រាជធានីភ្នំពេញ ៖ ប្រជាពលរដ្ឋ២៣នាក់ តំណាងឲ្យ២៣គ្រួសារ កាលពីព្រឹកថ្ងៃទី៩ ខែមករា ឆ្នាំ២០១៧ មកពីខេត្តកំពង់ឆ្នាំ បានធ្វើការប្រមូលម្តុំគ្នានៅមុខក្រសួងរៀបចំដែនដី …
រាជធានីភ្នំពេញ ៖ ប្រជាពលរដ្ឋ២៣នាក់ តំណាងឲ្យ២៣គ្រួសារ កាលពីព្រឹកថ្ងៃទី៩ ខែមករា ឆ្នាំ២០១៧ មកពីខេត្តកំពង់ឆ្នាំ បានធ្វើការប្រមូលម្តុំគ្នានៅមុខក្រសួងរៀបចំដែនដី នគរូបនីយកម្ម និងសំណង់ មានទីតាំងស្ថិតតាមបណ្តោយផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន ទាមទារឲ្យក្រសួងជួយអន្តរាគមន៍រកយុត្តិធម៌ជូនពួកគាត់ រឿងរំលោភបំពានដីធ្លីស្រែចម្ការ ។
ក្រុមប្រជាពលរដ្ឋឲ្យដឹងថា ផ្ទៃដីសរុបទាំងអស់របស់ពួកគាត់មាន១៨៤ហិចតា មានទីតាំងស្ថិតក្នុងភូមិដំណាក់អំបិល ឃុំក្រាំងស្តារ ស្រុកទឹកផុស ខេត្តកំពង់ឆ្នាំង ត្រូវក្រុមឈ្មួញទុច្ចរិតឃុបឃិតគ្នាជាមួយអាជ្ញាធរខេត្ត និងមន្ត្រីយោធាម្នាក់ឈ្មោះ នូ វិចិត្រ មានឋានៈជានាយរងកងកាំភ្លើងធំ រំលោភបំពានយកយ៉ាងសាហាវ ដោយបានប្រើប្រាស់នូវកងកម្លាំងប្រដាប់អាវុធជាច្រើន មកធ្វើការគំហែងកំហែងយ៉ាងធ្ងន់ៗមកលើពួកគាត់ ហើយថែមទាំងធ្លាប់ធ្វើការឈូសឆាយផលដំណាំ ចម្ការ ក៏ដូចជាផ្ទះសម្បែងរបស់ពួកគាត់ទៀតផង ។
យ៉ាងណាមិញ នៅវេលាព្រឹកថ្ងៃខែដដែល តំណាងក្រសួងរៀបចំដែនដី នគរូបនីយកម្ម និងសំណង់ ក៏បានចេញមកទទួលញត្តិរបស់បងប្អូនផងដែរ ។
សូមបញ្ជាក់ថា បន្ទាប់ពីដាក់ញត្តិនៅក្រសួងខាងលើរួចហើយ ក្រុមប្រជាពលរដ្ឋបន្តនាំគ្នាយកញត្តិទៅដាក់នៅខុទ្ទការល័យសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផងដែរ ដើម្បីសុំការអន្តរាគមន៍បន្ថែម ហើយក្នុងនោះខាងតំណាងខុទ្ទការល័យក៏ព្រមទទួលយកញត្តិនោះមកទុកសិន ។
សូមបញ្ជាក់បន្ថែមថា ក្រោយដាក់ញត្តិដើម្បីសុំអន្តរាគមន៍ហើយនោះ ក្រុមប្រជាពលរដ្ឋទាំង២៣គ្រួសារបាននាំគ្នារំសាយការតវ៉ា ដោយទៅសម្រាកបណ្តោះអាសន្ននៅផ្ទះសំណាក់ម្តុំផ្សារសំណង់១២ ស្ថិតក្នុងខណ្ឌទួលគោក រង់ចាំថ្ងៃស្អែកឡើងមកស្ថាប័នពាក់ព័ន្ធទាំង២ម្តងទៀត ដើម្បីសួរនាំរកដំណោះស្រាយលើកិច្ចសុំអន្តរាគមន៍របស់ពួកគាត់ ៕
ចែករំលែកព័តមាននេះ