អ្នកនាំពាក្យម្នាក់របស់កងទ័ពអីុរ៉ាក់ថ្លែងថា កងកម្លាំងពិសេសអីុរ៉ាក់កាលពីថ្ងៃទី៨ មករា វាយលុកចូលដល់ច្រាំងខាងកើតនៃទន្លេថៃហ្គ័រក្រុងម៉ូសស៊ុលជាលើកដំបូងតាំងពីចាប់ផ្តើមការវាយលុកដើម្បីរំដោះទីក្រុងធំទី២នេះរបស់អីុរ៉ាក់ពីថ្ងៃទី១៧ តុលា មក ។
ទន្លេថៃហ្គ័រជាទន្លេកាត់ក្រុងម៉ូសស៊ុលពីភាគខាងជើងទៅភាគខាងត្បូង ។ កងកម្លាំងពិសេសវាយលុកចូលក្រុងម៉ូសស៊ុលពីទិសខាងកើត ខណៈសង្កាត់ទាំងឡាយនាភាគខាងលិចក្រុងនៅត្រួតត្រាដោយពួកជីហាដក្រុមរដ្ឋអ៊ិស្លាម ។
ឧត្តមសេនីយ៍ ABDELWAHAB AL SAADI ថ្លែងនាព្រឹកថ្ងៃទី៨ មករា ថា កងកម្លាំងពិសេសវាយរុលជា២មុខព្រួញ ឆ្ពោះទៅសង្កាត់ BALADIYAT និងសង្កាត់ SUKKAR ។ ពេលវាយរុលនេះ ក្រុមរដ្ឋអ៊ិស្លាមប៉ុនប៉ងវាយប្រហារលើយើងពីកូនភ្នំមួយ ។
សម្រាប់ពេលនេះ កងទ័ពអីុរ៉ាក់នៅពុំទាន់មានបំណងផ្សងព្រេងវាយចូលផ្នែកម្ខាងទៀតនៃទន្លេថៃហ្គ័រនៅឡើយ បើដរាបណានៅពុំទាន់ដណ្តើមយកបានសង្កាត់ទាំងអស់នាភាគខាងកើតក្រុង ។ ស្ពាន៥កាត់ទន្លេថៃហ្គ័ររងការខូចខាតដោយសារការវាយប្រហារតាមអាកាសរបស់ពួកសម្ព័ន្ធមិត្ត ៕
ចែករំលែកព័តមាននេះ