ខេត្តកណ្តាល ៖ នេះចាត់ទុកថា ជាការបើកទំព័រសករាជថ្មីមួយទៀតសម្រាប់កម្ពុជា ដែលបានចាប់ផ្ដើមអនុវត្តគម្រោងអភិវឌ្ឍន៍លំនៅឋានសាធារណៈ ដោយផ្ដល់អាទិភាពដល់មន្ត្រីរាជការ ប្រជាពលរដ្ឋក្រីក្រ
ខេត្តកណ្តាល ៖ នេះចាត់ទុកថា ជាការបើកទំព័រសករាជថ្មីមួយទៀតសម្រាប់កម្ពុជា ដែលបានចាប់ផ្ដើមអនុវត្តគម្រោងអភិវឌ្ឍន៍លំនៅឋានសាធារណៈ ដោយផ្ដល់អាទិភាពដល់មន្ត្រីរាជការ ប្រជាពលរដ្ឋក្រីក្រ ដែលមានចំណូលទាប និងមធ្យម អាចទិញផ្ទះដោយបង់រំលស់ត្រឹម១ខែ៨០ដុល្លារសម្រាប់រយៈពេល២០ឆ្នាំ ។
នៅក្នុងពិធីសម្ពោធបុកគ្រឹះបើកការដ្ឋានសាងសង់កាលពីថ្ងៃទី៧ មករា កន្លងទៅ គេសង្កេតឃើញមានមន្ត្រីរាជការ និងពលរដ្ឋមកពីគ្រប់មជ្ឈដ្ឋាន បានចាប់អារម្មណ៍យ៉ាងខ្លាំងទៅលើគម្រោងនេះ ដោយនាំគ្នាទៅពិនិត្យមើលប្លង់ដែលក្រុមហ៊ុនបានដាក់បង្ហាញជូនតាំងពីព្រឹកព្រលឹម រហូតដល់ពេលរសៀល ។
ស្ត្រីចំណាស់ជាគ្រូបង្រៀនចូលនិវត្តន៍ម្នាក់ បានរៀបរាប់ក្នុងលក្ខខណ្ឌមិនបញ្ចេញឈ្មោះថា សព្វថ្ងៃ គាត់ស្នាក់នៅផ្ទះជួលមួយកន្លែងក្នុងខណ្ឌទួលគោក រាជធានីភ្នំពេញ ។ ការមកចូលរួមបើកការដ្ឋានសាងសង់លំនៅឋានសម្រាប់មន្ត្រីរាជការ និងប្រជាពលរដ្ឋមានប្រាក់ចំណូលទាបនិងមធ្យមនាពេលនេះ ព្រោះគាត់ចាប់អារម្មណ៍លើគម្រោងនេះយ៉ាងខ្លាំង ហើយគាត់ត្រូវតែទិញផ្ទះក្នុងគម្រោងនេះសម្រាប់ស្នាក់នៅ បើទោះជានៅទីនេះក៏ដោយ ព្រោះគាត់មានវ័យចំណាស់ហើយ មិនដឹងទៅធ្វើការឯណាកើតទៀតទេ ។ ដូចនេះ មានតែនៅចាំផ្ទះហើយ បើសិនជាមានផ្ទះផ្ទាល់ខ្លួននោះ គឺជាការប្រសើរណាស់ ។
កញ្ញា ស៊ី អិន ដែលចូលរួមក្នុងពិធីនោះដែរបានឲ្យដឹងថា កញ្ញាមកទីនេះដើម្បីសាកសួរព័ត៌មានជុំវិញការសាងសង់ និងការលក់គម្រោងលំនៅឋាននេះ ដោយចង់ដឹងថា តើគម្រោងនេះនឹងប្រកាសលក់នៅពេលណា ត្រូវបំពេញបែបបទអ្វីខ្លះ មានឯកសារអ្វីខ្លះ និងត្រូវមានលក្ខខណ្ឌយ៉ាងណា ទើបអាចទិញផ្ទះក្នុងគម្រោងនេះបាន ។ កញ្ញានិយាយថា ៖ « ខ្ញុំមកនេះដើម្បីសួរនាំព័ត៌មានជំនួសមិត្តភក្តិខ្ញុំទេ ព្រោះគេ[មិត្តភក្ដិ]មានគ្រួសាររួចហើយ តែដោយសារទៅបំពេញបេសកកម្មនៅខាងក្រៅ ទើបគាត់ពឹងខ្ញុំឱ្យមកមើលព័ត៌មានជំនួស ព្រោះយ៉ាងណាមិត្តភក្តិខ្ញុំថា គាត់នឹងទិញផ្ទះនៅកន្លែងនេះ ព្រោះមើលទៅវាមិនជាឆ្ងាយប៉ុន្មានពីក្រុងតាខ្មៅទេ » ។
