រាជធានីភ្នំពេញ ៖ ដើម្បីកាត់បន្ថយក្ដីកង្វល់អំពីបញ្ហាទីផ្សារ ក៏ដូចជាតម្លៃស្រូវរបស់ប្រជាកសិករនៅខេត្តមួយចំនួន អគ្គនាយកធនាគារស្រូវកម្ពុជា គ្រោងបោះទុន៨០លានដុល្លារដើម្បីចុះកិច្ចសន្យាប្រមូលទិញស្រូវពីប្រជាកសិករក្នុង
រាជធានីភ្នំពេញ ៖ ដើម្បីកាត់បន្ថយក្ដីកង្វល់អំពីបញ្ហាទីផ្សារ ក៏ដូចជាតម្លៃស្រូវរបស់ប្រជាកសិករនៅខេត្តមួយចំនួន អគ្គនាយកធនាគារស្រូវកម្ពុជា គ្រោងបោះទុន៨០លានដុល្លារដើម្បីចុះកិច្ចសន្យាប្រមូលទិញស្រូវពីប្រជាកសិករក្នុងខេត្តចំនួន៣នៅភាគពាយ័ព្យនៃប្រទេស ដែលជាខេត្តជង្រុកស្រូវរបស់កម្ពុជា ។
លោកឧកញ៉ា ភួ ពុយ អគ្គនាយកធនាគារស្រូវកម្ពុជា បានថ្លែងនាថ្ងៃទី៥ មករា កន្លងមកថា លោកកំពុងរៀបចំចងក្រងសហគមន៍កសិករនៅក្នុងខេត្តពោធិ៍សាត់ បាត់ដំបង និងបន្ទាយមានជ័យ ដើម្បីចុះកិច្ចសន្យាប្រមូលទិញស្រូវពីប្រជាកសិករនៅពេលរដូវប្រមូលផល ដើម្បីធ្វើឲ្យកសិករអាចមានលំនឹងក្នុងចិត្ត និងបញ្ចៀសបាននូវការក្រឡុកតម្លៃពីឈ្មួញកណ្តាល។ លោកបន្តថា លោកគ្រោងធ្វើការសហការជាមួយរោងម៉ាស៊ីនកិនស្រូវនានានៅតំបន់ភាគពាយ័ព្យ ដើម្បីឲ្យពួកគេមានទុន និងអាចជួយពួកគេឲ្យដំណើរការសង្វាក់ផលិតកម្មរបស់ពួកគេឡើងវិញផងដែរ ។
លោកឧកញ៉ាបន្តថា ៖ « ការរៀបចំសហគមន៍នេះ ដើម្បីជួយកសិករមិនឲ្យបារម្ភពីទីផ្សារ, កាត់បន្ថយការចំណាយលើការបាត់បង់ផលិតភាពរបស់ពួកគាត់ និងកាត់បន្ថយការចំណាយថ្លៃដើមលើការផលិតរបស់ប្រជាកសិករ។ ប្រសិនជាប្រជាកសិករធ្វើស្រែតាមលក្ខណៈបច្ចេកទេសត្រឹមត្រូវ ពួកគេអាចទទួលបានទិន្នផលកាន់តែខ្ពស់ និងកាត់បន្ថយថ្លៃ២០០ដុល្លារក្នុងមួយហិកតា » ។
ការរៀបចំចុះកិច្ចសន្យាជាមួយសហគមន៍កសិករនេះ ស្របតាមគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ។
លោក វេង សាខុន រដ្ឋមន្ត្រីក្រសួងកសិកម្ម បានថ្លែងថា ក្រសួងកំពុងរៀបចំគោលនយោបាយតាមរយៈការធ្វើស្រែចុះកិច្ចសន្យាជាមួយប្រជាពលរដ្ឋ ដើម្បីជួយឲ្យពួកគាត់មានលំនឹងក្នុងចិត្តនៅពេលរដូវប្រមូលផល និងគ្រោងសិក្សាលើប្រភេទដីនៅកម្ពុជា ដើម្បីដឹងថា ដីនៅតំបន់ណាមានជីវជាតិ ដីនៅតំបន់ណាមានសភាពបែបណា សម្រាប់ងាយប្រើប្រាស់ជីឲ្យបានសមស្រប ព្រោះការប្រើប្រាស់ជីមិនបានសមស្របធ្វើឲ្យកសិករចំណាយលើថ្លៃជីច្រើន ដែលធ្វើឲ្យផលិតកម្មរបស់ពួកគាត់មានតម្លៃថ្លៃ ។
លោកបន្តថា ៖ « ប្រសិនជាកសិករធ្វើស្រែ បានផលត្រឹមមួយហិកតាពី៣ទៅ៤តោន ពួកគាត់មិនអាចរកផលចំណេញពីការធ្វើស្រែបាននោះទេ ។ ទាល់តែកសិករបានទទួលផលក្នុងរង្វង់៦តោនក្នុងមួយហិកតា ទើបកសិករអាចរកផលចំណេញពីការធ្វើស្រែបាន ។ លើសពីនេះ ការអភិវឌ្ឍកសិកម្មទាមទារឲ្យមានការជួយថ្ពក់ពីវិស័យឯកជន ទើបវិស័យកសិកម្មអាចរីកចម្រើនបាន » ។
លោករដ្ឋមន្ត្រីបន្តថា តម្លៃកសិផលធ្លាក់ថ្លៃកន្លងមក មួយផ្នែកក៏ដោយសារការលោភលន់របស់មន្ត្រី និងឈ្មួញមួយចំនួន ដែលការងារនេះទាមទារឲ្យមានការសម្របសម្រួល និងធ្វើការងារឲ្យបានសកម្មពីមន្ត្រីកសិកម្មនៅតាមបណ្តាខេត្ត ដែលភាគច្រើនពួកគេមិនសូវមានសកម្មភាពនោះទេ ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចប្រចាំរាជបណ្ឌិត្យសភាកម្ពុជា ថ្លែងថា ការចងក្រងសហគមន៍កសិករ នឹងធ្វើឲ្យកសិករទទួលបានផលប្រយោជន៍ច្រើនទាំងតម្លៃ និងការរកប្រភពទុនដើម្បីយកមកប្រើប្រាស់ ។ ការចងក្រងសហគមន៍ ធ្វើឲ្យកសិករអាចមានមូលដ្ឋានងាយស្រួលធ្វើការខ្ចីឥណទានដែលមានអត្រាការប្រាក់ទាប ធៀបជាមួយកម្ចីជាឯកត្តបុគ្គល ហើយយកទុនមកប្រើប្រាស់បានងាយស្រួល និងចំណេញអត្រាការប្រាក់ច្រើន ។
លោកបន្តថា ៖ « ការចងក្រងសហគមន៍កសិករ ក៏អាចធ្វើឲ្យផលិតផលមានភាពប្រមូលផ្តុំ និងដាក់ចេញតម្លៃលក់ចេញដោយខ្លួនឯង ដើម្បីបញ្ចៀសការក្រឡុកតម្លៃផលិតផលរបស់ឈ្មួញកណ្តាលនានាបាន »
ចែករំលែកព័តមាននេះ