រាជធានីភ្នំពេញ ៖ កំណើនពាណិជ្ជកម្មអន្តរជាតិរបស់កម្ពុជា បានកើនឡើងពី១៣ពាន់លានដុល្លារក្នុងឆ្នាំ២០១១ ដល់ជិត៣០ពាន់លានដុល្លារក្នុងឆ្នាំ២០១៤ បានរួមចំណែកយ៉ាងសំខាន់ដល់ការកាត់បន្ថយភាពក្រីក្រ និងការរក្សាស្ថិរភាពម៉ាក្រូសេដ្ឋកិច្ច ។ លទ្ធផលដ៏ប្រសើរនេះបានធ្វើឲ្យកម្ពុជាក្លាយជាប្រទេសគំរូឈានមុខគេ ហើយត្រូវបានក្រុមប្រទេសអភិវឌ្ឍន៍តិចតួច (LDCs) ផ្តល់ទំនុកចិត្តបោះឆ្នោតជ្រើសរើសធ្វើជាតំណាងរបស់ខ្លួននៅអង្គការពាណិជ្ជកម្មពិភពលោក (WTO) និងត្រូវបានជ្រើសរើសជាឯកច្ឆន្ទឱ្យធ្វើជាប្រធានសម្របសម្រួល កាលពីថ្ងៃទី១៤ ខែវិច្ឆិកា ឆ្នាំ២០១៦កន្លងទៅ សម្រាប់អាណត្តិរយៈពេល១ឆ្នាំ គិតចាប់ពីខែកុម្ភៈ ឆ្នាំ២០១៧ ដល់ខែកុម្ភៈ ឆ្នាំ២០១៨ ។ នេះបើតាមមន្ត្រីជាន់ខ្ពស់ក្រសួងពាណិជ្ជកម្ម ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានឱ្យដឹងក្នុងសន្និសីទកាលពីថ្ងៃទី៦ មករា កន្លងទៅថា កម្ពុជាបានក្លាយជាប្រទេសគំរូមួយដល់ប្រទេសអភិវឌ្ឍន៍តិចតួចដទៃទៀត ដោយសារកម្ពុជាសម្រេចបានលទ្ធផលជាវិជ្ជមានក្នុងការអភិវឌ្ឍសេដ្ឋកិច្ច និងសង្គម ដែលនេះជាកត្តាជំរុញឱ្យមានការសម្រេចជាឯកច្ឆន្ទ ជ្រើសរើសកម្ពុជា ជាប្រធានសម្របសម្រួលក្រុមប្រទេសអភិវឌ្ឍន៍តិចតួច ក្នុងការចរចាក្រោមក្របខ័ណ្ឌអង្គការពាណិជ្ជកម្មពិភពលោក ។
លោករដ្ឋមន្ត្រីបន្ដថា ជាទូទៅ ប្រធានសម្របសម្រួលក្រុមប្រទេសអភិវឌ្ឍន៍តិចតួច គឺត្រូវអញ្ជើញឱ្យចូលរួមក្នុងកិច្ចប្រជុំធំៗដូចជា កិច្ចប្រជុំ Green Room កិច្ចប្រជុំអគ្គក្រុមប្រឹក្សា ក្រុមប្រឹក្សា គណៈកម្មាធិការ ក្រុមការងារដើម្បីពិភាក្សា និងពិគ្រោះយោបល់ជាមួយតំណាងក្រុមនានា ។ លោកថា ៖ « តួនាទីជាប្រធាននេះ គឺត្រូវកោះប្រជុំ រៀបចំឯកសារ រៀបចំសុន្ទរកថា រៀបចំបទអន្តរាគមន៍ ឬរៀបចំចម្លើយសម្រាប់ឆ្លើយមុននឹងចូលរួមប្រជុំនីមួយៗ » ។
