រាជធានីភ្នំពេញ ៖ កាលពីរសៀលថ្ងៃទី៨ មករា កន្លងមកនេះ ស្ថានីយទូរទស្សន៍ភីអិនអិន បានរៀបចំធ្វើសន្និសីទសារព័ត៌មានមួយ ដើម្បីបង្ហាញមុខកំពូលអ្នកប្រយុទ្ធគុនខ្មែរជំនាន់ទី៥ចំនួន៨រូប គឺកីឡាករកម្ពុជា៤រូប និងថៃ៤រូប ដែលត្រូវឡើងប្រកួតដណ្ដើមខ្សែក្រវាត់គោជល់ក្នុងប្រភេទទម្ងន់៥៧គីឡូក្រាម ។
ពូលកីឡាករកម្ពុជាមានព្រឿង សុជាតិ មកពីក្លិបកងពលធំអន្តរាគមន៍លេខ២, ពេជ្រ ម្ទេសខ្មាំង មកពីក្លិបអារុណរះកីឡា, ម៉ន សាម៉េត មកពីក្លិបការិយាល័យទី៥កងទ័ពជើងគោក និងយុគ យក្សផ្លែ មកពីក្លិបបូរីរាជសីហ៍មានរិទ្ធ ។ ចំណែកពូលកីឡាករថៃមានផេត សិលា,ភូនសាវ៉ាត,កាំ ឡៃយោគ និងផេត ងិនថង ។
លោកសំណព្វ អ្នកគ្រប់គ្រងកម្មវិធីប្រកួតប្រដាល់ប្រចាំស្ថានីយទូរទស្សន៍ភីអិនអិន បានឱ្យដឹងថា ការប្រកួតនេះធ្វើឡើងតាមរូបមន្តវិលជុំសន្សំពិន្ទុជម្រុះចោលដើម្បីស្វែងរកអ្នកដែលមានពិន្ទុច្រើនជាងគេតែម្នាក់ប៉ុណ្ណោះក្នុងមួយពូលសម្រាប់ឡើងទៅប្រកួតនៅវគ្គផ្ដាច់ព្រ័ត្រដណ្ដើមយកតំណែងជាម្ចាស់ជើងឯក និងប្រាក់រង្វាន់២០លានរៀល ។លោកថា កាលពីពីររដូវកាលមុនដំណើរការនៃការប្រកួតធ្វើមិនបានល្អមែន ប៉ុន្តែ៣រដូវកាលចុងក្រោយនេះយើងពិតជាធ្វើបានល្អហើយលោកក៏មិនភ្លេចគុណក្រុមហ៊ុនភេសជ្ជៈគោជល់ដែលបានជួយឧបត្ថម្ភគាំទ្រដល់ស្ថានីយទូរទស្សន៍ភីអិនអិន ធ្វើឱ្យដំណើរការនៃការប្រកួតប្រព្រឹត្តទៅបានយ៉ាងរលូនរហូតមកដល់ពេលនេះ ។
លោក មាន សំអុល ប្រធានក្រុមហ៊ុនហេរ៉ូឃីង (ភេសជ្ជៈគោជល់) បានឱ្យដឹងថា មូលហេតុដែលលោកសម្រចចិត្តឧបត្ថម្ភគាំទ្រដល់កម្មវិធីប្រកួតជាបន្តទៀតនោះ ព្រោះតែលោកចង់ចូលរួមចំណែកលើកស្ទួយវិស័យកីឡាប្រដាល់នៅកម្ពុជាឱ្យកាន់តែមានការរីកចម្រើនថែមទៀត ។ មិនតែប៉ុណ្ណោះ ក្រុមហ៊ុនភេសជ្ជៈគោជល់មិនត្រឹមតែរួមចំណែកលើកស្ទួយវិស័យកីឡាប្រដាល់តែមួយមុខប៉ុណ្ណោះនោះទេ ក្នុងនោះមានទាំងកីឡាបាល់ទាត់ និងកីឡាផ្សេងៗជាច្រើនទៀត ។
លោកឧត្តមសេនីយ៍តែម ម៉ឺន ប្រធានសហព័ន្ធកីឡាប្រដាល់កម្ពុជា បានផ្ដាំផ្ញើដល់មន្ត្រីពាក់ព័ន្ធទាំងអស់ ត្រូវគោរពឱ្យបាននូវភាពយុត្តិធម៌ កាត់ក្ដីឱ្យបានត្រឹមត្រូវ មិនត្រូវកាន់ជើងតែកីឡាករកម្ពុជាគ្នាឯងនោះទេ ។ ជាងនេះទៅទៀត លោកបានសំណូមពរដល់កីឡាករទាំងអស់ត្រូវតែប្រកួតឱ្យអស់ពីសមត្ថភាព ធ្វើយ៉ាងណាត្រូវគោរពឱ្យបាននូវច្បាប់ប្រកួត ។ លោកបានកោតសរសើរដល់ស្ថានីយទូរទស្សន៍ភីអិនអិនដែលបានរៀបចំឱ្យមានការប្រកួតប្លែកពីគេ ។ ជាក់ស្ដែង នៅរដូវកាលមុនដែលទើបតែបញ្ចប់ទៅនេះ គឺជាការប្រកួតក្នុងប្រភេទទម្ងន់ធ្ងន់មិនធ្លាប់មាន(៧៥គីឡូក្រាម) ហើយតំណែងជាម្ចាស់ខ្សែក្រវាត់បានទៅលើកីឡាករ អ៊ុង វិរៈ មកពីក្លិបកងទ័ពពិសេសឆត្រយោង៩១១ ។ លើកនេះគឺជាការប្រកួតដណ្ដើមខ្សែក្រវាត់ក្នុងប្រភេទទម្ងន់ស្រាលដែលមិនធ្លាប់មានពីមុនមក។ ដូច្នេះលោកសង្ឃឹមថា សម្រាប់ការប្រកួតលើកនេះនឹងដំណើរការបានល្អមិនចាញ់លើកមុនៗឡើយ ។
ដោយឡែកការប្រកួតបើកឆាកនាថ្ងៃអាទិត្យនោះ ពេជ្រ ម្ទេសខ្មាំង មកពីក្លិបអារុណរះកីឡា មានឱកាសដណ្ដើមបាន៣ពិន្ទុមករក្សាទុកនៅក្នុងដៃជាលើកដំបូង បន្ទាប់ពីបានផ្ដួលកីឡាករថៃឈ្មោះផេត សិលា ឱ្យសន្លប់នៅក្នុងទឹកទី២ ។ ចំណែកព្រឿង សុជាតិ មកពីក្លិបកងពលធំអន្តរាគមន៍លេខ២ ចាញ់កីឡាករថៃឈ្មោះភុន សាវ៉ាត នៅក្នុងទឹកទី៤។
រីឯគូប្រកួតមិត្តភាពវិញ កីឡាករ ព្រំ វី មកពីក្លិបកងទ័ពជើងទឹក ឈ្នះពិន្ទុកីឡាករ លីន វិរៈ មកពីក្លិបបូរីរាជសីហ៍មានរិទ្ធ និងកីឡាករឡុង បូឡា មកពីក្លិបកងទ័ពជើងទឹក ផ្ដួលកីឡាករ លីន បេលឿន មកពីក្លិបបូរីរាជសីហ៍មានរិទ្ធ ឱ្យសន្លប់នៅក្នុងទឹកទី៣ ៕
ចែករំលែកព័តមាននេះ