លោកឧកញ៉ា សៀ ឫទ្ធី អគ្គនាយកក្រុមហ៊ុន World Bridge Land អ្នកអភិវឌ្ឍន៍គម្រោងលំនៅឋានសាធារណៈកម្ពុជា បានឲ្យដឹងថា គម្រោងអភិវឌ្ឍន៍លំនៅឋានសាធារណៈ ដែលជាការសហការដៃគូរវាងរាជរដ្ឋាភិបាល និងក្រុមហ៊ុន World Bridge Land គឺជាលំនៅឋានបែបសហគមន៍ ប្រកបដោយគុណភាព សុវត្ថិភាព សុខុមាលភាព និងភាពងាយស្រួលក្នុងការរស់នៅ ។ លោកឧកញ៉ាមានប្រសាសន៍ថា ៖ «ក្រុមហ៊ុនគ្រោងសាងសង់ផ្ទះកម្ពស់២ជាន់ សរុប២.២៩៧ល្វែង ចែកចេញជាពីរប្រភេទ រួមមានទី១ ផ្ទះមានទំហំ៤គុណនឹង៧ម៉ែត្រ មានចំនួនផ្ទះសរុប២.០២៥ល្វែង និងប្រភេទទី២ ជាលំនៅឋានក្នុងមួយល្វែងៗមានទំហំ៦គុណនឹង៧ម៉ែត្រ មានចំនួនផ្ទះសរុប២៧២ល្វែង » ។
លោកឧកញ៉ាបន្តថា ដើម្បីផ្ដល់សុខុមាលភាព និងភាពងាយស្រួលក្នុងការរស់នៅរបស់ប្រជាពលរដ្ឋ ដែលនឹងត្រូវរស់នៅក្នុងលំនៅឋាននេះក្រុមហ៊ុនគ្រោងនឹងអភិវឌ្ឍន៍ជាផ្សារ ហាងទំនិញ គ្លីនិក សាលារៀន សួនច្បារសាធារណៈ និងការិយាល័យរដ្ឋបាលនៅក្នុងគម្រោងនេះផ្ទាល់តែម្ដង។ លើសពីនេះទៀត ក្រុមហ៊ុនក៏នឹងរៀបចំលទ្ធភាពសេវាដឹកជញ្ជូនសាធារណៈ ពីទីតាំងគម្រោងទៅកាន់ទីតាំងសេវារបស់រដ្ឋ ដើម្បីបង្កភាពងាយស្រួលដល់ការធ្វើដំណើររបស់ប្រជាជន ។
លោកឧកញ៉ាថា ៖ « ក្រុមហ៊ុននឹងត្រូវអភិវឌ្ឍន៍ជាជំហានៗ ដោយគម្រោងទី១នេះសាងសង់លើផ្ទៃដីចំនួន២៤ហិកតាក្នុងចំណោម៤៥ហិកតានៅក្នុងភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល ដោយនឹងបញ្ចប់ការសាងសង់នៅចុងឆ្នាំ២០១៨ ដែលមានក្រុមហ៊ុនជំនាញៗក្នុងការសាងសង់ » ។
លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ឲ្យដឹងថា គម្រោងផ្ទះនេះមិនមែនធ្វើឲ្យតែបាននោះទេ ត្រូវគិតទៅលើគុណភាព មានហេដ្ឋារចនាសម្ព័ន្ធត្រឹមត្រូវ និងការរួមចំណែកក្នុងការការពារបរិស្ថានជាដើម ។
លោកទេសរដ្ឋមន្ត្រីបន្តថា ខាងក្រសួង និងក្រុមហ៊ុនបានជជែកគ្នាពីរឿងតម្លៃនៃការបង់រំលស់ ដោយធ្វើយ៉ាងណា សម្រួលដល់ការបង់ឲ្យនៅតិចត្រឹម៨០ដុល្លារ ឬ៩០ដុល្លារអាមេរិកក្នុងមួយខែៗ ហើយគម្រោងនេះដែរ ក៏ត្រូវមានការតាមដានហ្មត់ចត់ទៅលើអ្នកទិញផងដែរ ដោយតម្រូវជាលក្ខខណ្ឌដូចជា អ្នកមិនទាន់រៀបការមិនអនុញ្ញាតឲ្យទិញផ្ទះនេះបានឡើយ។ ដូចនេះ ផ្ទះនេះតម្រូវទៅលើអ្នកដែលមានគ្រួសាររួចហើយ និងកំពុងស្វែងរកផ្ទះស្នាក់នៅពិតប្រាកដ ។
បើតាមម្ចាស់គម្រោងបញ្ជាក់ថា គម្រោងទី១នេះ ចំណាយទឹកប្រាក់ប្រមាណជិត៦០លានដុល្លារអាមេរិក ហើយគម្រោងនេះនឹងប្រកាសលក់នៅរយៈពេលប្រមាណ២សប្ដាហ៍ខាងមុខ។ ចំពោះតម្លៃជាក់ស្ដែង ត្រូវកក់មុនប៉ុន្មាន និងត្រូវបង់រំលស់ប៉ុន្មាននោះ នឹងត្រូវប្រកាសជូនសាធារណជននៅរយៈពេលពីរអាទិត្យទៀតដែរ ៕
ចែករំលែកព័តមាននេះ