បញ្ឈប់សកម្មភាពគ្រឿងចក្រជីកដីរបស់លោក កែវ សុវណ្ណ ហើយ
ខេត្តព្រៃវែង ៖ បន្ទាប់ពីគេហទំព័រ«កោះសន្តិភាព»ចេញផ្សាយអត្ថបទក្រោមចំណងជើងថា ខ្លាំងណាស់ ! ហៅមកធ្វើច្បាប់៤-៥ដងហើយ នៅតែមិនមកធ្វើ កាលពីវេលាម៉ោង …
ខេត្តព្រៃវែង ៖ បន្ទាប់ពីគេហទំព័រ«កោះសន្តិភាព»ចេញផ្សាយអត្ថបទក្រោមចំណងជើងថា ខ្លាំងណាស់ ! ហៅមកធ្វើច្បាប់៤-៥ដងហើយ នៅតែមិនមកធ្វើ កាលពីវេលាម៉ោង ២ និង១៧នាទីរសៀល ថ្ងៃទី៩ ខែមករា ឆ្នាំ២០១៧ លោក ជា កក្ដដា ប្រធានមន្ទីររ៉ែ និងថាមពលខេត្ត បានចុះទៅបញ្ឈប់សកម្មភាពជីកដីរបស់គ្រឿងចក្រ លោក កែវ សុវណ្ណហើយ ។
សូមបញ្ជាក់ថា អ្នកស្រុកបានអះអាងថា ទីតាំងដែលគេជីកយកអាចម៍ដីលក់នោះ គឺស្ថិតនៅខាងជើងផ្លូវជាតិលេខ៨អា ក្នុងភូមិគ្រួស ឃុំព្រៃព្នៅ ដែលរណ្តៅនីមួយៗមានជម្រៅរហូតដល់ទៅជាង១០ម៉ែត្រឯណោះ ហើយវាមិនត្រឹមតែជ្រៅគួរឲ្យខ្លាចនោះទេ បច្ចុប្បន្ននេះដីស្រែរបស់ពួកគាត់ដែលនៅជាប់នោះបានបាក់ដីចូលទៅក្នុងរណ្តៅទាំងនោះស្ទើរអស់ហើយ ឯកន្លែងខ្លះទៀតគឺគេជីកចូលដីអ្នកស្រុកតែម្តង ទើបធ្វើឲ្យអ្នកស្រុកក្តៅក្រហាយ លើកគ្នាទៅឃាត់គ្រឿងចក្រកុំឲ្យជីកទៀត តែគេមិនស្តាប់ ហើយនៅតែបន្តជីកទៀត ចំណែកខាងអាជ្ញាធរវិញពួកគាត់បានទៅប្តឹងឲ្យទៅជួយឃាត់ច្រើនដងដែរ តែបានត្រឹមតែថា ចាំចុះទៅឃាត់ឲ្យ តែជាក់ស្តែងមិនដែលឃើញខាងអាជ្ញាធរណាចុះទៅឃាត់នោះទេ ។
ពាក់ព័ន្ធការចោទប្រកាន់ខាងលើនេះ លោក ជា កក្ដដា ប្រធានមន្ទីររ៉ែ និងថាមពលខេត្ត បានអះអាងថា រណ្ដៅដីដែលគ្រឿងចក្ររបស់លោក កែវ សុវណ្ណ ជីកនៅឃុំព្រៃព្នៅនោះ មានជម្រៅត្រឹមតែ៣,៥ម៉ែត្រ ប៉ុណ្ណេះ គឺមិនដូចការចោទប្រកាន់របស់អ្នកស្រុកទេ ម្យ៉ាងពេលនេះលោកបានចុះទៅហាមឃាត់ឲ្យបញ្ឈប់សកម្មភាពហើយដែរ ។
លោក ជា កក្ដដា បញ្ជាក់ថា គ្រឿងចក្រនោះមិន មែនជីកធ្វើអាជីវកម្មនោះទេ គឺគេជីកពីដីខ្លួនឯងដែលនៅខាងក្រោយ យកទៅដាក់នៅខាងមុខប៉ុណ្ណោះ ៕
ចែករំលែកព័តមាននេះ