ប្រធានាធិបតីសិង្ហបុរីបំពេញទស្សនកិច្ចផ្លូវរដ្ឋរយៈពេល4ថ្ងៃនៅកម្ពុជា
រាជធានីភ្នំពេញ ៖ លោក តូនី តាន់ កេងយាំ ប្រធានាធិបតីនៃសាធារណរដ្ឋសិង្ហបុរីនិងលោកជំទាវ នាថ្ងៃទី៨ ខែមករា បានដឹកនាំគណៈប្រតិភូមកបំពេញទស្សនកិច្ច
រាជធានីភ្នំពេញ ៖ លោក តូនី តាន់ កេងយាំ ប្រធានាធិបតីនៃសាធារណរដ្ឋសិង្ហបុរីនិងលោកជំទាវ នាថ្ងៃទី៨ ខែមករា បានដឹកនាំគណៈប្រតិភូមកបំពេញទស្សនកិច្ចផ្លូវរដ្ឋរយៈពេល៤ថ្ងៃនៅព្រះរាជាណាចក្រកម្ពុជា ។
គណៈប្រតិភូ បានអញ្ជើញមកដល់កម្ពុជានៅវេលាម៉ោងប្រហែល១២និង៥០ថ្ងៃត្រង់ ក្រោមកិច្ចការពារសន្តិសុខយ៉ាងតឹងរឹុងបំផុតពីសំណាក់សមត្ថកិច្ចកម្ពុជា ។
ដំណើរទស្សនកិច្ចនេះ គឺចាប់ពីថ្ងៃទី៨ដល់១១ ខែមករា តបតាមការអញ្ជើញរបស់ព្រះករុណាសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។
នៅអាកាសយានដ្ឋានអន្តរជាតិភ្នំពេញ គណៈប្រតិភូត្រូវបានទទួលបដិសណ្ឋារកិច្ចពីសំណាក់សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីព្រះបរមរាជវាំង ព្រមទាំងមន្ត្រីអ្នកមុខអ្នកការជាច្រើនរូបទៀត ។ គណៈប្រតិភូ ដែលដឹកនាំដោយលោកប្រធានាធិបតី តូនី តាន់ កេងយាំ ស្នាក់នៅសណ្ឋាគារសូហ្វីតែល ភ្នំពេញភូគីត្រា ។
មានការកត់សម្គាល់ថា មានសិស្សានុសិស្ស មន្ត្រីរាជការ បានឈរសងខាងមហាវិថីសហព័ន្ធរុស្ស៊ី ទទួលស្វាគមន៍ដំណើរទស្សនកិច្ចរបស់គណៈប្រតិភូតាំងពីអាកាសយានដ្ឋានអន្តរជាតិចូលមករាជធានីភ្នំពេញក្រោមការរឹតបន្តឹងសន្តិសុខនិងសណ្តាប់ធ្នាប់ពីសំណាក់សមត្ថកិច្ចរាជរដ្ឋាភិបាល ។
ក្រសួងការបរទេសនិងសហប្រតិបត្តិការអន្តរជាតិកម្ពុជាបានបញ្ជាក់ថា ក្នុងកំឡុងពេលបំពេញទស្សនកិច្ចនេះ លោកបណ្ឌិត តូនី តាន់ កេងយា នឹងចូលបង្គំគាល់ព្រះករុណាព្រះមហាក្សត្រនៅប្រាសាទទេវាវិនិច្ឆ័យ និងចូលបង្គំគាល់សម្តេចព្រះមហាក្សត្រី ព្រះវររាជមាតាជាតិ ។
លោកប្រធានាធិបតី តូនី តាន់ កេងយាំ នឹងជួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រី ។ បន្ទាប់មកថ្នាក់ដឹកនាំទាំងពីរ នឹងធ្វើជាអធិបតីក្នុងពិធីចុះហត្ថលេខាលើឯកសារចំនួនពីរគឺ ៖
ទី១-អនុស្សរណៈស្តីពីកិច្ចសហប្រតិបត្តិការលើវិស័យអប់រំ បណ្តុះបណ្តាលបច្ចេកទេស និងវិជ្ជាជីវៈ រវាងក្រសួងការងារនិងបណ្តុះបណ្តាល វិជ្ជាជីវៈនៃព្រះរាជាណាចក្រកម្ពុជា និងវិទ្យាស្ថានបច្ចេកវិទ្យានៃសាធារណរដ្ឋសិង្ហបុរី ។
ទី២-អនុស្សរណៈរវាងមន្ទីរពេទ្យកាល់ម៉ែតនៃព្រះរាជាណាចក្រកម្ពុជា និងមន្ទីរពេទ្យតាន់តុកសេង នៃសាធារណរដ្ឋសិង្ហបុរី ។
ក្នុងដំណើរទស្សនកិច្ចនេះដែរ លោកប្រធានាធិបតី នឹងអញ្ជើញទស្សនាគម្រោងរបស់សាធារណរដ្ឋសិង្ហបុរីនៅមន្ទីរពេទ្យកាល់ម៉ែត និងប្រាសាទអង្គរវត្តនៅខេត្តសៀមរាប ៕
ចែករំលែកព័តមាននេះ