លោកបន្ដថា ក្រោយពីប្រជុំសំខាន់ៗខាងលើ ទាំងមន្ត្រីការទូត និងមន្ត្រីទទួលបន្ទុកត្រូវរាយការណ៍ និងពិគ្រោះយោបល់ជាមួយប្រទេសជាសមាជិកនានាដើម្បីរៀបចំឯកសារ និងរក្សាជំហរចរចា ។ ក្នុងតួនាទីនេះ កម្ពុជានឹងធ្វើការសម្របសម្រួលជាមួយប្រទេសអភិវឌ្ឍន៍តិចតួច ដែលជាសមាជិកអង្គការពាណិជ្ជកម្មពិភពលោក ទាំង៣៦ និងប្រទេសសង្កេតការណ៍ទាំង៨ ក្នុងចំណោមប្រទេសអភិវឌ្ឍន៍តិចតួចទាំងអស់ចំនួន៤៨ ដើម្បីជំរុញឱ្យការចរចាទាំងអស់ក្នុងវិស័យពាណិជ្ជកម្ម ក្រោមក្របខ័ណ្ឌអង្គការពាណិជ្ជកម្មពិភពលោក ឲ្យសម្រេចបានជោគជ័យនៅក្នុងសន្និសីទថ្នាក់រដ្ឋមន្ត្រីលើកទី១១ ដែលនឹងប្រព្រឹត្តទៅចាប់ពីថ្ងៃទី១១ ដល់១៤ ខែធ្នូ ឆ្នាំ២០១៧ នៅទីក្រុងប៊ូអេណូស អែររេស ប្រទេសអាហ្សង់ទីន ។
លោករដ្ឋមន្ត្រីបញ្ជាក់ថា ៖ « តួនាទីជាប្រធាននេះ នឹងលើកកម្ពស់កិត្យានុភាព និងកិត្តិស័ព្ទរបស់កម្ពុជាឱ្យកាន់តែប្រសើរឡើងនៅលើឆាកអន្តរជាតិ ជាពិសេស តាមរយៈកិច្ចការត្រៀមរៀបចំសន្និសីទថ្នាក់រដ្ឋមន្ត្រីរបស់អង្គការពាណិជ្ជកម្មពិភពលោក លើកទី១១ ដែលគ្រោងនឹងប្រព្រឹត្តទៅនៅប្រទេសអាហ្សង់ទីន នៅខែធ្នូ ឆ្នាំ២០១៧ ដែលភាពជោគជ័យនៃសន្និសីទថ្នាក់រដ្ឋមន្ត្រីលើកទី១១របស់អង្គការពាណិជ្ជកម្មពិភពលោក នឹងចូលរួមចំណែកធ្វើឱ្យសេដ្ឋកិច្ចពិភពលោកមានស្ថិរភាព» ។
ទន្ទឹមនឹងនេះ កម្ពុជាអាចសហការជាមួយប្រទេសអភិវឌ្ឍន៍តិចតួចដទៃទៀត ដើម្បីទាញយកផលប្រយោជន៍ពីការចរចាលើគោលនយោបាយពាណិជ្ជកម្មអន្តរជាតិសម្រាប់ជាឧត្តមប្រយោជន៍ដល់កម្ពុជា ក្នុងវិស័យនានាដូចជា ពាណិជ្ជកម្ម កសិកម្ម ទំនិញនាំចេញ សេវាកម្ម វិនិយោគ កម្មសិទ្ធិបញ្ញា និងបណ្តុះបណ្តាលធនធានមនុស្ស ដែលជាបច្ច័យអំណោយផលដល់ការបង្កើតការងារថ្មីៗជាច្រើនទៀតជូនប្រជាពលរដ្ឋកម្ពុជា ។
គួររំឭកថា ប្រទេសដែលធ្លាប់ធ្វើជាប្រធានសម្របសម្រួលក្រុមប្រទេសអភិវឌ្ឍន៍តិចតួច មានដូចជា បង់ក្លាដែស, ហ្សាន់ញ៉ា, ឡេសូតូ, សំប៊ី, ហៃទី, នេប៉ាល់, អ៊ូហ្គង់ដា និងបេនីន ៕
ចែករំលែកព័តមាននេះ