលសម្រេចយកតំបន់នេះសម្រាប់ធ្វើការអភិវឌ្ឍ មិនមែនជាការលក់ដូរនោះទេ ខណៈតំបន់នោះស្ថិតនៅក្បែរទីក្រុង ក្បែរព្រលានយន្តហោះថ្មី និងកៀកតំបន់ទេសចរណ៍ទន្លេបាទី។
យ៉ាងណាមិញ នៅព្រឹកថ្ងៃទី ៧ ខែសីហានេះ សម្តេចតេជោ សម្រេចបញ្ឈប់ក្រុមហ៊ុនពីការអភិវឌ្ឍន៍និងយកដី និងព្រៃនៅជុំវិញសួនសត្វ ភ្នំតាម៉ៅ មករក្សាទុកវិញ ទទួលបានការសាទរយ៉ាងខ្លាំងក្លាពីសំណាក់ប្រជាពលរដ្ឋ។
ចែករំលែកព័តមាននេះ